6
1 Mali im weng afak kebiliw kawtiw i ikalem kak kunum ilo wangweng keyemeko, im afak keko, boliw te! Keko bomeliwi, mali kawtiw i im ken kukuw be atemeko, kanelom Sunbin-Got em wiin so, akalem kukuyemin so de mit da kolewbokoliw te!*Efesus 6:5 2 Kak kawtiw mak i Kulais elo “Fein!”, dangiw tewe, biim afak kebiliw Kulais elo “Fein!”, dangbiliw kawtiw i kanelom biim bakayembiliw weng beelo sakalaw keko, weng bo bo keyemeko, “Numel nu Sunbin-Got em afak kuw keko, kakabuluw te!”, yangokoliw te! Babo! Kate, alik alik bi bukeko, im kak yetebiliw kunum biilo aluwbamin fian mak duyemboliwka! Nimtew angom? Ikati Sunbin-Got elo “Fein!”, dangiwi, Sunbin-Got e ilo ibolow mutuk fian duyemkabe kasike.
Timoti kutaka! Ku nem fut boli weng be diwkuw diwkuw kukuyemeko, bakayembolewka!*Filemon 16
Mali im Dasuw Kukuyemin beem Weng Kilelbi Bolewka!
3 Nakunum Timoti kutaka! Nimin kawtiw ite mak nukalem Kamok Fian Yesus Kulais em kiol kuw atite weng kemin be famdeko, nanew kukuyemin mak kukuyemomi, Sunbin-Got em kiin dim e kiol kakamin deiw kukuyemin be koliw tewe,*Galesia 1:6-9 4 kawtiw bi ibolow teifuluko, anung anung kebomi, ibolow fukunin kau kebiliw kawtiw ite te. I weng anung gel mak kuluko, beem mongom e weng dumin fian kelomin ibolow kebiliw kasike, im mutuk e ibolow on kelew kelew kemin e, ganbin e, mali im wiin e de mit da kolew kolew kemin e, ibolow kum kemin e, 5 mali im weng bakilew kelew kelew kemin e, kaneko eisneng alik alik be diwkuw im dim alakabe te. Alakabe kasike, kawtiw biim ibolow fukunin e yout nam atew keyembelei, kanebiliw kukuw be fein weng im dim be be atin kulu koyemkabe te. Keko beli, i ibolow fukunomeliw: “Nu Sunbin-Got em deiw kakabuluw kasike, beem mongom ete nu on kisol fian mak kuluko, wiin so kawtiw kebuluw te!”, angakabiliw te.*2 Timoti 3:8; 4:4; Taitus 1:14
6 Kate nu kal kelomeluw: Nu Sunbin-Got em deiw kakabomi, nomin eisneng ete e nulo duyemei, nu beelo ibolow nanbow kemuw tewe, e nulo yan ken mak fein duyemoke te!*Filibai 4:11-12; 1 Timoti 4:8; Kibulu 13:5 7 Ku kilele ibolow fukuna! Num yem aliwol nulo dukusu ding kabalak e, nu mesesem eisneng so telinba kesuluw te. Beemdiw, num kuaneko, unokoluw ding dim akati, nu mesesem so de nam unuw te.*Sow 1:21 8 Kasike, nu kameem ding dim bakate, wanin so, ilim so, kebuluw tewe, nu “Kika!”, angeko, ibolow nanbow angeko, boluwka! 9 Kate, kawtiw i beemdiw ibolow nanbow anginba kesomi, on kisol em kulamin ibolow kuw fukuniw tewe, kawtiw biim ibolow fukunin e ilo kiskiw kuw koyemei, i abil tem unokoliw te. Unesomeliwi, i sili sili kukuw so, ilo wa keyemoke eisneng so, ibolow danong keyembiliw kasike, i atin kuw yenei, kuanokoliw te. 10 Nimtew angom? On kisol em ibolow dulew kemin e sili sili kukuw banban em mongom ete kasike. Keko kasike, mali kawtiw i on kisol beem ibolow danong danong kuw kelewsomi, beem mongom ete fein ibolow kolewsiliw kasike, i ikalem dim elo kuw betbet so ilum so duyemsiliw te.*Efesus 5:5
Kewkew Weng te.
