1 Yooseefaana aundura dapikufanoo narí ainainira fasiqauqa nifusaa ikiraqararusia minnisee sia amanaikufanoo niqi qamasoofaqa madaanai fiqau. Fifufanoo Yooseefaafa narí ainaina faqa kai maridanoo qimanniminau. Qinee inni nikaqa Yooseefaasa maridaqa. 2 Yooseefaafa firaaqoo iki raqaida qufaqa Isipa maqannaasa madaanai maridaqa iriseeqa oonu Faraoona qimamiqau.

3 Yooseefaafa narí afasausa mara maaqi qimasee qimanniminau. Qinee maana Yooseefaasa maridaa. Kuqaa fee qini qikoofa kaqi fee maridanoo fee. Miqi qufaqa mina afasausa mara tautu maseeqa naaquqoofaqa sia ufa qiqau. 4 Yooseefaafa kafaa qimanniminoo qinau. Doo innee qini daaqa aniaqee qufaqa misa mina aaqa aniroofanoo kafaa qimanniminoo qinau. Qinee inni nikaqa mariafanaqa innee feefauruara mamaree qini quqasoofaqa qini qifiqamaree Isipa maqa maaqaki ainainira faiqi kamma qisaqau. 5 Doo maqee innee sia qini qimu oosannara inneeqa kikiqusifanoo nimuqusiani. Anutufa kai qini diiqoofaqa innee kuqi foora indaarunni kamma nimaqasee inni dadaaqianeera qufaqa qumiqiafana. 6 Firaa aandaroo narirafa maa maqanasaa qaara aukuana marasee aiqaraifanoo moodaannai qisauku aukuana kaqi maridanoo. Mi kamuqoo fuka narana ummaqirafa faqa unakirafa faqa sia mariannoo. 7 Anutufa kai qini mareeqee inni indaarunni kamma saifaqa inni asumu marasainaqa sia kuquaqeera, mi mookira oosannananai kuqaa mifa inni faqa inni niku nisauku faqa marasainaqa asumu marifaranoo.

8 Minara sia innee fau qini diiqoofaqau maa maqa maaqanaki ani maridaqau. Anutufa diiqoofaqa ani maridaqa. Mifa kai qini mareeqee Faraoona oofisaauqa uriqarausaikamma qaifaqa maridaqa. Miqimmasaifaqa qinee mina aiqama maqa maaqasaa rakisirausa maridaqa. Aiqama Isipa maqa maaqasaa rakisirausa maridaqa. 9 Innee kai kaqi qini qikoo finnai ooruree ani amaaku Yooseefaafa maaqi qinoofee qimasee qimamiaqa. Anutufa qini mareeqeenoo aiqama Isipa maqa maaqasaa rakisira faika maqaifaqa maridaqa. Sia kisaaqasaa maria, kai kaqi qinee unnannai qumua. 10 Anee faqa aneenna faiqi namu faqa aneenna anaiqi mara faqa inneeqa sipsipa faqa inneeqa mimmiuqa faqa inneeqa burimakau faqa inneeqa aiqama ainaina faqa indaa mamaree qumuraifaqa Kooseena maqa nimianaqa qini daaqa mariaqa. 11 Innee Kooseena maqa maaqaki innisaa rakisianaura. Moodaannai qisauku aukuana kaqi maridanoo, mi aukuana namunaki aandaroo ida mariannoo. Innee faqa ineeqa faiqí anaasee faqa inneeqa aandauqa faqa naararaina kuqifoora qikooqaidanoo.

12 Yooseefaafa kaifaa narí afasausa mara qima nimidanoo qinau. Innee nifu maqasee qini qiqafaaqa sia moosau maridau qinee Yooseefaasa uqanna maridaqa. Doo qini qikaqa Beensaminnafa mifa faqa qini qiqafaani. 13 Qinee Isipa maqasaa firaaqoo uriqararausa marunnanara qini qikoona qimamiaqa. Aiqama ainaina qafaanara faqa qimamiaqa. Qimamiseeqa doo dauni dauni afiqee mai qumuaqa.

