1 Innee qini naaquqara uiqaana maqasaa akifandinna qamunna kisaaqa maaqimasee auquaqa. Sipsipa asausi dirindaasi akirana faqa pannoona akirana faqa faeena akirana faqa sufusee amiqira qamunna auqusee aqoosa faqaa aandau amana auqusee minasaa atooqasee akuniaqa. Miqimmasee minauqannai innee qisaukuqara taikasee 10 firaa qamunna auqusee moodaanaki akuniaqa. 2 Mi aiqama qamunnausa amana amana kai 12 metre kisaaqa mina qusa 2 metre mariani. 3 Mi qamunnausa moodaannai qisauku 5 marasee moodaanaki ootupamasee akuniaqa. Dinni qisauku taikasee 5 faqa miqi kai iaqa. 4 Miqimmaseeqa mi qamunna qanda atiqara dirindaasi arira qamunnannai anaanu auqusee moodaanaki ootupaaqa. 5 Firaa qamunna atimau anaanu 50 auquaqa. Moo qamunna faqa miqi kai iqa moo qamunna saaqaraa aanaanu amummaqa kai auquaqa. 6 Koora qumaree turimandee qusa tafara foora saaeemma qumaree dinni dinni anaanuki upeekasaifanoo mi qamunna qanda moodaara maqi inoo mariani.

7 Uiqaana maqa saa akira qamunna firaana mimmi asausinnai 11 auquaqa. 8 Innee aiqama moodaa karirana kai auquaqa. Mina kisaaqa 13 metres amana mariani. Mina qusa fannoo 2 metres amana mariani. 9 Mi qamunnausa moodaannai qisauku taikasee 5 qamunna akunusainanoo moodaa qamunnaika mafuani. Kafaa moodaannai qisauku taikasee dinni ani moodaa marasee 6 narisaa narisaa akuniisaifanoo firaafaikiani. Miqimma finaqa uiqaana maqa kooqindaraana murufi tukaanda quqaaqa. 10 Qamunna atimau anaanu 50 akuniaqa. Moo atimau faqa mina amummaqa kai akuniaqa. 11 Booroosannai tafara foora ati saaeemmasee 50 auqusee minannoo dinni dinni anaanuki aususee ootupama saifanoo moodaa qamunnara foora mariani. 12 Mi firaa qamunnana uiqaana maaqa akuamaqa saifanoo mina ati fiqaramasee akunirafa uruanatinai naambeeqai qumiqaranoo mariani. 13 Aabaa akunira qamunna fannoo uiqaana maqa ati fiqaree aiqaree inoo mariani. Dinni dinni amana amana kai 50 centimetre kai mariani. 14 Mina taikasee mina amuaaqa qaara qanda faqa auquaqa. Moo sipsipa akoona apata faeena akiranannai auquaqa. Auquseeqa moo ooruku nammarikinaa aandau kuara fooqaa irana apatannai auquseeqa minannoo meeraqoo amuaaqa akuaqa.

