9
Yisufa innaamunaindari afu qimbarana afu maqaisoo ufafa.
Yisufa aatata fidanoo moo fasiqa mina anoofa innaamunai afu dimbarana maqaqoona qafanau.
(Mi aukuanna nifu niku mandaikirausauqa mai mariandee sia amana ainainamasee naaqaa imariqau. Faasaana kaqi marida narana feefaurira munnimmara ireemarufaqa nimimarufaqa marasaida neemariqau misa nuqu iramasaida neemariasee qiqau.)
Yisuna faiqinamu mi afu qimbarana qafamasee Yisuna irammiriqa qiqau. Oo ufasaa rakisirafa maa fasiqafa yana mandainainasaa fee maaqinoo afu dimbanoo maridanoo fee. Narí akoona anoona mandainainasaa fee narindisaa fee miqinoo maridanoo fee.
Yisufa iriseenoo qimanniminoo qinau. Sia narí anoona akoonasaa qaraanau, sia narindisaafau afu dimbanoo maridanoofau. Anutuna afeeka kasirana qinikiqari kooroo ianifeera mina afu dimbanoo maridanoo. Qini diqiqoofa qini qimiqoo ainainirana sia amana asukunaki auqaanaura maasa faasaana auqaanaura. Doo kaqikaaqoo eendinaqa sia miqoo faiqí moo fannoo auqaannoo. Qinee maa maqa maaqanaki maridaqa misa qooma maridaqa, kaaqa qamannimaqaanaura.
Miqi qimasee Yisufa maqasaa aqaara fidaquseenoo asaukukoo doonaikamaseenoo afu dimbara fasiqa afusaa akuseenoo qimaminoo qinau. Doo fua. Doo oonu Sirooamma farummaki aneenna oori afuakai ruquannee qinau. Sirooamma farumma auqu oosana niqiqamaqai farumma fee qinoo marinau. Mi afu qimbara fasiqafa eedoo qimasee oonu narí oori afuakai ruqufanoo afu aiqamaqara amiqimasee qoofanoo oonu quandakufanoo sandee kafaa aninau.
Mi fasiqana aqoonausa mina qafamasee moomoosa mina qafeemarusa mina qafamasee qiqau. Maa fasiqafa maaqoo maridanoo narana munnimmara ireemari fasiqa fee mifee.
Akaqausa doo mifa kai fee qiqau, akaqausa moo fannoo mina fooqaa fee qiqau. Mi fasiqafa narí irisee qinau. Qinee qifu dimbarausa maaqoo marunausa maridaqa.
10 Misa mina iriseeqa iraqau. Naqimasee afu maqeenee qufanoo mifa qinau.
11 Faiqí moo mina auqu Yisufa qaqaara fidiseenoo doonaikamaseenoo qini qifuki akuseenoo doo fua Sirooamma farummaki oori nammari uqua qufaqa miqi qifaqa nammari uqusaunanoo doo qifu maqeenoo.
12 Miqi qimaasoofaqa misa qiqau. Miqimasaifa yai fee finoo fee qufanoo mifa sia qinee irida fee qinau.
Farisai amaana qimarusa Yisufa afu qimbarana afu maqaisoonara randoo ufafa.
13 Miqi qimasoofaqa misa mi fasiqana afiqeeqa Farisai amaana ufa qimarusa uqannifiqanau. 14 Mi faasaanna Yisufa mi fasiqana afu maqoo faasaana misa amaana Saririqa marunara Farisai amaana ufa qimarusa marunnai afiqee fiqau. 15 Farisai amaana ufa qimarusa mi fasiqana afu maqoonara iroofanoo qinau. Mifa doona qini qifusaa akusaifaqa doori nammari uqunanoo qifu maqeenoo.
16 Farisai amaana ufa qimariasa akaqausa Yisunara maaqi qiqau. Maa fasiqana afu maqaifa sia Anutunaindarifau amaanasaa ainainimarifa manda fasiqa maridanoo. Akaqausa mina iriseeqa qiqau. Naqimasee mandainaina maree marinafa maa firaa ainainna amiqira ainaina auqararee sia amana fee qimasee mi ufanannai rainaqau.
17 Miqi qimasee Farisai amaana ufa qimarusa afu dimbarana irammiriqa qiqau. Anee mi fasiqana ani afu maqainaree qidanee. Anee minara nana ufee qidanee. Afu dimbarafa mina iriseenoo qinau. Mifa Anutuna tamummaqara fasiqa maridanoo fee qinau.
