A Sisila ne
Ginigeet te
JON
Jon a aposol ixo geet ina ginigeet. A oleleng ne tene nanase te döxömen bere Jon ixo kis so Esia nang ixo geet ina ginigeet ma ixo gegeet urungan köbo lotu ruso iat Esia. Jon ixo mamaa rua ötumarang idi abo tene nunu ulamun abo tene ausu töxö (pere 1 Jon 2.26) ewe nang toxobo rengrengen bara abo lalaa tabo pere ra xö öxöno lagunon i saban, ma abo lewene aine ire i saban bölök, ma abo tanono ire i deek. Io nang, idi toxobo rengrengen bara kaim pe laa bara ire tabo pet tebo sasaban köbo lewene aine ire nang i saban. Me idi toxobo rengrengen bölök bara Jisas a tödi mon ine, ma nang ixo met, kaim bara e Krais a Barok kö God nang ixo met. Inexalik e Jon i öös tewe abo mangana dinödöm pe idi biringan. I tengen bara nang ire te pet te sasaban, ire te lexe abo warkurai te God (3:4). Ma i tengen bölök bara a bung barok ke God tekara pet te sasaban (2:28; 3:12). Jon i mamaa bara ire tabo önga balade arixe me God kölöme xö tatalien maras. Ina na a unine ina ginigeet, bara abo tene nunu idi tabo mumuu a tatalien möxö maras (1:5-7). I kobo eöt te öng bara irabo tengen bara iri nunu re Krais ma inexalik ibo mumuu abo magingin saban möxö ködö. Ma lamun ewe a öng i rarame abo warkurai kö God i kisisik kölöme re God (3:24). Ma a unine ina warkurai te God i bira, bara ire tabo mana mamaa ulamun ire iat ma tabo nunu re Jisas Krais a Barok kö God (3:23). Jon ixo mamaa bara ire tabo maras bara ina tödi niang ine e Jisas (1:1; 4:2-3), ine a Barok kö God bölök (2:23; 3:23; 4:9-10; 4:14-15; 5:5-13; 5:20), me ine a Mesaia (nang toxo tengen ine bere ‘Krais’; 2:22; 5:1), ma bere ine iat ixo met tua gene ire bara irabo öro ire (5:4-8). Jon ixo mamaa bara ire tabo maras bere ire tere kip lo ina to ulorexe saxit nang bere ire tere nunu xö Barok kö God (5:13).
1
A Tinenge ne To
1 Mem me töngösen e mum ma a lasa nang ixo kis sik mesila xö urulo, a lasa nang mem moxo ölangen ma moxo pere ma mara mem. Me mem moxo pere ma moxo sigi ine mabo lime mem. Me ine iat mon ina tinenge möxö to na nang mem me töngösen e mum ulamunon. 2 Ma ina to ixoro wösö me mem me töngösen e mum ulamun ina to ulorexe saxit. Mem moxo pere ine me mem me öturunon ine rö mum. Ine niang nang ixo kis arixe me Mama ma ixoro wösö re mem. 3 Me mem me töngösen bölök e mum ulamun a lasa nang mem moxo pere ma moxo ölangen, rue mum bölök ka önga balade arixe me mem. Me mem pua önga balade arixe me Mama ma a Barok ke ine, e Jisas Krais. 4 Mem me geet inabo lalaa na urö mum, rue ire ra wöwöwö ma axanan.
Ire tabo mana önan kö maras
5 Io, ina na a tinenge mem moxoro ölangen lo xalik e Jisas Krais me mem me töngösen e mum ulamunon, bara God i eöt ma bibio ma kaim arixe re ködö kölöme re ine. 6 Nang bara ire te tengen bere ire te önga balade arixe me ine, ma lamun ire te önan kö ködö, io, ire te etöxö ma abo tatalien te ire i karabo eöt mabo turunon kö God nang ixoro wösö. 7 Inexalik nang bara ire te önan kö maras xarnang ine iat i kis kö maras, io, ire te önga balade arixe ma uleng kabise ma a dee re Jisas, a Barok ke ine, i ömadakdak ire xalik abo magingin saban kirip.
8 Nang bara ire te tengen bara kaim ire mere magingin saban, ire te ösaxit baling iat te ire me ire te döxömen bara ina atöxö i turunon. Inexalik abo turunon kö God i karabo kis kölöme re ire. 9 Ma lamun nang bere ire te etöngösen maras mabo magingin saban te ire, io, God irabo pet eörin abo kunubus se ine ma irabo pet a tatalien töxödös sua döxömen taun abo sasaban te ire ma rua ömadakdak ire xalik abo magingin kirip nang i kobo töxödös. 10 God i tengen bara ire tere pet a sasaban. Ma nang bara ire te tengen bara ire tekobo pet te sasaban, io, ire te tengen e God bara a tene atöxö ine ma a tinenge re ine i kobo kis kölöme re ire.