15 Innee akasia saqarinnai kai naaquqara uiqaana maqa atuna auqusee kuradaaqa. 16 Maaqi mandee maaqa atuna auquaqa. Saqari dinni dinni kuradarafa 4 metres mariani. Mina ausana qusa 66 centimetres amana kai auni ruaqa. 17 Aiqama atuna maqaki rakiqaranara irisee ati ooqiqara masee ateekaaqa. Aiqama maaqa atuna miqi kai masee ateekaaqa. 18 Innee suani afu ataaqeenni south kisaaqandanai maaqa atuna 20 narisaa narisaa apamandee kuradaaqa. 19 Maaqa atuna oosana sia maqaki kaqi rakiaaqa. Siruaannai amaaqa auqusee minaki maaqa atuna kuradaaqa. Siruaannai 40 maaqa atuna oosana amaaqa auqusee minaki kuradaaqa. 20 Uiqaana maqa suani dinni ataaqeenni north kisaaqandanai maaqa atuna 20 narisaa narisaa apamandee kuradaaqa. 21 Maaqa atuna sia maqaki kaqi rakiaaqa. Siruaannai 40 amaaqa auqusee minaki maaqa atuna kuradaaqa. 22 Suani keeqee mari qaannai (west) uiqaana maaqa uruanatinai maaqa atuna dinni qisauku taikasee dinni ani moodaa marasee 6 narisaa narisaa apamandee auquaqa. 23 Maaqa dinni dinni munu raqaranaki kafaa qaaraqanda auqusee kuradaaqa. 24 Raudaranaki maaqa atuna oosanaki apammasee kuradama saifanoo amiqimasee narisaa narisaa apinoo mariani. Maaqa atuna rakiqarana oosanaki rumba atukarasee miqi kai mamaree mirinni murufisaaqa. Dinni dinni munu raqaranaki miqi kaimmiaqa. 25 Miqimmaseeqa maaqa atuna 8 oosanaki siruaannai qaaraqanda qaaraqanda amaaqa auqusaifanoo 16 mariani. 26-27 Innee qauniri fandinnana akasia saqari 15 maraaqa. Uiqaana maqa ataaqee dinni dinni faqa uruanai faqa faifa faifannoo auni rumasaifanoo maaqa atukarama qumaraani. 28 Mi maaqa atunna qambaana aunirira saqari fannoo maaqa amana kai dinni dinni ati mariani. 29 Maaqa atuna aiqama koorannai kai rafaaqa fuaqa. Maaqa atuna mau aiqama koorannai kai anaanu mamaree fuaqa. Aunirifandinna saqarisa faqa koorannoo rafaaqafusee mi anaanusaki ausuaqa. 30 Doo Moosee qini uiqaana maqa aaqanasaa qinee qimamiafanandee masee usakaa. 31 Innee sipsipa asausi dirindaasi akirana faqa pannoona akirana faqa faeena akirana faqa sufusee minannai amiqira qamunna auquaqa. Miqimmasee mi qamunnana saa qangiroo qaqoosa faqaana amana auquaqa. 32 Akasia saqari qaara faqa qaara faqa 4 marasee koorannai aiqama rafaaqa fusee mina atisaa mirinni qamunna dirifandinna amaaqa auquaqa. Miqimmasee mina kuradee fandinnana amaaqa 4 oosanaki siruaannai auqusee minaki kuradaaqa. Kaaqa naaquqara oosirana ititaanifeera kuradaaqa. 33 Miqimmaseeqa mi qamunnana amaaqa auquqaanasaa dirisaifanoo amaaqa auqirana ameemaanai qamunna ati ooreeqanoo mariani. Miqimmasaifanoo mi qamunnana ititarafa ataufaka ameemaanai ooreeqanoo mariani. Mi qamunnafa ititaranaki moodaanaki kira bukisaki qaara oonisaa sandufa marina quqaaqa. Mi qamunnafa naaquqara oosirana faqa kaaqa naaquqara oosirana faqa rainaannoo. 34 Moodaanaki kira bukisa kaaqa naaquqara oosiranaki quqasee koorannai mina afu auqusee rafaaqa fuaqa, nifauara afu minasaa rafaaqa fuaqa. Dirira qamunna fannoo raina nimaqaidanoo kooqi kinaa oosiranara naaquqara maqa fee qimasee kukeeqara oosiranara uriqaramasee naaquqara maqa fee qiaqa. 35 Teeboora mareeqee naaquqara oosirana maaqoo oonumafi kooqiki suani afu dinni ataaqee qaannai (north) mafi quqaaqa. Qooma saqari suani afu dinni ataaqee qaannai (south) mafi quqaaqa. 36 Uiqaana maqa kooqiki ititee fandinna qamunnana sipsipa asausi dirindaasi akirana faqa pannoona akirana faqa faeena akiranannai faqa marasee auquaqa. Oosana oosana sandannai mooka maakira ainainauqa mi qamunnanasaa auquaqa. 37 Mi qamunnana dirifandinnana moodaannai qisauku 5 akasia saqari marasee koorannai mina atimau rafaaqafusee qamunna dirifandinnana anaanu auqusee quqaaqa. Miqimmasee booroosannai moodaannai qisauku 5 atuna oosana amaaqa auqusee minaki kuradaaqa.