(Yuda maqannaasa firi maru aandaufa sipsipa marinau. Misa akaqana arusaida neemarufa marinau. Moomoo rakisidaqa asausi aukusaidaqa minannai qamunnaina auqimariqau. Sipsipa reendeenimarufa sia aanoo imarufa marinau. Anee mina asausi aukidanee mina kuqarinanoo fee sia ufa qiannoo kaqi muqurinoo mariannoo. Mi aukuanna sipsipasaa rakisimarufa nifunni fufaqa aiqama sipsipa mina afaqee fiqau. Isaraee maqannaasa sipsipa kaqi miqidaqa. Misasaa rakisimarifa indaaru fifaqa sipsipauqa mina aanaaqianna fidaqa.

Sipsipasaa rakisirafa ooni moomoo marasee aaku aaku maseenoo ququsa auqusee eendaki sipsipa minaki quqasee kooqisaa narí faiqaidanoo. Kaasau faini fee qummuarimari fasiqa fee arunaandoora rakisidanoo. Sipsipa nikoofa nuqu ramaqaisa kai maridaqa. Kananaana findifinoo nuqu raifaqa kai anireeqa andandara randaidaqa.

Sipsipa rakisimariasa nári sipsipara ridaqa rakisidaqa nári sipsipasaara kuqifaranoo. Sipsipauqa faqa nári rakisimariasa ufa iridaqa minara ridaqa. Akaqausa moodaanaki ooni ququsa auqusee minaki nári sipsipa aiqama eendaki quqasaafanoo faiqí moo fannoo kooqisaa rakisidanoo. Kananaana iqaqaifanoo sipsipasaa rakisirafa moo fannoo aniraifanoo kooqisaa rakisirafa atuasaifanoo sipsipa akoofa narí sipsipa nuqu ramasaifaqa narí sipsipauqa kai iriqa raudamaki andanda narara fidaqa.)

1 Yisufa kafaa miqooqaraasaa qimannimidanoo sipsipara qinoo faiqiara qinau. Qinee anoona ufa qimannimidaqa. Faiqí moo fannoo sia sipsipa ququsa kooqiki keeqeemarifa kaqinaindari ququsasaa akareemarifa mifa qummuarimari fasiqafa mariannoo. 2 Sipsipa kooqiki keeqee marifa mifa sipsipasaa rakisimarifa maridanoo. 3 Sipsipa nikoofa moo fannoo anirainanoo kooqisaa rakisirafa kooqi atuasaifanoo sipsipa akoofa narí sipsipa nuqu ramasee naarainaqa mina ufa iriseeqa raudamaki narí faqa nifiqainaqa andanda narara fifaranoo. 4 Sipsipauqa nári rakisimarina ufa iriqa raudee qumuraifanoo mifa indaaru fifaqa misa mina aanaaqianna fidaqa. 5 Sipsipa sia moo fasiqa afaqee fifaranoo mina ufa irisee moo fannoo fee qimasee sandeefaranoo.

6 Yisufa mi quandara ufana qimannimufaqa siamma iriqau.

7 Minara iriseenoo kafaa kooroomasee qimanniminoo qinau. Qinee kuqaa anoona ufa qimannimidaqa qinee qeeqa kai sipsipa kooqi maridaqa. 8 Ooqai qini doorini indaaru anusa qummuari maru fasiqausa kai animariqau. Sipsipauqa sia misa ufa iriqau. 9 Qinee Anutuna ququsa kooqi maridaqa yafasiqa aanaaseefee kooqisaarafoo qinisaa keeqee marinafa Anutufa mi fasiqanaaseesa kuqiranakinaana marasee innaaruna asumu mariranaki quqaannoo. Mi fasiqanaaseesa Anutuna ququsaki sipsipara foora keeqee raudeeida narana neemarifaranoo. 10 Qummuarimari fasiqafa qummuaramasaina taikaanifeera fifau faafau qummuarianifeera faqa kuqannaruanifeera faqa kuridi nimaqaanifeera faqa aniannoo. Qinee faiqí anaasee asumu marirana nimianeera anidaqa. Sia kaqi dapi mariranarau qidau. Asumu marirana amiqirana moo faqa moo faqa rairaairana nimirara mina kai nimiraree qimasee qumidaqa.