18-20 Yuda maqannaasa uriqararausa mina iriseeqa maaqi qiqau. Maana sia afu dimbarafau moo fasiqa maridanoo qimaseeqa misa mina anoona akoona naaramasee irammiriqa qiqau. Maa fasiqafa inniqara faiqi fee. Kuqaa fee anee mina maqoonna kari afu dimbaranee maqanau. Naqimasee maqee afu maqeenoo fee qufaqa mina anoofa akoofa uriqararausa amaana maqaki keeqeemariana qaoo qimaqiseefoo qimasee rufieeqa qimannimiqa qiqau. Maa fasiqafa maasa qimaaku maridanoo maasa minara iridaqa. Ooqai aanaaqisaa innaamunai miqirana maqaafanafa maridanoo maasa minara faqa iridaqa. 21 Mina afu maqainara yafasiqa fee mina afu maqeenoo fee siamma iridaqa faiqí maridanoo irammirifanoo qimannimiannoo. 22 Yuda maqannaa uriqararausa Yisunara faasa maaqi qimariqau. Faiqí moo fannoo Yisunara Anutuna asauku mundira fee qinnana maasa amaana maqakiqari aqiqaananoo raudamaki aqoosai finoo sia kaifaa keeqaannoo. 23 Mi ufanara afu dimbarana anoofa akoofa doo faiqimmifoo narí iraaqee qiqau. Misara rufiasee miqi qiqau.
24 Yuda maqannaa uriqararausa mina iriseeqa afu dimbarana kafaa aaramasee qiqau. Anee Anutuna afusaa kuqaa anoona ufa kai maasa qimannimia. Ani afu maqaifa mifa mandainaina maree marifa maridanoo.
25 Afu dimbarafa mina iriseenoo qimanniminau. Mi fasiqafa mandainaina maree mari fee sia qinee mina oosana iridaqa. Moodaa ainainara kai qinee iridaqa qinee qifu dimbarausa mariafanausa maqee qini qifu maqee marifaqa maridaqa minara kai qinee amiqimasee iridaqa.
26 Misa mina iriseeqa kaifaa irammiriqa qiqau. Mi fasiqafa nana ainainee auqu amifanoo ani afu maqeenoo fee.
27 Afu qimbarafa niqinoo qinau. Doo faasai qimannimisaunaqa sia irimariafanoo. Nanaree innee kaifaa qiana irifaree innee faqee mina faiqinamukifaree.
28 Misa mina iriseeqa aanoomasee mina aqiqa qiqau. Anee mi fasiqana ufa irimarianafa mariananoo. Maasa Mooseena ufa irimarunausa maridaqa. 29 Anutufa Mooseenannai maasa qimaqimufaqa maasa iridaqa. Mi fasiqafa Yisunara maasa sia mina oosanara iridaqa.
30 Afu dimbarafa mina iriseenoo niqinoo qinau. Innee moo irirana maree mariafanoo mifa qini qifu maqaqisaifaqa innee nanaree mi fasiqanara yaindari fee anidanoo fee qidee. 31 Anutufa sia manda oosana maree mariasa dadaaqidanoo. Faiqí anaasee minara rimariasa mina ufa irimariasa misa kai Anutufa dadaaqidanoo. 32 Ooqai oosana aroo aukuannasaaqari sia faiqí moo fannoo afu dimbarana nifu maqannisanau, maqee kai. 33 Maa fasiqafa sia Anutufinaindari aninaqau naqimandee maa firaa ainainna auqararee, siamma amanaikiannoo.
34 Yuda maqannaa uriqararausa mina iriseeqa qimamiqa qiqau. Anee mandainainaki kambiqoonafa mandoosanaki findifuanafa doo see fifuannee qimaseeqa misa amaana maqakiqari aqiqoofanoo raudamaki finau, sia kafaa anianifeera doo ateekaqau.
Faiqí naundura nifu qimbaranara Yisufa qimaqoo ufafa.
35 Misa afu qimbarana aqiqoonara Yisufa iriseenoo paqurimasee irammirinau. Anee faiqí nimaakuara Anutuna asauku mundira fee fee qidanee minasaa irirana rusidanee.
36 Mi fasiqafa Yisuna sia qafoofa maridanoo maaqi qinau. Doo mina uqaqifiqainaqa minara anoonee qimasee minasaa atooqaanaura.
37 Yisufa qinau doo anee qafaananoo doo mina faqa ufa qimariananoo.
38 Mi fasiqafa mina iriseenoo qinau. Oo Karaambaiqa aniara kuqaa Anutuna amaaku fee qidaqa qeeqa qimuqusa irirana aniki rusidaqa qimuqusannoo ani amooqimamaqaidaqa. Miqi qimaseenoo mi fasiqafa Yisuna oorinni maqasaa kummaramafinoo amooqinau.
39 Yisufa mina qafamasee miqoo marusa qimanniminoo qinau. Qinee maa maqanasaaqarasaa rainannimaqarara qumuafanausa maridaqa. Qinee nifu dimbarausa maqaaneera qumuafanausa nifu maqarausa dimbaaneera qumuafanausa maridaqa.
40 Farisai amaana ufa irimarusa miqoo marusa mina iriseeqa iramiriqa qiqau anee maasara faqee nifu dimbarausee qidanee. 41 Yisufa qinau. Inni nifu dimbanoo marinaqau inni numoo sia marini innee unna qimasee maasa qifu kaqi marifaqee qimarianara inni numoo kaqi maridanoo nifu dimbarausara foora mariafanoo.