1 Yisufa fidanoo maa ufana narí faiqi namu qimanniminau. Qinee saunara foora qinee marunna saqarisa maridaqa. Qini qikoofa sauna saqamasaa rakisimarifa maridanoo. 2 Qini qikoofa Anutufa mi sauna saqarina sia irainanoo ateeka idaraannoo. Ireemari oosanna amiqimandee iraani fee qimasee anukamasaidanoo amiqimasee rakisidanoo. 3 Qinee qimannimimarunnufana innee irisee maraifanoo doo inni mandainaina rukannisaifaqa anukaraqoo mariafanoo. 4 Innee saqari asaanara foora qinisaa ariqa mariaqa. Innee sia qinisaa ariqa maridaqa sia qini amiqira marira nirana mareefaranoo.

5 Qinee saqari anoona maridaqa. Innee asaana miqirausa mariafanoo sia anoonasaa arufinafa sia sauna iraannoo. Qiniki marinausa qinee faqa misaki mariananoo saunara foora moomoo ireefaranoo. Innee inneeqaraa marinausa kudi marifaranoo qini faqa marinausa sauna amiqimasee ireemarifaranoo. Innee minara iriseeqa amiqimasee qinisaa atooqaifaqa qinee faqa inniki marianaura. 6 Faiqí moo fannoo sia qiniki marinafa sauna asaana miqirafa aadanusidanoo marinanoo saunasaa rakisimarifa asaana qafamasee aadanusinausa aiqama ateekasee suqeeqeenoo idaki aqusainanoo qamataikaannoo. 7 Innee qiniki marirara kai idaqa marifaqa qinee qimannimunna ufafa inniki marirara kai imarinaqa innee nana ainainaree qiniara iraifaqa nimianaura. 8 Innee andeeqara marirana qaqammara foora moomoo iraifanoo minannai qini qikoona amiqira afeeka eeraarira areenarana kooroomannimaqaannoo. Miqiuqanna iqa qini faiqinamuka mafifaranoo. 9 Qini qikoofa qiniara firaaqoo ridanoo qinee faqa miqikai iqa inniara firaa qoo ridaqa doo sia innee moo fannoo minakiqari aiaki fuaqa. Kaqi kai qini didiranaki mariaqa. 10 Innee qinee qimannimuna ufana irisee qumareeqa qini didiranaki marifaranoo. Qinee miqikaimasee qeeqa qikoona ufa iriseeqa qumareeqa mina aidiranaki maridaqa.

11 Qinee sia kaqi qimannimidaqa qini susuirafa inniki marianifeera inni susuirafa anoonaikianifeera qimannimidaqa. 12 Qinee ufa moo aaquqira ufa qimannianaura iriaqa Innee qini daanna ramasee nariara nariara ridaqa nidiani. 13 Faiqí moo fannoo narí aqoondi amaaqa maqasee kuqinna fasiqafa mina aidirafa aiqama nidirana arusee uriqaramaqaraasa uqanna inoo mariannoo. 14 Maqee maqee qini aaquqira ufa irisee mi mau fimariasa misa kai qini qiqoondiuqa maridaqa. 15 Qinee sia maaqooqari inniara qini ainainira faiqí fee qianaura. Rakisirafa narí fuaninnanara faqa auqaaninnanara faqa maraaninnanara faqa sia ainainira faiqiuqa qimannimidanoo miqimmianauree maaqimmianuree qidanoo narí kai. Ainainiaqee ufa kai qimannimidanoo. Qinee sia fifau saikira faiqi fee qidaqa inniara qini qiqoondi fee qimasaidaqa qinee qini qikoofa auqaaninna saika ufanara aiqama inni kooroomannimidaqa. 16 Sia innee qini rusandeesamumandee qini qumaraafanoo. Qinee naaree inniara rusandeesamumandee inni qumareeqa. Inni marirafa nirafa qini daanna ramasee mariaqeera qinindikiaqeera qimasee inni mareeqa. Mi marira oosanafa sia putaa iannoo afeeka kai mariannoo. Innee minara irisee nana sarauimari ainainaree qini qikoofinnai innaaru qimasee qini duqusaa innaaru qimasaifanoo nimiannoo. 17 Doo qeeqa aaquqira ufa maaqi qimasee qimannimidaqa. Innee nariara nariara ridaqa nidiaqa.

18 Maa maqanasaaqaraasa inniara fidiaqaammifaranoo maanara iriaqa indaaru qini Yisusara fidiaqaaiaasa mariafanoo innindi inaaqianna fidiaqaairafa mariannoo. 19 Innee qini faiqi namu maa maqa maaqanasaaqaraasa faqa moodaa irirana faqaasa marifaqau misa inniara maasaindi fee qimaseefau inniara rini. Qinee inni maa maqa maaqanakinaasa rusandeesamumasee qumaraqaunausa mariafaqa maqee sia misaindi marianara minara kaukaata qimannimaqaidaqa. 20 Maa ufana qimannimunnana kaifaa iriaqa ainainira fasiqa sia narí rakisirana uriqararafa maridanoo. Misa qini inni rakisirana dariqa quandaki inni faqa qini ufa irimariasa faqa narifaranoo, misa qini ufa iriqa quandaki inni ufa faqa irifaranoo. 21 Innee qinindi marianara oosana oosana mandainaina maa maqanasaaqaraasa inni nimifaranoo. Misa sia qini diqiqoonara Anutunara iridaqa miqifaranoo. 22 Qinee maa maqanasaaqaraasa mandainainara sia kooroomma nimaqaananoo fau sia misa manda numoo mariqini. Doo qinee misa mandoosanara kooroomasee misa qimannimiqauna iridaqa Anutuna narira ufa ameemaanai maridaqa sia amana unnufannai mina ititeefaranoo, narirafa kaqi naruannoo. 23 Faiqí moo fannoo qiniara fidiaqaammidanoo qini qikoonara faqa fidiaqaammidanoo. 24 Qinee misa nifusaa faiqí sia auqaaqaa ira ainaina auqaafannana sia maqasaa fasiqa moo fannoo mi ainainna auqoofanoo anoona kambiqanau. Qinee sia miqimaseeqa mi ainainna auqaananoofau misa numoo sia mariqini. Qinee oosana oosana ainaina auqaunaqa misa sia amiqimasee maaqanda qisakoosara irirai maaqandara fidiaqaamma qimaqaidaqa. 25 Mooseena sandufa ooqai misara akara rumaqoofa maridanoo. Mifa maaqi qimasee akara rinau.

Anutuna ufa miqinoo maridanoo naqimasee moosaa fifaree. Minara misa qiniara fidiaqaaidaqa.

26 Yisufa kaqi narí faiqi namu qimannimidanoo qinau. Qinee ooru fuananoo fuka dadaaqirafa qumuannoo. Mifa kuqaa anoona ufa qira oosana maraquna mariannoo qini qikoofinaindaraafa mariannoo. Qinee qeeqa qikoofinaindaraana aqiqaananoo qumureenoo mifa qiniara qimannimiannoo. 27 Mifa inni naakinaqa innee faqa qiniara ufa qifaranoo. Innee oosanakiqari qini faqa niniaasa maridaqa qiniara ufa qifaranoo.