1 Ia ier isi gamen usum le Fibi i rokap na fenelik kerer, ma i nenge tom foim ken foron tom unune na Senkria. 2 Ia sising gam le gamen somangat pes u na asa Kumguui, na matngan sinang ae i tortores isi fanu kalkaluu ke God rin tel u, ma gamek lupes u ini sani in dar u, wara le i ta tara falupes ta usuf fanu fuun, ke usuf iau sabin.

3  Aposel 18:2Gamen ta orek an famais kiak usuf Prisila ru e Akuila, ru iun tikiin foim kiak lo Karisito Iesu. 4 Ru lin ta liu kiruh isi lupes iau. Ia fotrokap kanaka isi ruh. Ma biil e iau keskes sau, biil. Foron uh na tom unune tikii sabin ae biil ri fan Iudaia, ri fotrokap usuf ruh.

5 Ta orek an famais kiak usuf foron tom unune ae ri la turim la na fel kiruh.

Ta orek an famais kiak usuf Epenetus, rokap na talang. I kaltu famu na falifu na Eisia ae i unune lo Karisito.

6 Ta orek an famais kiak usuf Maria ae i foim rakrakai ta isi lupes gam.

7 Ta orek an famais kiak usuf Andronikus ru e Junias, ru iun sikinting lo iau ae kemtuul kiis turim ta na kamkabet. Asru i laumet na fatpoton foron aposel, ma ru unune famu lo Karisito, lo iau.

8 Ta orek an famais kiak usuf Ampliatus ae ia ier kanaka isi na asa Kumguui.

9 Ta orek an famais kiak usuf Urbanus, i tikiin foim kirer lo Karisito, ke usuf Stakis, rokap na talang.

10 Ta orek an famais kiak usuf Apeles, i kaltu tu na mata Karisito.

Ta orek an famais kiak usuf fanu ae na matanfel ke Aristobulus.

11 Ta orek an famais kiak usuf Erodion, i sikinting lo iau.

Ta orek an famais kiak usuf fanu ae na matanfel ke Narsisus ae ri ke Kumguui.

12 Ta orek an famais kiak usuf Trifena ru e Trifosa, iun fifin ae ru foim rakrakai ta na foim ke Kumguui.

Ta orek an famais kiak usuf Persis, rokap na talang, nenge fifin sabin ae i foim rakrakai tah na foim ke Kumguui.

13  Mak 15:21Ta orek an famais kiak usuf Rufus, ae Kumguui tom i tim pes ta u, ke usuf tina Rufus, ae i arae tinang sabin.

14 Ta orek an famais kiak usuf Asinkritus, Flegon, Ermes, Patrobas, Ermas ke foron tualikrer ae naisri.

15 Ta orek an famais kiak usuf Filologus, Julia, Nereus ke usuf fenelik, ke usuf Olimpas turan fanu tikii ke God ae naisri.

16 Aunbiing gam fatafe, gamen fador faliu ini gam ini sinang ae i kalkaluu.

Foron uh na tom unune, ri tikii ri ta orek an famais kiri usuf gam.

17 Foron tuaklik, ia fas gam isi gamen tumarang isi fanu ae ri fatapiek tampaek la na fatpoto gam, ma ri ka tel kale salsalmi ini fafausum ae i neng keskes na fafausum ae gam ka kep ta u. Gamen fin koseng ri. 18 Wara le matngan fanu arae, biil ri mi lo Karisito Kumguui kirer, biil. Ri mi la sau na foron matngan sinang ae pununfo ri i ier isi. Ri ka fabal wolwol la ken fanu ae i kalwa bii e wolwol kiri, ini foron musmus na orek ke ini foron moek na orek kiri. 19 Fanu tikii ri ka ongen ta sinangun wong kimi, pesu, ia ka lala laes ini gam. Isau le ia ier isi in mel e rokap na wolwol kimi ini sani ae i rokap, ma gamen sengsegeng koseng sani ae i laulau.

20 God ae i ta siaroh la, fatat in fose fapekpekes Satan na piklin kekmi.

Famais ke kirer Kumguui Iesu in kiis tura gam.

21  Aposel 16:1Timoti, tikiin foim kiak i tule orek an famais kia usuf gam. Lusius, Jeisen ke Sosipater sabin rituul tule orek an famais kirituul usuf gam. Rituul tuul sikinting lo iau.

22 Ia, Tertius, ia siit papte ta foron orek na leta igii, ma ia ta orek an famais kiak usuf gam na asa Kumguui.

23-24  Aposel 19:29; 1Korin 1:14; 2Timoti 4:20Gaius, i ta orek an famais kia usuf gam. Iau turan foron tom unune tikii igii, kemem laes isi fofonoi kia na matanfel kia.

Erastus, ae i parpar la na pitkalang ken tara maleh igii, ke Kuartus, tualikrer, ru tule orek an famais kiruh usuf gam.

25 Keren ta memeh usuf God! I tel gam ka tifat na unune kimi, namin Rokap na Fafas lo Iesu Karisito ae ia fafas ta ini. Na fafas ae, God ka famalal puput kia, ae i kum ta tinpakanini tom. 26 Isau le igii, namin sisiit ken foron profet, ke na orek ke God ae i liu fitliu, puput kia ka malal mang usuf fanu tikii na piklinbat, isi ri sabin rik unune lo God, ma rik wong sing i. 27 Wara na foim ke Iesu Karisito, fitliu keren ta ususefages usuf i, itikii sau e God ae ifuun ini rokap na wolwol! Amen.