Fut kale Fol em
Taitus
elo Dabalalewse Fut kale.
1
1-4 Taitus, belew yako! Ku Kulais Yesus elo nukatetew “Fein!”, dangbelew angomi, nem min atew kebelew te.
Aatim Sunbin-Got so, nukalem kuankemin deiw okileweko, finik so kulamin deiw kel mo koyemse Kamok Fian Kulais Yesus so, yelim bi kulo ibolow folok so, ibolow menew so fein kukukemeko, kekembiliw te!*Ulom 1:7; 2 Kolin 8:23; Galesia 2:3; 2 Timoti 4:10
Sunbin-Got e Fol nelo akalem sak weng afak bin kunum kenemse te. Keko kanenemei, Yesus Kulais e nelo akalem kalan kunum kenemeko, bokonemomele: “Sunbin-Got e kulo akalem wiin so galmose kasike, ku elo ‘Feinka!’, dangokoliw kunum waneng im dim elo uneko, fein weng so, Sunbin-Got em kiin dim e kukuw ken kemin so, kukuyem diliko, una!”, nangse te. Kanekabi beem mongom ete mali kunum waneng bi fein weng be kiliko, kalaing kuw keko, Sunbin-Got em alik nulo “Yu sunsun finik so bin kulokoliw kai!”, yangse weng beem dem gilaloke ding e fenkabiliw te. Feinka! Mesesem eisneng talfut kelinba ding kabalak kel dasuw weng bokolinbakabe Sunbin-Got e weng be nulo bokoyemse te.*Kolosi 1:27 E sua kel akate kitil weng be bokoyemse kate kame, bakalem dukuse ding dim kelei, e weng be kalan dekakabiliw kawtiw im teing dim dukulei, i fein weng be kaim dim bakayem kakakabiliw te. Nakati imdiw keko, Sunbin-Got em nelo kitil weng “Kukati una!”, nangse weng beelo gelewsomi, dekakabi te.
Taitus em Kilit Okgung kel Aluwse em Sang te.
5 Nakunum Taitus kutaka! Sua kel e, ne kulo Kilit okgung kel kokemsomi, bokokemomeli: “Ku abiw mutuk abiw mutuk im sios em aluwbamin anung kolew teli be kilele kelewsomi, sios im kak kunum ikal galmo koyemolewka!”, kangsi te. 6 Ku sios im kak kunum biim kanebiliw kukuw be kilele diwatemsomi, ibik ete ilo sios im yetebiliw kunum galmo koyembolewka! Im diwyemokolew kukuw be kanekote:
Mak e, kawtiw alik im kiin dim e sen so banim kunum kebiliw kunum ite te.
Mak e, waneng makmak kuw kulu akalbiliw kunum ite te.
Mak e, Kulais elo “Fein!”, dangbiliw muluwel so kunum ite te. Im muluwel bi kanelom ikalem “Kanela! Kanela!”, angeko, ibolow fukunin kuw gelewbokoliw te! Kate, i ikalem auk so alew so im weng afak kuw keboliwka!*1 Timoti 3:2-7; 2 Timoti 2:24-26
7 Mak e, kak yetebiliw kunum i Sunbin-Got em aluwbamin aluwkabiliw kasike, i kawtiw alik im kiin dim e sen so banim kunum keko, boliwka!
Mak e, i kanelom ikalem kal dim em ibolow fukunin kuw gelewemokoliw te!
Mak e, i kanelom fongate kaisuw kemokoliw te!
Mak e, i kanelom wain ok banban waneko, anung anung teifulu kemokoliw te!
Mak e i kanelom ibolow silikmoyemokoliw te!
Mak e, im ibolow e tum win ibolow kuw dukalewokoliw te! Babo!
8 Kate, i kokow kunum waneng ilo ikalem am da keyemsomi,
ken eisneng elo ibolow fian dulewsomi,
ken teinbin kukuw gelewsomi,
kiol kuw kukuw gelewsomi,
kitil keko, Sunbin-Got em ibolow fukunin elo “Nu kilele kaneluma!”, angsomi,
ikalem kal dim em “Kanela! Kanela!”, angakabe beem kukuw be kilele kitil kuw keko, de mit da kolewkemoliwka!