11 Qinee sipsipasaa amiqimasee rakisimarunausa maridaqa. Sipsipasaa amiqimasee rakisimarifa narí sipsipasaara kuquannoo. 12 Feefauruara ainainimarifa sia miqiannoo kaasau faini anirainanoo rufiasee sandaannoo. Sandamafinanoo kaasau faini anireenoo sipsipa qumarainaqa daraanifaranoo. 13 Feefauruara ainainimarifa sia sipsipara amuqusiannoo feefauruara kai rakisidanoo. 14 Qinee sipsipasaa amiqira rakisirausa maridaqa. Qini qikoofa qiniara iridanoo. Qinee miqi kai iqa qeeqa qikoonara faqa iridaqa. 15 Miqi kai iqa qeeqa sipsipara iridaqa misa faqa qiniara faqa iridaqa. Qinee qeeqa sipsipasaara amana kuquanauree qidaqa. 16 Sia maaqooqaraasa kai qini ququsaki mariaqeera. Qini ququsa fannoo moomoo maqusanaasaki faqa maridanoo. Minakinaasauqa faqa nifiqa quqaanaura. Misa faqa qini ufa irisee eedoo qifaranoo. Miqoo moodaanaki marifaranoo moodaa rakisirafa misasaa mariannoo.

17 Qeeqa sipsipara qimuqusina qeeqa marirana misa nimaaqa maqaseeqa kuqirinaki quqasee kaifaa qeeqa marirana minakiqari maraanaura. Qinee miqiraree qunnanara qini qikoofa qiniara ridanoo asasidanoo. 18 Sia moo fannoo narí afeekannai qini marirana maraannoo. Qinee qeeqakai qeeqaraa irisee qeeqa marirana kuqiranaki quqaanaura. Qini qikoofa qinaqa qeeqa marirana kuqiranaki quqararee qimasee quqaanaura. Quqasee kafaa marararee qimasee maraanauranoo. Qini qikoofa miqi qimasee ufa qimaqimifaqa iridaqa.

19-20 Yuda maqannaasa miqooqaraasa Yisuna mi ufana iriseeqa rainafufaqa akaqausa qiqau. Maa fasiqana audurai afaanna maridanoo, marifanoo dapi dapi ufa qidanoo, nanaree innee mina ufa iridee.

21 Miqi qimasoofaqa akaqausa misa qimannimiqa qiqau. Akasaa afaanna aunduraki marinafa sia maa fasiqafa indeemasee ufa qiannoo. Afaanna fannoo amanee afu dimbarana maqaiseenoo fee sia amanaikiannoo.

22 Mookari Yuda maqannaasa Yeerusaree maqusai suqufufaqa amaana maqara qoomaqammasaida neemariqau. (Ooqai namuqaa amaana maqaki mini madaapee quqasoofaqa mina anukamaquseeqa doo miqooqari aukuana aukuana anukara qoomaqaqee qimasaida sakasaida neemariqau.) Suara aukuana mi qoomaqana imariqau Yeerusaree maqusai. 23-24 Yisufa Yeerusaree maqusai oorureenoo amaana maqa atisaa tida auquqoonasaa aakuara rufiasee minaki nimarinau. (Faiqí anaasee moomoo aaku suarara rufiaseeqa minaki kai mariqau.) Amaana maqa atimau tidasaa kisaaqa firaaqoo marinau. Yisufa Sooroomoona amarana maaqa atimau tidasaa nimarufaqa Yuda maqannaa uriqararausa ititaseeqa irammiriqa qiqau. Anee sia quandaqaandia, amiqimandee akooroomasee maasa qimaqimia, kuqaa fee Anutuna asauku mundira fee maridanee.

