10
1 Foron tuaklik, na liu tikii kiak, ke na foron sising kiak usuf God, ia lala ier tom isi fan Israel rin kep fafaliu. 2 Ia usum rokap lo ri le, ri lala ier isi mi lo God, isau le biil ri usum le sal sa rin mi lo. 3 I wara le biil ri usum na sal ke God isi rin tapiek tortores lo na mata, ma ri wol le rin tapiek tortores namin wolwol kiri tom, pesu biil ri fapu ri na pikli God isi i tom ik foteng ri le ri tortores. 4 Karisito ka fasuut ta foron nagogon, isi se i unune ik tapiek tortores na mata God.
Fafaliu usuf Fanu tikii
5 WokPris 18:5Moses i ororek ta isi fanu ae ri mi na foron nagogon, le rin tapiek tortores arafa na mata God. I use ta u aragii, “Se i mi na pintokon foron nagogon tikii, in liu.” 6 Lo 30:12-14Isau le Buk na Gogoh i ororek ta sabin isi fanu ae ri unune, le rin tapiek tortores arafa na mata God. I use u aragii, “Na balam, gong o use u le: Se in tatkau una kukulii?” (isi telpes Karisito uga na piklinbat.) 7 Ke gong o use u le, “Se in pu una salan foron minet?” (isi fapti pes Karisito tina minet.) 8 Isau le sani i use u? “Orek ae sau na fatat o, ae na ngusum ke ae na balam.” Orek ae, i e orek na unune ae kemem fafas ini. I aragii: 9 Male o fapos u ini ngusum le, Iesu i e Kumguui, ke o ka unune na balam le God i fapti fafis ta u tina minet, ke God in faliu wo. 10 Ma i wara na unune kiam na balam, ke God ik foteng wo le, o tom tortores. Ke i wara na fafapos kiam ini ngusum, ke ik faliu wo. 11 Aisaia 28:16Arae Buk na Gogoh i use u, “Se i unune lo, biil in to matlawen.” 12 Fan Iudaia ke fanu ae biil ri fan Iudaia, ri fasi tikii sau: Itikii sau e Kumguui, i Kumguui kiri tikii, ma i sapeng e lima usuf fanu tikii ae ri fakam la usuf i. 13 Joel 2:32Wara le, “Fanu tikii ae ri fakam na asa Kumguui, rin liu.”
14 Isau le, fanu rin fakam usuf i arafah, male biil ri unune lo? Ke rin unune lo arafah, male biil ri to ongen ti fafas lo? Ke rin ongen fafas lo arafah, male biil tikas i fafas ini usuf ri? 15 Aisaia 52:7Ke rin fafas arafah, male biil tikas i wuun ri? Arae ri siit ta u na Buk na Gogoh, “I rokap kanaka, e tapiek ken nenge tom fafas ae i la ini Rokap na Fafas.”
16 Aisaia 53:1Isau le, biil fan Israel tikii ri somangat pes Rokap na Fafas, arae profet Aisaia tom i use ta u, aragii, “Kumguui, se tom ka unune na orek kimem?” 17 Pesu, kere unune wara le kere ongen Rokap na Fafas, ma fafas ae kere ongen u, i fafas lo Karisito. 18 BukSong 19:4Isau le ian diik aragii: Arafah, fan Israel biil biitom ri ongen ta Rokap na Fafas? Biil sau! Ri ka ongen ta u. Wara le, Buk na Gogoh i tara aragii,
“Kine ri ka la tikii ta una falifu tikii na piklinbat,
ma orek kiri ka sarara ta usuf fanu tikii na ifet e matan kif.”
19 Lo 32:21Ian diik sabin aragii: Arafah, fan Israel biil ri malal lo? Ri malal sau lo. Wara le, na aunbiing ke Moses, God i use ta u aragii,
“Ian tel gam fan Israel isi gamek ram na liu ken fanu
ae funmat kiri biil ti asa.
Ian fakut balmi,
wara lon fanu ae biil ti malal na wolwol kiri.”
20 Aisaia 65:1Ke Aisaia i kep balamas tom aunbiing i use orek ke God, aragii,
“Fanu ae biil ri to im ta isi iau,
ri im tafe iau.
Ia tapiek tom sing fanu
ae biil ri diik isi iau.”
21 Aisaia 65:2Isau le isi fan Israel, ka use u aragii,
“Na foron biing tikii ia sangal,
isi foron tom ongen fabulwar
ke foron tom arakausi.”