9 Kanelewsomeliwi, i “Feinka!”, dangbiliw kukuyemin weng bete kuw kitil aluwboliwka! Aluwsomi, i ki keko, mali kunum waneng ilo kilele Sunbin-Got em weng em mongom kaleyemeko, elo gelew kemin deiw kukuyem keyemsomi, mali ikalem weng mit da koyemkabiliw kawtiw ilo kilele yan weng bokoyemeko, “Bayo! Yu kaneninba tako!”, yangboliwka!
10 Nakunum Taitus kutaka! Ku kak kunum biilo kilele diwyembolewka! Nimtew angom? Kilit okgung kel kunum banban i sakalaw keko, weng bo bo kukuw kuw kesomi, weng takemin weng kuw bokosomi, fimdi famde kukuw kuw gelewkabiliw kasike. Kate, mali kanekabiliw kunum biilo bakiyemkabiliw kunum i mali yuso biliw Suda kunum ite kuw te.*1 Timoti 4:7 11 Yu kitil keko, ilo “Yu ‘Kimi!’, angina!”, yangbolewka! Nimtew angom? I wa kukuw kuw gelewsomi, tum win on kisol kulomin ibolow beem mongom ete mali kunum waneng ilo dasuw kukuyemin bokoyemsomi, kais yelimel banban ilo binge binge amen kuw amen kuw yemde unakabiliw kasike.*2 Timoti 3:5-6; 1 Fita 5:2 12 Ku suaem Kilit aneng kukuyemin kunum em weng bose weng kale ibolow fukuna! E boko, bokolomele*1:12 Weng kale Isalael kawtiw im ibik biliw kawtiw em bise kunum mak Ebimenes angse kale. Kulais e telinba belei, 500-600 itol banimei, kunum be kuanse kale.:
“Kilit aneng fian kasel alik alik i diwkuw diwkuw dasuw weng kuw bakamsomi, kut samal im kukuw atew ikalem mesesem kulomin ete kuw fukusomi, sak wanin kuw wanbisiliw kate, aluwbamin beem dulum elote gal kekabiliw te!”,
angse kale. 13 Angse weng be fein weng kasike, ku sios kunum waneng im kak koyemokolew kunum biilo kitil weng kuw bokoyemsomi, kilelyembolewka! Kaneyembelew kano, im fein ibolow bakati ken ati kuw keyemolewka!*2 Timoti 4:2 14 Keyembomelewi, i kanelom Suda kawtiw im sua sua kel kanese kunum waneng nu akokow so kebuluw biim sang be kililomi, fein weng kolewbiliw kawtiw im sawa weng elo gelew kemokoliw te!*1 Timoti 4:7 15 Nimtew angom? Mesesem mesesem eisneng alik alik angom be Sunbin-Got em kiin dim kiol kuw kukuw gelewkabiliw kunum waneng im dulum akati kiol kuw keyemkabe kasike. Kate, Sunbin-Got elo “Fein!”, danginba kesomi, em kiin dim e ninik so kukuw kuw gelewkabiliw kawtiw im ibolow fukunin so, ikalem Sunbin-Got eso ibolow ki makmak kebiliw em fukunin so, im fukunin alik alik be atin kuw wa keko, ninik nam so kekabe kasike, kawtiw ikalem dulum akati alik alik eisneng be ninik so keyemkabe kasike. 16 Kaneko kawtiw bi kaim dim kel bokolomeliw: “Nu Sunbin-Got elo kilele kal keluw kai!”, ange ange kebiliw kate, i em kiin dim e kaing wasan mian wasan emdiw kesomi, sakalaw keko, weng bo bo kukuw kuw kitil kuw aluwsomi, ken kukuw kelomin em dulum elote atin kuw soson kawtiw kebiliw kasike, i ikalem kukuw em dulum elote kilele kaim dim dukuliwete: I Sunbin-Got elo atin kuw dolon kelinba kekabiliw te.*1 Sion 1:6; 2:4
*1:1-4: Ulom 1:7; 2 Kolin 8:23; Galesia 2:3; 2 Timoti 4:10
*1:6: 1 Timoti 3:2-7; 2 Timoti 2:24-26
*1:11: 2 Timoti 3:5-6; 1 Fita 5:2
*1:12: 1:12 Weng kale Isalael kawtiw im ibik biliw kawtiw em bise kunum mak Ebimenes angse kale. Kulais e telinba belei, 500-600 itol banimei, kunum be kuanse kale.