11 Kate ku, Sunbin-Got em kunum kebelew kasike, ku kanelom wa kukuw beem mit mewso unemokolew te! Kate, beelo koleweko, fon unemolewka! Kom gelewemokolew kukuw e kanekote:
Sunbin-Got em kiin dim e kiol kuw kemin e,
akalem ken deiw kakamin e,
fein ibolow em deiw kakamin e,
ibolow dulew dulew kemin e,
kal anggil ilum kululew ding dim bakate, kalaing kuw keko, kitil kesomi, mo kemin e,
ibolow falit kemin bete kale.*2 Timoti 2:22
12 Sunbin-Got e kulo “Sunsun finik so bin dukemi kae!”, kangesomelei, ku mali kawtiw banban im kiin dim e em bokokemse sang beelo “Feinka!”, dangbelew kasike kame, ku sunsun finik so bin beelo kitil kuw aluwbolewka! Fein! Ku kukalem fein ibolow em dulum elote bukeko, ganbin ken geneko, kakamolewka!*1 Kolin 9:25-26; 2 Timoti 4:7
13 Nakunum Timoti kutaka! Alik alik finik so bin angom biilo finik duyembe Sunbin-Got em kiin dim e, Sudia aneng fian yetemse kamok Fontius Failat em kiin dim e kaim dim weng ken fein kuw bokolewse Kulais Yesus em kiin dim e,*Sion 18:36-37 14 yelim biim kiin dim e ne kulo weng kitil weng mak bokokemomeli: “Kameem ding uneko, nukalem Kamok Fian Yesus Kulais em iti telesomi, unoke ding kabalak e, ku nem fut kale bokemsi kukukemin be kilele aluwko, sen so banim kesomi, atin kiol kuw kebolewka!”, kangbi te.
15 Nakunum Timoti, ku kilele ibolow fukuna! Kalfong em mongom kayak so, akalem ete kuw kamokim fian kebe so, alik alik kamok so, kak kawtiw so, im imisik kamok fian so kak kebe Sunbin-Got e Kulais em iti dabalaloke ding e fein kaim dim daloke te.*Fitew Dase 17:14 16 Sunbin-Got bete kuw nam kuane te. Esik kal so kun so kunum waneng nu em mit mewso ki keko, nam unuw ailbin fian beem mutuk kel alakabe te. Kunum waneng mak elo ateminba kesomi, num mutuk mak e ki keko, elo atemomin e nam kiluw te. Sunbin-Got em wiin e diwkuw diwkuw daolewbina! Akalem auk so kitil so bin e diwkuw diwkuw boke te! Feinka!
17 Timoti, ku kameem ding kale kel em so biliw kunum waneng ilo bokoyemomelew: “Yu kanelom yukalem wiin daolewko, fongate akate banimoke tum win on kisol elo ibolow dukalewbokoliw te! Kate, yu sakik ilum kekabe ding kale kel e, kalaing kuw keko, finik so bin Sunbin-Got em ding fenoliwka! E alik nulo kalfongyemin eisneng banban duyemkabe kasike.”, yangolewka!*Iluk 12:20 18 Yangeko, iti weng makso bokoyemomelew: “Yu mali kawtiw ilo ken kukuw keyemboliwka! Keyembomi, yom aluwbamin ken kukuyembiliw be yom on kisol atite emdiw keloke te. Yu falim emdiw kunum waneng keboliw te!”, yangolewka! 19 I beemdiw keliw tewe, abiil tikin kel, i am kitil nam emdiw gesomi, on kisol fian mak emdiw bonggusomi, finik so bin fein aluwbokoliw te.*Matyu 6:20
20 Nakunum Timoti kutaka! Sunbin-Got em kulo dukemse aluwbamin atite ati beelo kilele atemeko, aluwbolewka! Ku kanelom mali im sakok so, mongom banim so, ken weng emdiw bakabiliw weng be wosu kemokolew te! Keko, ku kanelom “Nu fein em deiw e kilele kal keluw kunum waneng nute te!”, angeko, funum dasuw bakabiliw kawtiw iso bongguko, ilo weng dumin weng bakayembokolew te! 21 Nimtew angom? Mali kunum waneng mak i biim bakayembiliw weng be kiliko, gelewsomi, fein ibolow em deiw kolewsiliw kasike.
Nakunum a! Sunbin-Got em ibolow folok e alik yuso boka!
Bete kuw. Nem fut weng bokemi fut be kame kilaka.*1 Timoti 1:6; 2 Timoti 2:18
*6:2: Filemon 16
*6:5: 2 Timoti 3:8; 4:4; Taitus 1:14
*6:6: Filibai 4:11-12; 1 Timoti 4:8; Kibulu 13:5
*6:7: Sow 1:21
*6:12: 1 Kolin 9:25-26; 2 Timoti 4:7
*6:21: 1 Timoti 1:6; 2 Timoti 2:18