5
Eesta nammrifa kinna faqa Amannana faqa firaa oomaqaki aniaqeera naaranau.
Eesta nammarifa qaarammoo faasaana narana auranau. Mifa qaarammoo faasaanasaa kuinna qamunna afisu mareenoo kinna maaqa maru uqusanaki keeqanau. Kinna firaa oosiranaki maruna aaqa oorufinau. Kinna fanno narí siaqasaa ooqu faaqeeidanoo kooqinni afu maqanau. Kinna fannoo Eesta nammarifa maqusai kikiqinoo marufanoo qafoofanoo mina amuqusa fannoo Eesta nammarinara amiqufanoo mifa koora saunu uaqee mariiu asaukuna afaaqai mundinau. Miqufanoo Eesta nammarifa mina aaqa anireenoo mi saununa ati auqanau.
Kinna fannoo qinau, kuinna Eesta nammari ani nanaree aididanoo fee. Qinee ani eeqá firaa maqa maaqa dinni ati ani amianeera aidi marinaqa qinee ani amianaura.
Miqi qufanoo Eesta nammarifa maaqi qinau. Rakisirafa amanee anee faqa Amannafa faqa maqee eendaki firaa oomaqaki anifaree.
Miqi qufanoo kinna fannoo mi ufanara eedoo qimaseenoo mifa Amannanara kai kaqi anirainaqa anindiri Eesta nammarifinnai fuanee qinau. Miqi qimaseeqa kinna faqa Amannafa faqa miqanda Eesta nammarina oomaqai fiqau. Misa oonu maridaqa uainna nee marufanoo kinna fannoo Eesta nammarina iramirinoo qinau. Anee nana ainainaree aidinnanara qinaqa amia. Aiqama ainainara anee irainnanara qinee eedoo qianaura. Anee qini maqa maaqa dinni ati mararee qinaqa qinee ani amianana anee rakisinnaranoo.
Kinna fannoo miqi qufanoo Eesta nammarifa kinna narí qimaminoo qinau, qinee maaqi qimaseee ani iramiridaqa. Anee qiniara firaaqoo asasinana qini irara ufara faqa asasinaqa duna qinee moo oomaqa deedaqamma saanaqa anee faqa Amanafa faqa ani naaqa. Nee marifaqa miqoo qinee eeqá didirana ani qimamianauranoo.
Amannafa Moodeekaina arira ufa tipundaarinau.
Amannafa narana neeneeuqooqari amuqusa amiqufanoo firaaqoo asasinau. Miqimmaseenoo oonuree qafoofanoo Moodeekaifa kinna maaqa kooqi aaqa ooqufaaqee marinau. Moodeekaifa maridanoo Amannana qafamaseenoo sia findifi amandanau. Miqufanoo Amannana firaaqoo arana qanau. 10 Amannana aranaqarafa suka uqanna qoofanoo mifa narí amuqusa muqufiseenoo mifa sia moo ainaina auqanau.
Mifa narí maaqai oonureenoo narí aqoondiuqa naaroofaqa aniroofanoo narí anaaqa Seereesa nammarina misa faqa mariani feera qimaminau. 11 Misa maaqaki aniroofanoo Amannafa misa nifusaa narí auqu uqeeranau. Mifa narí munnimma moomoo marunara faqa umiasana faqa mina faiqi namu akoonaiqiuqa moomoo marunara faqa qimanniminau. Kinna fannoo mina firaa saika faqa firaaq auqu faqa amiqoonara qimanniminau. Qimannimufaqa kinna oofisaauqa akaqausa mina ameemaanai mariqau. 12 Amannafa kaifaa maaqi qinau, kuinna Eesta nammarifa moo firaa oomaqa qinindi faqa kinnaindi faqa kai suqanau. Mifa sia moo fasiqa aaranau. Mifa maaqi qinau duna maaqandara kaifaa mina faqa oonu narana naaqee qinoo. 13 Qinee Moodeekaina qafaunanoo mifa Yuda maqannaa fasiqa maridanoo. Mifa kinna kooqiki ooqufaaqee marifanoo qini qimuqusa ummaara raifaqa qinee mi amiqira ainainausara fifau ainainee qimasee iridaqa.
14 Seereesa nammarifa Amannana anaaqa mifa narí aqoondiuqa faqa misa maaqi qimasee mina qimamiqau. Anee sia minara iria. Faiqi qimannimifaqa misa kisaaqa saqari 26 mita amana rakiqasee duna kananaana oonu kinna iramirisee Moodeekaina diriaqa. Anee miqimma sainanoo ani amuqusa amiqinana anee oonu narana naa. Amannafa mi ufanara asasammaseenoo faiqi qimannimufaqa misa Moodeekaina dirifandinn a saqarina rakiaqau.