1 E geet abo lalaa na urungan tö mum, abo bung barok lixilik ke e kölöme re Krais, rue mum pa ganim a wewet tebo magingin saban. Ma lamun nang bara re öng i pet te sasaban, ire ma önga tödi nangen nang ibo wöwörö rua gene ire xö wawara xö God. Me ine e Jisas Krais, a tene töxödös. 2 Me ine iat a arabaa nang ibo ruruu wi a bala laie xö God tua xikip tewe abo magingin saban te ire. Ma kaim bara ine a arabaa rua xikip tewe a magingin sasaban te ire xalik mon. Kaim. Ine a arabaa rua gene magingin saban möxö öxöno lagunon kirip.

3 Ire te maras bara ire te ösöxö sik e God nang bara ire te tame abo warkurai te ine. 4 Me ewenene i tengen bara i ösöxö e God, ma lamun i kara muu eörin a warkurai te ine, ine a tene röxröxö ma a turunon kö God i kobo kis kölöme re ine. 5 Ma lamun turunon saxit, nang bara re öng i tame abo tinenge re ine, i osen bara a mamaa raxin te ine urungan kö God iri wöwö. Me ire tabo ösöxö bule bara ire te kis kölöme re ine? Ma i bira: 6 Ewenene re öng nang i rengrengen bara ine i kis kölöme re God, ine irabo mana wan xarnang e Jisas ixo pet bie.

7 Abo ais deek ke e, e kobo geet te warkurai maxat urungan tö mum, ma lamun a warkurai maut mon nang mum moxo kip lo mesila saxit. Ma ina warkurai maut, ine a tinenge nang mum moxoro ölangen.*Ina warkurai bira: “Ire tabo mana mamaa ulamun ire iat.” Pere 3:11; Jon 13:34-35. 8 Ma lamun i turunon bere e gegeet bölök a warkurai maxat urungan tö mum. Me ire te maras bara turunon ina warkurai maxat, möxösa, ire te pere xöbo to re Jisas me mum. Ma i maras bira, möxösa, a xödxödö iri eka xaköwöm ma a bibio runon iri marmaras.

9 Me ewenene nang i tengen bara i kis kölöme xö maras, nexalik bara i mimixenin a tönö ine kölöme re Krais, ine nangen nang kö xödxödö. 10 Me ewenene nang i mamaa lamun a tönö ine kölöme re Krais, ine ibo xisixis kölöme xö maras ma kaim pe sasaban kölöme re ine nang bara irabo ösubu ine. 11 Ma lamun ewenene re öng i mimixenin a tönö, ine i kisisik kö xödxödö ma i önan eli nana xö ködö. Ma i kobo ösöxö a xönö nang i önan ne, möxösa, a xödxödö ixoro öwulo a nine marna.

15 Mum bele mamaa ulamun abo tatalien mabo lalaa möxö öxöno lagunon. Ma nang bara re öng i mamaa ulamun abo tatalien mera xö öxöno lagunon, io, ine i kobo mamaa ulamun e Mama, 16 möxösa, abo lalaa xirip möxö öxöno lagunon, abo mamaa saban, abo a neek saban, ma abo tatalien ne aölolot, idi tokobo wanot meriso re Mama. Kaim. Idi te wanot mera xö öxöno lagunon. 17 Ma öxöno lagunon i ka xakawöm, arixe mabo lalaa nang a nangadi tobo mamaa ulamunon. Ma lamun ewenene nang i pet eörin a nang e Mama i mamaa ulamun, ine irabo kis kö to ulorexe saxit.

18 Abo baroxorok ke e kölöme re Krais, a na a axana bung möxö xakawöm. Ma xarnang mum moxoro ölangen sik bara abo iuo re Krais tabo wanot, ma na iat a oleleng ke idi toxoro baa wanot. Io, lamun ina na ire tere ösöxö xulen bara na a xaköwöm. 19 Idi toxo wan tewe xalik ire, ma lamun kaim bere idi mere ire runon. Inexalik nang bara idi runon mere ire, idi tekexebe eöt tua nuan tewe xalik ire. Ma lamun a inuan tewe re idi, i osen bara idi xirip tokoxobo mere ire.

20 Inexalik, a Öng Nang a lak Madakdak ixoro tabaa e mum ma Töxödös ne Tanono, rue mum kirip pa ösöxö a sa i turunon. 21 Rösa me e gegeet urungan te mum? Möxösa kaim bara mum kobo ösöxö inabo turunon, nexalik bara mum mo ösöxö sik, ma, möxösa, mum mo ösöxö tuar abo turunon me mum mo ösöxö bara kaim pe atöxö irabo wanot meringan kölöme xöbo turunon. 22 Ewe ine ina tene atöxö? Ine a öng nang ibo öös ulamun e Jisas bere ine a Mesaia. A önga mangana tödi xarna na, ine a iuo re Krais, möxösa, ibo öös ulamun e Mama ma a Barok ke ine bölök. 23 Ewenene re öng i öös lamun a Barok ke ine, i karabo uruoxe e Mama. Me ewenene nang i aut lo bara e Jisas a Barok kö God, io, ine iri uruoxe e Mama bölök.

24 Me mum, mum morobo mana öbala lo ina tinenge nang mum moxoro ölangen lo xö urulo bara irabo mana kis kölöme re mum. Nang bara ina tinenge nang mum moxoro ölangen kö urulo ibo xisixis kölöme re mum, io, mum bölök morobo kis kölöme re Mama ma Barok ke ine. 25 Ma a kunubus nang ine iat ixoro isik kö ire, a to ulorexe saxit.

26 E geet inabo lalaa urungan tö mum ulamun idi nang ewe te mamaa rua silien ölelebes e mum. 27 Me mum kobo sasaxan bara re öng irabo usu e mum mere laa, möxösa, e Krais ixoro tabaa e mum ma Töxödös ne Tanono me ine ibo xisixis kölöme re mum ma ibo usu e mum mabo ausu re ine ulamun abo lalaa xirip, ma ina ausu i turunon ma i kobo töxö. Lamun ina na, mum morobo mana kis kölöme re Krais xarnang a Tanono ibo usu e mum bie.

28 Io, abo baroxorok ke e kölöme re Krais, mum morobo mana kis kölöme re Krais, rue ire ra balamasa nang bara ine irabo wösö, me ire tekebeöt ta minenge xö wawara re ine xö ina bung nang ine irabo wanot. 29 Nang bere mum mo ösöxö bara Krais, ine a tene töxödös, mum mo ösöxö bölök bara ewenene re öng nang ibo wewet tatalien töxödös, ine a önga bak kö God.