1 Yisufa miqi qimaseenoo aiqama qimanniminoo qinau. Innee sia nimukee marinaqa maparaaiaqa. Innee Anutuna saqariki mariafanoo doo qini faqa saqarikiaqa. 2 Qini qikoona innaaruna maqusaki moomoo maqa narí aaqa narí aaqa maridanoo. Qinee maindari ooruree innee ooru fifandinna maqana auqirara ooru fidaqa. Minara qinee kuqaa anoona ufa kai inni qimannimidaqa. Sia anoona marinaqau sia qimannimunaiqini. Kuqaa anoona marifaqa qimannimidaqa. 3 Qinee innaarunai oorureeqa innee ooru fifandinna maqusana deedaqamasee qumu nifiqee minni murunnisaanaura. Innee qini faqa mariaqeera miqianaura. 4 Innee qinee marunnannai fimaria aanara irimariafanoo.

5 Toomasifa mi ufana iriseenoo qinau, Anee fimariannanara maasa sia iridaqa. Naqimasee fee mi aannara irianauree.

6 Yisufa iriseenoo maaqi qimaseenoo qimaminoo qinau, qinee mi aanausa maridaqa. Qinee kuqaa anoona ufa maridaqa. Naaru naaru marirafa qiniki maridanoo qinee misa maridaqa. Sia moo fannoo kaqi qini qikoofinnai fidanoo qinimau kai fifaranoo. 7 Innee qiniara irifau qini qikoonara faqa irini. Maqee mariaqooqari qini qikoonara iriqa qini qikoona qafee mariafanoo.

8 Firipifa mi ufana iriseenoo Yisuna qimaminoo qinau, Oo karaambaiqa aneenna akoona uqaqifiqainaqa qafamasee doo fee qianaura.

9 Yisufa mina iriseenoo akooqoofanoo raiqaseenoo qinau. Firipi qinee kisaaqasaa inni faqa mariafanausa marunana anee sia irirana irimariananoo. Yafasiqa anaasee fee qini qiqafainafa doo qini qikoona qafaidanoo. Anee nanaree qiniara aneenna akoona uqaqifiqaannee q inanee. 10 Firipi anee sia fee qini ufara anoonee qidanee. Qinee qipaqeenaki faqa maridaqa mifa qiniki faqa maridanoo sia fee anee mi ufana iridanee. Yisufa kafaa narí faiqi namu aiqama qimanniminoo qinau. Qinee inni ufa qimannimimarunafa sia qeeqa daundurakinaana qimannimidaqa. Qini qikoofa qiniki marifa narí irirana iriseenoo qifaqa narí qimau kai fidaqa qimannimidaqa. 11 Innee maa ufana irisee anoonee qiaqa. Qinee qeeqa qikoonaki maridaqa mifa qiniki faqa maridanoo. Innee qini ufara sia fee qimasee qinee auqaannainaina faiqí sia auqaaqaa ira ainaina nifunnoo qafamasee Anutufa mina faqa maridanoo fee qiaqa. 12 Qinee anoona ufa qimannimidaqa faiqí anaasee moo fannoo qini saqarikinafa qinee ianandee iannoo. Qinee qeeqa qikoofinnai fuannanara qini saqarikinafa sia qini daanna kai raannoo qini saika uraaqaranoo mariannoo. Mina oosana maaqimminoo maridanoo. 13 Innee innaaru qidaqa qini duqusaa qimasee innaaru qifaqa nimianaura. Sia moo ainaina sia nimianaura innaaru qifaqa nimianaura. Qini qikoona afaaqa areenarafa qinisaaqari faqa areenaanifeera nimianauura. 14 Innee qini duqusaa qimasee innaaru qifaqa qinee mi ainainna miqimannisaanauranoo.

15 Yisufa narí faiqi namu kaqi qimannimidanoo qinau. Innee qiniara riqa qinee qimannimiafannufana andeeqasee qumareefaranoo. Sia qiniara riqa sia qinee qiafannufana qumareefaranoo. 16 Qinee inni minnisee ooru fiqa qeeqa qikoona irammiriananoo Anutuna dadaaqira afeeka maraquna nimiannoo. Mifa kuqaa anoona ufa qiroosana maraquna qumu mariannoo, mi maraqunafa naaru naaru inni faqa mariannoo. 17 Maa maqanasaa mariasa sia qini Yisusa mandaaqee marinausa sia amana mi maraqunna mareefaranoo. Misa sia mina qafaidaqa sia minara irimariafanoo minara sia mareefaranoo. Mifa inni faqa mapukusee maridanoo kuqaa inni naundurai anoona mariannoo. Mifa inni faqa marifaqa innee mi maraqunna oosana irimariafanoo.