14 Miqi qimaseenoo narí akaqa Beensaminna oonu mafi anukaki difaa difaamma qumareenoo iki raqoofanoo Beensaminnafa faqa iki raqanau. 15 Yooseefafa quandaku fanoo narí afasausa mara aiqamausa nimooqaseenoo naiki raqanau. Naiki raqasoofaqa mina afasausa mara mina faqa ufa qiqau.

16 Isipa maqannaasa misa miqi unara oonu Faraoona qimamisoofanoo Faraoofa faqa mina uriqararausa faqa iriseeqa asasammiqau. 17 Faraoofa Yooseefaana maaqi qimasee qimaminoo qinau. Anee maaqi qimasee aneenna afasausa qimanniminaqa nári ummaara doonkisaa mara quqasaifaqa maree Kannaana maqusai ooru fuaqa. 18 Miqoo oorureeqa nári nikoona faqa nári faiqi anaasee faqa nifiqee mai qumuaqa. Qumuraifaqa Isipa maqa maaqaki qafamasee amiqira maqa nimianaqa miqoo narana fiqaranoo moomoo marinaqa marifaranoo.

19 Faraoofa kafaa Yooseefaana qimaminau. Anee qinee ufa qunnana qimanniminaqa Isipa maqusaindaraa qoosa rarisee mari karausa faqa daraiwaa faqa mara maree ooru fuaqa. Minakina nári ninaaqmaaka faqa nári faiqi aanaaqiuqa faqa nári nikoona faqa mara quqasai ooqu marifiqa qumuaqa. 20 Misa sia nári umiasana aina mafi quqasee quminnanara oonu mafi iriaqa. Isipa maqa maaqa amiqirafa aiqama misaindikammiannoo.

21 Yakooboona amaaku mara Faraoofa qimannimundee kai iqau. Yooseefaafa Faraoona ufa iriseenoo qoosa rarisee maru karausa mara quqasoofaqa daraiwaa namu faqa aatata neefandinna narana faqa nimufaqa maree ooru fiqau. 22 Yooseefaafa narí afasausa mara qamunna moodaa kai moodaa kai nimana nimana kai niminau. Beensaminna moodaanai qisauku qamunna faqa siruaa munnimma 300 faqa aminau. 23 Yooseefaafa Isipa maqannaa amiqira ainaina suquseenoo qisauku qara taikasee doonkisaa oorufusasaa amaqoofaqa mara maree muru mina akoona amiqau. Kafaa aatata qumidanoo naaninna narana sakumana faqa feemu faqa narana oosana oosana faqa anaasee doonki qisauku qara taikaseesaa oorufusasaa quqasoofaqa maree ooru fiqau. 24 Yooseefaafa narí afasausa mara Kannaana maqusai niiqamasoofaqa fufanoo qima niminoo qinau. Innee aatata fidaqa sia qiniara qimasaida narí aqi narí aqiqa fuaqa.

25 Misa Isipa maqa maaqa quqasee nimaaqa nári nikoofa Yakooboofa marunnai Kannaana maqa maaqai ooru fiqau. 26 Ooruree nári nikoona qimamiqau. Yooseefaafa sia kuqinoo kaqi maridanoo, misa miqi qimasee nári nikoona qimamiqau. Mifa Isipa maqannaa aiqamausa uriqarafa maridanoo fee qiqau. Yakooboofa mi ufana irufanoo amuqusa kaqinnaindari ufanoo misa ufara sia kuqaa fee qinau. 27 Yooseefaafa qimannimu ufausa nári nikoona qimami marufanoo Yakooboofa qafoofanoo qoosa rarisee maru karausa Yooseefaafa quqasoosa Yakooboona afiqee Isipa maqa maaqai ooqu firara ururaqau. Yakooboofa mi karausa qafoofanoo aundura idukinau. 28 Idukufanoo qinau. Qini qimaaku Yooseefaafa kaqi maridanoo. (Qinee kaqi maridaqa ooqu mina qafarafa mifa kai aiqama ainaina arusee uriqararafa maridanoo.) Qinee ooqu mina qafamasee kuquanauree qinau.