9
I Purngis e Bala Pol isi Fan Israel
1 Ia orek tekentu na asa Karisito, biil ia to lem. Tanwa Kalkaluu i fatekentu u na wolwol kiak le orek igii i tekentu, le 2 ia mamais kanaka, ma fitliu balang i purngis, 3 isi foron tuaklik, foron tikiin mat kiak. Awii ngan, male in fasih, ke iak tampapak koseng Karisito ma iak fiu, isi rik kep fafaliu. 4 KisimBek 4:22Ri fan Israel, fanu ae God i patak pes ta ri arae berberat tutus kia. Ka finngas ta memeh kia usuf ri, ka tel ta foron puput tura ri, ka ta ta nagogon usuf ri, ka finngas ta ri ini sinangun lotu tekentu, ke ka tel ta foron falimlim tura ri. 5 Ma foron aulaumet lo ri tinpakanini e Abaram, Aisak ke Jekop. Ke aunbiing sabin Karisito i tapiek kaltu toh, i pang na mat kiri. Ususefages fitliu usuf i, wara i God ken foron tier tikii. Amen.
Fulfule ke God
6 Aunbiing ia use u arae, biil ia use u le God biil i fasuut ta falimlim kia usuf fan Israel, biil. Wara le biil e fan Israel tikii ri fan Israel tekentu na mata God, biil. 7 Stat 21:12Ke biil e foron tubutamat e Abaram tikii, ri berberat tutus kia, biil. Wara le God i fas ta Abaram aragii, “Fanu sau ae Aisak i fapuar ri, ri foron tubumtamat tutus.” 8 Kamtinan orek ae i aragii, biil e berberat tikii ae Abaram i fapuar ri, ri berberat ke God, biil. Berberat sau ae ri pang namin falimlim ke God, God i foteng ri arae foron tubutamat tutus e Abaram. 9 Stat 18:10Ma falimlim ke God i aragii, “Na aunbiing aragii na bet apiek, ian fis, ke Sara ik fang ta nenge kalalik tamat.”
10 Nenge tier sabin, Rebeka, iwu e kalalik tamat kia, ma itikii sau e tama ruh, i e Aisak tubutamat kerer. 11-12 Stat 25:23Isau le, na aunbiing iun kasang ae biil biitom ru pang, ma biil biitom ru tel ti sinang rokap le sinang laulau, God ka fas famu ta Rebeka aragii, “Neng lon kasang ae in pang famu in fafauun ken neng ae in pang namih.” God i tel u arae, una finngas u le biil i tim pes fanu la namin ti rokap na foim kiri, biil. Namin wolwol kia tom. 13 Malakai 1:2,3Arae tom ri ka siit ta u na Buk na Gogoh le, “Ia ier isi Jekop, isau le ia ememse Esau.”
14 Pesu, sani keren use u? Arafah, God biil i tel tortores na sinang? Auuh, biil! 15 KisimBek 33:19Wara le i fas ta Moses aragii,
“Ian finngas famais kiak usuf ier ae ia ier isi mais u,
ke ian lupes ier ae ia ier isi lupes u.”
16 Pesu, fulfule ke God biil i wara na foron tier ae fanu ri ier isi, le ri tel u la, biil. I wara tom na famais kia. 17 KisimBek 9:16Buk na Gogoh i use u ulo king Parau aragii, “Ia luun ta wo arae king, isi iak finngas rakrakai kiak lo wo, ma isi asang ik sararah na falifu tikii na piklinbat.” 18 Pesu, God in finngas famais kia usuf fanse ae i ier isi mais ri, ma ik fasorokai balan fanu ae i ier le in fasorokai balri.
19 Tarama tikas lo gam ik diik iau aragii, “Male i arae, ke isi sani biitom God ka tiu kerer? Wara le biil tikas ifasi in tikale sani ae God i ier isi tel u na liu kia.” 20 Aisaia 29:16; 45:9Ier, o wol le wo se tom, isi ok kiliis orek ke God? “Arafah, ifasi le nenge sospen in diik kaltu ae i tel ta u le, ‘O tel iau aragii isi sah?’ ” 21 Arafah, gam wol le tom tel sospen, biil ifasi in mi na wolwol kia tom ma ik tel ti sospen una piran biing, ke ti sospen sabin una foron biing foes sau, ini itikii sau e irin pisak, beh?
22 Ke ifasi sabin arae, taftawa le God ifasi tom le in finngas ngaliaf ke rakrakai kia, isau le i fofo tom usuf fanu ae ri kiis na piklin ngaliaf kia, ae ka fageges ta ri isi rin fiu. 23 I tel u arae, una finngas tara na memeh kia usuf fanu ae ri kiis na piklin famais kia, ae ka fageges ta ri isi rin kep memeh kia. 24 Kerer sau e fanu ae kere kiis na piklin famais kia. I kam pes ta kerer, biil lon fan Iudaia sau, biil, lon fanu sabin ae biil ri fan Iudaia. 25 Hosea 2:23Arae God i use ta u na buk ke profet Osea aragii,
“Fanu ae biil ri fanu kiak,
ian foteng ri le fanu kiak.
Ke ier ae biil ia ier ta isi,
ian kating u.”
26 Hosea 1:10Ke,
“Na maleh ae i fas ta ri le,
‘biil gam fanu kiak,’
rin foteng ri mang le,
‘berberat ke God ae i liu.’ ”
27 Aisaia 10:22,23Ma profet Aisaia sabin i ororek ta isi fan Israel, aragii,
“Taftawa le wewes lon fan Israel in fasi arae karkarat ae tole kiin,
isau le in tuul sau lo ri, Kumguui in faliu pes u.
28 Wara le, Kumguui in fasuut nagogon kia na piklinbat,
in sangsangar ma in farop tikii u.”
29 Aisaia 1:9Profet Aisaia i use ta u sabin aragii,
“Male Kumguui ae Rakrakai kia i Liuliu Kulef
biil i suaf ufu ta ti fal lo kerer,
ke keren rop sikit arae fan Sodom,
ke arae fan Gomora.”
Fan Israel biil ri Unune
30 Pesu, sani keren use u? Fanu ae biil ri fan Israel biil ri engenges ta isi tapiek tortores, biil. Isau le ri ka tapiek tortores na mata God, na unune sau kiri. 31 Fan Israel ri engenges isi rin tapiek tortores, aunbiing ri mi na nagogon, isau le biil bin ri tortores na mata God. 32 Isi sanih? I wara le ri wol le rin tapiek tortores na mata God na sinangun mi na nagogon, ma biil na unune. Ri tipeh ta na fat ae ri tipeh la lo. 33 Aisaia 28:16Arae tom ri siit ta u na Buk na Gogoh aragii,
“Par u, ia luun ta nenge fat na Saion,
ae i tel fanu ri ka tipeh,
ma i e fatkiis ae i tel fanu ri ka luut la.
Isau le se i unune lo, biil in to matlawen.”