1 Mooseefa Isaraee maqannaa faiqí anaasee aiqama suquseenoo qima niminau. Yaaweefa inniara maa ufamau fuaqee qidanoo. 2 Qisauku dinni taikasee dinni ani moodaa marasee 6 faasaanasaa ainainiaqee qinoo. Dinni ani qaaraikinoo 7 qini firaa naaquqara idooara faasaana mariannoo. Faiqí moo fannoo mi faasaanna ainaininaqa innee mina kuqa aruaqa. 3 Innee sia Sabata faasaannasaa inneeqa maaqaki suqa naaqa.

4 Mooseefa Isaraee maqannaa aiqama kafaa maaqi qimasee qimanniminau. Yaaweefa maaqi qimasee naamua qidanoo. 5 Innee Anutuna amiraree qimasee nifaaqa asasinausa koora faqa siruaa faqa booroosa faqa maree aniaqa. 6 Amiqira qamunna faqa sipsipa asausi dirindaasi akirana faqa pannoona akirana faqa faeena akirana faqa mimmi asausinnai auqira qamunna faqa maree aniaqa. 7 Sipsipa akoona apata faeena akirana faqa ooruku nammarikinaa aandau apata faqa akasia saqari faqa maree aniaqa. 8 Qooma qumbi maria fadameena faqa amiqira afundi mari ainainna andaana rirana idaki adiasaafanoo adiafaa ira undi marina faqa mi ainainna kai nikiiqa amoondunna adiee maria fadameenaki quqarara faqa maree aniaqa. 9 Pupu ooniuqa faqa akaqa amiqira ooniuqa faqa aanaiqi kirausa uriqararausa afisi maria eefooda qamunnanasaa faqa amuqusasaa ititara qamunna saa faqa quqeefandinna oonisa maree aniaqa.

10 Inni kiqari oosana oosana ainaina auqarana akoofasauqa kai anireeqa Yaaweena uiqaana maaqaki ainaina mifa naamua qimaqaimau kai auqaaqa. 11 Misa uiqaana maqa faqa mina rafaaqafi maria qamunnana faqa mina anaanu faqa mi maqana usakara atunauqa faqa aunirira saqari faqa oosuki faqa kooqiki faqa rakiqee fandinna saqarisa faqa saqari maqaki rakiqarana amaaqa auqirana faqa auquaqa. 12 Moodaanaki kira bookisa faqa mina qaindusira saqari qara faqa mina afu faqa minasaa ititara qamunna faqa auquaqa. 13 Aiku faqaa qainda faqa mina aindusira saqari qara faqa minasaa quqee maria ainainna faqa auquaqa, Anutuna amifandinna feemuna faqa uquaqa. 14 Qooma saqari faqa mina qoomauqa faqa mina oosana oosana ainaina faqa mina qeemari fadameenna faqa auquaqa. 15 Afundi marina andaana rirana suqee maria qaidarana faqa mina qaindusi maria saqari qanda faqa faiqí nikiiqa amoondunna adieemaria fadameenna faqa afundimarina andaana rirana faqa uiqaana maaqa kooqi qamunna faqa auquaqa. 16 Aandau tatufirana suqee maria qaidarana faqa mina fukaa asaana booroosannai auqirana faqa mina qaindusira saqari qara faqa mina oosana oosana ainaina faqa nammari auqara difaani faqa mina oosana faqa auquaqa. 17 Dapusaa diri maria qamunnana faqa dapu saqari faqa saqari kuradee mariana oosana amaaqa auqiranauqa faqa dapu kooqiki keeqee maria qamunnana faqa auquaqa. 18 Kafaa dapu faqa uiqaana maaqa apupukauqa faqa mina rumbee maria sanda ainaina faqa auquaqa. 19 Aaroona idaaqira qamunna faqa mina faiqi namu qamunna faqa uiqaana maaqaki naaquqara oosiranaki aanaiqikira saika maraidaqa afisifandinna qamunnana faqa mi aiqama ainainna auquaqa.

