6
Kinna fannoo Moodeekaina uriqarara auqu aminau.
Miqu eendanaki kinna fannoo sia faiqanau. Minara mifa mina maqa maaqaki aiqama ainaina kambiqoonara akara rumaqoo papiqanara maree minisaifaqa misa minaki akara ufa qafaaqee qinau. Minisoofaqa misa Biktana faqa Teereesaana faqa ufa asaana rumasee qafoofaqa miqanda kinna maaqa oosiranauqaki rakisi mariqau. Mi fasiqa qanda kinna kuqa arira aanara randee mariqau. Randee marufanoo Moodeekaifa miqanda kukeeqara irirana qafamaseenoo miqanda koota niminau.
Minara rakisirafa qinau, innisaimbaqa nanee moo amiqira ainainannai Moodeekaifa auqai oosana akiiqara amianauree. Miqi qufaqa faiqi maaqi qimasee mina qimamiqau, innisaimbaqa sia moo ainaina mina amiqa.
Kinna fannoo misa iramirinoo qinau, qini oofisaauqa mi maqanaki mariiaafanoo fee sia fee. Maqee Amannafa kinna irara anidanoo, mifa Moodeekaina saqari rakiqasee deedaqamma qaanasaa diriaqeera qimamirara anidanoo. Minara Amannafa narí uqanna kinna maaqa mari uqusanaki keeqarara anidanoo.
Ainainira faiqiuqa mina qafamaseeqa kinna qimamiqa qiqau, Amannafa ani maaqai maridanoo ani afeesidanoo. Mifa ani qafarara maridanoo ani afeesidanoo. Miqi qufanoo kinna fannoo qinau mina afiqee maaqaki uruaqee qinau.
Amannafa maaqaki ooruroofanoo kinna fannoo qimaminoo qinau, qinee faiqi moo firaa auqu amirara iridaqa. Qinee sia iridaqa nanee moo amiqira ainainannai fee mina andeeqa amaqaanauree. Anee iria, qinee naqaa fee ianauree qufanoo Amannafa nariara maaqi qimasee oonu mafi irinau. Aqbee kinna fannoo yana miqimma amaqraree qidanoo fee sia moo fannoo maridanoo qinee kai maridaqa. 7-8 Amannafa miqi qimiriseenoo kaifaa rakisirana narí maaqi qimasee qimaminau. Aneenna afisi marianna qamunnana minisee mi fasiqana afisu amaqaa. Anee qoosasaa uqeemaria sandiriqana faqa bakarainna faqa amiqimmasee afaaqa auqusee aneenna qoossaa uqaa. Miqimmaseenana kaifaa qoosa akiiqa faqa afaaqa auqusainanoo mifa kinna qoosa fee qirana koorooiani. Anee aneenna oofisaauqa kinaana moo misa uriqararana mara uqasainanoo mifa ani qamunnannai mina afaaqa auquani. Miqimma sainanoo mi fasiqafa qoosasaa ooqu marifinanoo oofisaa fannoo mina afiqeenoo firaa suqira maqusaki fuani. Afiqee fidanoo mi oofisaafa maaqi qimasee nammeera qiani, maa fasiqana qafaaqa kinna fannoo mina firaa auqu amiseenoo mina amiqimma amaqeenoo.
10 Kinna fannoo mi ufana iriseenoo Amannana qimaminoo qinau anee kai kaqi oonu qamunna faqa qoosa faqa maraseenana qini saika faiqi Moodeekaina Yuda maqannaa fasiqa firaa auqu amia mi fasiqafa qini maaqa kooqiki ainaini marifa maridanoo. Aiqama ainaina maqee aneenna qiannandee masee auqaa.
11 Miqi qufanoo Amannafa iriseenoo qamunna faqa qoosa faqa maraseennoo Moodeekaina afaaqa auqinau. Auqusoofanoo Moodeekaifa qoosasaa ooqu marifufanoo Amannafa qafamaseenoo suqi maru maqusanai afiqee finau. Afiqee fidanoo Amannafa nammeera qimasee maaqi qimasee faiqi anaasee qimanniminau. Maa fasiqana qafaaqa kinna fannoo firaa auqu amiseenoo amiqimma amaqeenoo.
12 Miqi qimasoofanoo Moodeekaifa kaifaa anirandee kinna kooqinni finau. Fufanoo Amannafa asaurirana maraseenoo aundura ummaararoofanoo mifa oorisaa itita mareenoo kaifaa anirandee narí maaqai finau. 13 Oonureenoo mifa moo anaasee faqa narí aqoondiuqa faqa aiqama ainaina minaki kambiqoonara qimanniminau. Mi anaaseefa faqa mi aqoondisa faqa irirana firaana faqaasa maridaqa misa mina maaqi qimasee qimamiqau. Maqee ani afeeka faqa ani auqu faqa quminanoo Moodeekaifa ani uriaaqaranoo. Mifa Yuda maqannaafa marinara anee sia mina aana titara aana maridanoo, anee ummaara kai mareennaranoo. 14 Misa ufa qida marufanoo kinna ainainira faiqiuqa aniraqau. Misa Amannana kai kaqi afiqee Esta nammarina oomaqai firara aniqau.