25 Yisufa maaqi qimasee qimanniminau. Doo qimannimuna siamma irimariafanoo. Qinee moomoo qeeqa qikoofinaindaraa ainaina auquseeqa minannoo inni uqannifiqaunausa maridaqa. 26 Innee sia qinee firimarunna aandau sipsipauqau mariafanoofau minara sia qiniara anoonee qimariafanoo. 27 Qini sipsipauqa qini ufa iridaqa qinee misara faqa iridaqa, misa minara aiqama qini faqa fidaqa. 28 Qinee naaru naaru marirana nimidaqa sia kuqifaranoo. Sia amana moo fannoo qini qisaukukinaana rafieefaranoo. 29 Qini qikoofa qini sipsipauqa qimufa aiqamausa uriqararafa maridanoo, sia moo fannoo mina asaukukinaana rafieefaranoo. 30 Qini qikoofa faqa qinee faqa moodaa marunnanara sia amana rafieefaranoo.

31 Yuda maqannaasa mi ufana iriseeqa aanoomasee oonisamu qumaree Yisuna arirarufanoo qinau. 32 Qinee moomoo amiqira ainaina auqaidaqa qini qikoofa qimu ainaina auqaidaqa innee nana amiqira ainainara irisee fee minasaara oonisamu qini darirara qidee.

33 Yuda maqannaa uriqararausa mina iriseeqa kafaa aranaiqi qimamiqa qiqau. Sia amiqira dadaaqira ainaina auqaananarau ariraridau. Aneenaraa Anutuna mandaikammamaqaidana anee aneennaraa maqasaa fasiqa marianafa anee Anutufaikina mariannanara ariraridaqa.

34 Yisufa mina iriseenoo qinau. Inni sandufa akaraki Anutufa qinau. Innee faiqí faiqi Anutunaikammida mariafanoo. 35 Sandufa andeeqanoo maridanoo naaru naaru sia aaqee mariafanoo, innisaimbaqa minara iridaqa. Anutufa narí ufa misasaa quqaseenoo misara Anutu fee qinau. 36 Anutufa qini maraseenoo maa maqa maaqanaki diqiqamaqoonaki maridaqa. Qinee qeeqaraa Anutuna amaaku fee qunnanara naqimasee fee minannai Anutuna mandaikamma amaqaanauree sia amanaikiannoo. 37 Qinee qini qikoofa auqamaqai ainaina auqaanaqa qafamasee kuqaa anoonammifoo qiaqaana. Qini qikoofa sia auqamaqai ainainna auqaanaqa qafamasee unnammifoo qiaqaana. 38 Innee qeeqaraa ufa qunnanara unna fee qimasaida qinee faiqí sia auqaaqaa ira ainainna auqaanaqa qafamasee qiniara kuqaa anoona fee qimasee kuqaa mina akoofa minaki marinara miqidanoo fee qiaqaana kaifaa mifa faqa nariki marinara miqidanoo fee qiaqaana.

39 Yisufa miqi qimasoofaqa misa qumaraaneerufanoo kaqimbinau.

40 Yisufa Yooradanna nammarinni ooqureenoo ooqitaqa mareenoo ooqai Yoohaneefa maridanoo nammari nimiuqoo miqoo ooqu marinau. 41 Faiqí anaasee moomoosa suqufufaqa Yisufa maruqoo maridaqa narí qimami narí qimami maaqi qiqau. Yoohaneefa nammari nimimarufa sia moo ainaina firaa ainaina auqanau. Yoohaneefa maa fasiqanara qufa doo aiqamainaina anoonaikidanoo. 42 Miqoo faiqí anaasee moomoosa Yisunara kuqaa Anutuna faiqi fee qimasee mina saqarikiqau.