20 Mooseefa mi ufana qima nimisoofaqa faiqí anaasee irisee daraaniqau. 21 Nifaaqa asasusa mi ainainausa Yaaweena mini amisoofaqa mi ainainausannai Yaaweena uiqaana maqa usakaqau. Yaaweena amooqifandinna ainainausa faqa aanaiqikirausa afisifandinna qamunnausa auqifandinna ainainausa faqa maree aniqau. 22 Faiqí anaasee Yaaweena amirara nidimarusa misa kai nifaaqa auqimaru ainainausa nikiiqa asausi rumbee maru pinnana faqa naaqoo kinaa fidinaanu faqa nisaukuki quqee maru isaaqamana faqa ninukaki rufi maru kukukakana faqa oosana oosana ainaina nifaaqa auqi maruna koorannai auqiranauqa mini Yaaweena amidee qiqa mini quqaqau. 23 Akaqausa amiqira qamunna maqeeusa faqa sipsipa asausi dirindaasi akiranee pannoona akiranee faeena akiranee maqeeusa faqa mimmi asausinnai auqira qamunna maqeeusa faqa sipsipa akoona apata faeena akirana maqeeusa faqa ooruku nammariki maru aandauna apata maqeeusa faqa maree aniqau. 24 Siruaa faqa booroosa faqa Yaaweena amirara amanaikusa maree aniqau. Akaqausa akasia saqari Yaaweena uiqaana maqa usakarana amana maqeeusa maree aniqau. 25 Akoofasa anaaseeuqa oosana oosana amiqira sanda sipsipa asausinnai dirindaasianda faqa faeenanda faqa pannoona ariranda faqa sufirana mini quqaqau. 26 Misa mimmi asausinnai faqa sufimariqau. 27 Faiqí firaasa aanaiqikirausa uriqarana qamunnasaa faqa amuqusasaa faqa quqaaqeera faraafana ooniuqa faqa firaa feefaura aqimaru amiqira oonisa faqa maree aniqau. 28 Kafaa misa adiafaa imaru ainainausa oosana oosana faqa qooma qumbi maru fadameennana faqa nikiiqa amoondunna adiee maru fadameennana faqa adiafaa ira afudimaru ainaina aindirirana idaki teeqimmasoofanoo adiafaa ira afundi maruna faqa maree aniqau. 29 Isaraee maqannaasa faiqí anaasee Yaaweena amirara nidimarusa Yaaweefa Mooseenara auqaanifeera aakapoo ainainausa maree aniqau.

30 Mooseefa kaifaa Isaraee maqannaa maaqi qimasee qima niminau. Yaaweefa faiqí moo mina auqu Beesareerana Urina amaaku Hurana anaiqi Yudana atikinaana mara quqeenoo. 31 Yaaweefa Beesareerana aiqama amiqira ainaina auqaanifeera narí maraquna afeeka umbiqa amaqeenoo. Aiqama ainaina auqirana akoofasaikirana faqa amanaikirana faqa oosana oosana ainaina amana auqira irirana faqa aminoo. 32 Yaaweefa Beesareerana oonu mafi irisee auqara irirana amisaifanoo mifa koorannai faqa siruaannai faqa boroosannai faqa oosana oosana ainaina auqirana akoofasa maridanoo auquannoo. 33 Kafaa mifa amiqira ooni ateekeemaria irirana faqa koorannai mi oonina quqarana amaaqa auqira irirana faqa saqarisaa oosana oosana ainaina amana auqira irirana faqa amiqaifanoo auqaannoo. 34 Ooqooriabana Aqisamakana amaaku Dannana oosanakinaana faqa Yaaweefa inniki quqaqaifanoo mifa faqa Beesareerana dadaaqianifeera maridanoo. Yaaweefa miqanda akaqausa uqannifiqaaqee irirana faqa niminoo. 35 Yaaweefa oosana oosana ainaina nisaukunnai auqarana akoofasaikirana nimiqaifaqa maridaqa. Oonisaa akararirana faqa oosana oosana amiqira akara rira irirana faqa amiqira qamunna afundara irirana faqa sipsipa asausi dirindaasi akiranannoo faqa pannoona akiranannoo faqa faeena akiranannoo faa akaqa qamunna auqira irirana faqa niminoo. Nimisaifaqa miqanda oosana oosana ainaina auqira irirana akoofasa qara maridaqa.