1 Namasoofanoo Yooseefaafa narí maaqakinaa ainainasaa rakisi maru fasiqana qimaminoo qinau. Anee misa uqa maraseenana minakiaqa narana uqa ruma qumbiqasainaqa maree fuaqa. Moo uqa sia apeequniani. Amana kai marinaqa maree fuaqa. Misa munnimma faqa narana feefauriana nariqa uqa adianai rumasainaqa maree ooru fuaqa. 2 Miqidana inaaqiannaana uqakina narí munnimma narana feefaurina namufaqa qini siruaa kaafa faqa mina uqa adianai rua. Miqi qimasoofanoo mifa qimamundee inau.

3 Kananaana keekoo qufaqa doo misa nári doonkiuqa namufaqa niqiqoofaqa oorufiqau. 4 Doo mareeqa kaqi kaaqoo maqusa quqasee nianai fufanoo Yooseefaafa narí ainainasaa rakisi maru faiqina aiqeenoo qinau. Anee kai kaqi misa ninaaqianna fua fidana oonu misa rafaaqafusee maaqi qimasee qimannimia. Innee naqi fee ifaqee qinee amiqimma nimaqaunnana akiiqara mandaikamma qimaqee fee. Miqi qimasee qimannimia. 5 Nanaree innee qini uriqararana kaafa qummuari fee, mifa minaki kai nammari neemarina. Mifa minaki afunee qafeemari kaafana qummuariafanoo, innee manda ainaina uqanna auqaafanoo fee qia.

6 Miqi qimasoofanoo mina ainainira faiqi fannoo iriseenoo nifaqee finau. Misa oonu paquri mandeenoo Yooseefaana ufa kai misa qimanniminau. 7 Qimannimisoofaqa misa qiqau. Oo uriqararafa maasa ani ufa oosanara randaidaqa. Sia uqanna maasaki maaqira manda oosana maridanoo. 8 Maasa ooqai indaaru narana feefauriafanna munnimmafa maasa uqaki maruna mina maasa sia qumuariqa mina Kannaana maqusaindari mara maree kafaa muqu ani amiqa. Maasa miqi marunausa maridaqa naqi maseeqee ani uriqararana maaqakinaa siruaa faqa koora faqa maraanauree. 9 Anee maasa uqa kiaqa randasee qafa. Yana uqakifee mi ainainafa mariannoo fee doo mifa kai kuquannoo, maasa ani ainainira faiqi kamambi marianaura.

10 Yooseefaana ainainira fasiqa fannoo misa ufa iriseenoo qima niminau. Doo amana inni ufa mau kai fuanaura. Ya fasiqana uqaki fee marinafa mifa kai qini ainainira faiqi mariannoo. Innee aiqama nimaaqa fifaranoo.

11 Miqi qimasoofaqa misa kai kaqi nári uqauqa afiqu maqasaa quqasee idukiqau. 12 Yooseefaana ainainasaa rakisirafa indaaruqaanaindi naaree qafamaseenoo miqooqaraanaindiki miqoo qafamaseenoo kafa miqoo qaraanaindiki qafamaseenoo miqi kai mamaree aiqamausa uqakiaqa amiqimmasee qafanoo finau. Miqi mamareenoo misa ninaaqiannaana Beensammina uqaki qafoofanoo kaafa minaki marinau. 13 Beensaminnana uqaki paquri masoofaqa mina afasausa mara aiqamausa nimuqusufaqa nári qamunna aiqamausa rakeekaa iqau. Miqooqari nári ainaina doonkisaa quqasee oonu quandakufaqa maqusai aniqau.

14 Yudafa narí auna akaqa faqa Yooseefaana maaqai oonuree qafoofanoo Yooseefaafa kaqi maaqaki marinau. Marufaqa misa anireeqa noorindari maqasaa aqufiqau. 15 Aqufuma fufanoo Yooseefaafa qinau. Innee naqi fee ifee. Innee sia fee iridee, qinee maaqira uriqararausa qeeqa afuneennoo inni ummuarirana paquriranara, sia fee irifee.

16 Miqi qimasoofanoo Yudafa qinau. Oo uriqararafa maasa nana ufa fee ani qimamianauree. Maasa naqi mandee fee maasa qeeqa andeeqaranara qianauree. Anee maasa kikiqa qusimariannana naqimmasee fee qaoo qianauree. Anutufa maasa aaqarana koorooinoo. Sia kaafa maraifa kai ani ainainira faiqi mariannoo, maasa aiqamausa ani ainainira faiqi marianaura.