18 Qinee sia inni mininnisaanaura qinee oorureeqa Anutuna maraquna aqiqaananoo qumuree inni faqa marida dadaaqiannoo. 19 Kaqikaaqoo maa maqanasaaqaraa irirana faqaasa sia qini qiqafeefaranoo. Innee kai qini qiqafeefaranoo. Qinee kaqi marirausa maridaqa minara innee kaqi marirana mareefaranoo. 20 Qinee qeeqa qikoonaki maridaqa kafaa innee qiniki mariafanoo qinee inniki maridaqa. Anutuna maraquna qumuaninna faasaana mi faasaanna mi ufana oosana amiqimandee irifaranoo.

21 Yafasiqa anaasee fee qinee qimannimiafanna ufana irisee maree marifandinausa misa kai qiniara rifandinausa marifara. Qiniara rimarina fasiqa anaaseesara qini qikoofa misara faqa ruannoo qinee faqa mi fasiqa anaaseesara ruanaura qeeqaindi anoona afeeka uqannifiqaanaura.

22 Yudasina amarafa Yisuna irammirinoo qinau, Oo Karaambaiqa naqimaseenanee anee maasa qifusaa kai kooroo innaree maa maqa maaqanasaaqaraa irirana faqaasa nifusaa kukeeqararee qidanee.

23 Yisufa iriseenoo qinau. Yafasiqa anaasee fee qiniara rimarinafa qini ufa maree mari fasiqa anaaseefa mifa qiniara rimarifa mariannoo. Miqinna fasiqa anaaseena qini qikoofa Anutufa minara faqa ruannoo. Mifa faqa qinee faqa mi fasiqa anaaseesa innannai oonuree umee mina faqa marianaura, miqimaseeqa maasa inni nifusaa kai koorooianaura. Maqasaaqaraa irirana faqaasa nifusaa kukeeqaanaura. 24 Yafasiqa aanaaseesee sia qiniara rinausa misa qini ufa sia irifara. Qinee qimannimira ufa innee irimariafanoo, sia qinindi maridanoo, qini qikoofa qini diqiqamaqainaindi minaindi maridanoo.

25 Qinee maa ufausa inni faqa kaqi maridaqa qimannimidaqa. 26 Inni fuka dadaaqirafa naaquqara maraquna qini qikoofa kasooqaqee nimianinnafa mifa aiqama ainainara qimannimiannoo. Qinee faqa aiqama ufa qimannimiafannana mifa minara inni naaqoo auqainaqa oonumafi irifaranoo.

27 Qinee naundura asooarana inni nimidaqa. Qinee qiniki mari naundura asooarana inni nimidaqa. Maa maqanasaa mariasa sia misa naanna ramasee inni nimidau. Amiqimandee qeeqa asooarana nimianaura. Sia inni naundura rapikiani sia rufiaqa rufiaqiaqa. 28 Qinee maqee maaqooqari kafaa ooru fuanaura oorureeqa marikiqa oorurandee qumureeqa inni faqa marianaura. Sia qinee ooru fuannanara innee minara rufiaaqa. Innee kuqaa qiniara ridau qinee qeeqa qikoofinnai fuannanara susummaqimaqani. Qini qikoofa qini uriqararafa maridanoo minara susummaqimaqani. 29 Qinee maqee sia kambiqauna kamuqoo aiqama ainainara qimannimidaqa. Kambiqafinaqa innee qiniara iriaqeera qimannimidaqa. 30 Qinee sia amana inni faqa kisaaqasaa ufa qianaura. Maa maqanasaa rakisirafa Sadannafa doo anidanoo qini afeeka fannoo mina afeeka uraaqaranoo maridanoo. 31 Maa maqanasaaqaraasa qinee qeeqa qikoonara rimarunnana minara iriaqeera mina ufamau andeeqasee fidaqa qinee qeeqa kai irisee Sadanna asauku ameemaanai oonuree kuquanaura. Miqi qimaseenoo Yisufa narí faiqi namuara doo uqeeraifaqa maaqooqari moosaa fuanee qimasee uqeereenoo moosaa finau.