17 Miqi qimasoofanoo Yooseefaafa nariqa qimanniminoo qinau. Oo sia uqanna qinee miqianauranoo. Kaafa maraifa kai qini ainainira faiqi kiannoo. Innee akaqausa nimaaqa ooruree ineeqa nikoona qimamiaqa.

18 Yudafa Yooseefaafa maruqoo oorureenoo qimaminoo qinau. Oo uriqararafa, anee qiniara eedoo qinaqa ani faqa qifaaqa quqasee ufa qia. Anee sia qiniara aanoo qia. Anee Faraoona miqirafa mariananoo, uriqararafa mariananoo. 19 Oo uriqararafa, ooqai maasa umuraafanana anee maasa iramirinana inni nikoofa maridanoo fee inni nikaqa maridanoo fee qinau. 20 Miqi qunaqa maasa maaqi qimasee aninna qimamiqiafana. Maasa qikoofa asooqa maridanoo. Maasa qikaqa faqa maridanoo. Mifa asooqa namuki mi faiqina maqeenoo. Mi faiqina afasaafa kuqufufanoo naríara marifanoo maasa qikoofa kaaqa minara amuqusidanoo.

21 Maasa miqi qimasee indaaru ani qimamiqiafana. Uriqararafa anee maasara afiqee muqusaifaqa qafaanee qinau. 22 Miqi qunaqa maasa maaqi qimasee aninna qimamiqiafana. Oo mi faiqifa sia amana narí akoona quqaannoo. Mina faiqi fannoo miqinanoo mina akoofa kuquannoo fee qiqiafana. 23 Maasa miqi qimasee ani qimamiafana anee maaqi qinau. Innee inneeqa nikaqa sia afiqee qumiqa sia qini qifusaa anifaranoo fee qinau. 24 Maasa ani ufa iriseeqa qeeqa qikoo finnai oonuree anee qunna ufana qimamiqiafana.

25 Qimamiseeqa mariafananoo maasa qikoofa maasara kaifaa ooqu narana feefauriaqee qiqau. 26 Miqi qufaqa maasa maaqi qimasee narí qimamiqiafana. Maasa qikaqa ooqu finaqa maasa ooqu fuanaura. Sia maasa qeeqaraa uriqararana afusaa ooqu fuanaura.

27 Miqi qufanoo maasa qikoofa maaqi qimasee maasa qima qiminau. Innee irimmariafanoo qini qinaaqa Raseera nammarifa qini faiqi qaaraqanda kai maqanau. 28 Moo fannoo fifufaqa qinee minara kaasau aandau fannoo qini faiqi arusee rakeekaamma namaseefoo qiqiafana. Mi fasannai sia kafaa mina qafeeqa. Doo mifa taikafinau. 29 Innee maana qinee unnannaindaraana afiqee fifanoo moo ainaina mina afaaqai kambiqainaqa qini minara qimudaoo qirafa asooqa marunnaqoo qini daruannoo fee qinau.

30 Yudafa Yooseefaana kaifaa qimamidanoo qinau. Maasa qeeqa qikaqa quqaseeqa oonuraananoo maasa qikoofa maasa qiqafamaseenoo doo narí faiqiara amuqusinanoo kuquannoo. 31 Maasa qikoona amuqusirafa firaaqoo maa faiqinaki maridanoo. Mifa asooqa uqanna maridanoo maasa maaqaamma saananoo mi ummaarafa mina kuqa aruannoo. 32 Qinee qeeqa qikoona maaqi qimasee qimami qiafana. Qinee qeeqa qikaqa akiiqara ummaara maraanauree qiqiafana. Qinee sia mina afiqee uriqa ani nifairira ufa qinee maraanauranoo fee qiqiafana.

33 Miqi qimasee qinee qeeqa qikoona qimamiqiafana. Maqee qinee qeeqa qikaqa amaaqa maqeeqa ani ainainira faiqi kiananoo qini qikaqa fannoo narí afasausa faqa ooru fuannoo. 34 Qinee naqimmasee fee maa faiqifa sia qini faqa ooru finaqa qeeqaraa qeeqa qikoo finnai ooru fuanauree. Qini qikoofa manda ummaara marainaqa qafaananoo sia amiqiannoo, mandaikammiannoo.