1 Maana Sooroomoonnana aaquqira ufa maridanoo. Irirana faqaasa nári rukausa mara asasirana nimidaqa. Furufarirausa nári ninausa nisaurirana nimidaqa.

2 Unna qira aatata marainna ainainafa sia ani dadaaqiannoo. Anoona qira aatata marainna ainainafa ani marirana dadaaqiannoo.

3 Anutufa sia andeeqara fasiqauqa naarararana nimiannoo. Manda oosana maree mariasa nári nidimari ainainna mararanasaa Anutufa itita nisaidanoo.

4 Kudoosaaparafa kudikirana amiannoo. Kadaapi rirafa ani ainaina faqaa faikamma aisaidanoo.

5 Irirana faqaafa narana qaanaakifaqa afeedidaqa. Moo fannoo narana unnakara aukuana faiaqee idanoo sia narana deedaqafi asauriranaki mariannoo.

6 Andeeqara fasiqa anaasee amiqi amiqirana mareefaranoo. Manda oosana maree marina ufa fannoo mina manda irirana kukeeqasaifanoo akaqausa mandaikamma nisaidanoo.

7 Amiqira fasiqa kuqufinaqa amiqira ainainara foora iriranaki kaqi minara oonu mafi irifaranoo. Manda oosana maree mari fasiqafa kuqufinaqa misa mi fasiqanara kai kaqi qaunuseefaranoo.

8 Irirana faqaasa amiqira naamuaqira ufa iriseeqa nári nimuqusaki mara quqaidaqa. Fifau faafau iqa nuasa kuridifanoo.

9 Kuqaa qira oosana fannoo faiqí mareeqeenoo andeeqaranaki quqaannoo. Unna qira oosana fannoo faiqí mareeqeenoo maaniki aquannoo.

10 Noorinnai nifunnai imariasa ummaara kambiqaanifeera miqidaqa. Aiqama nifufsaa paasoosammandee manda oosanara qaoo qinafa mifa asooarana nimidanoo miqidanoo.

11 Amiqira fasiqa ufa fannoo nammariara foora, maqakiqari urureenoo kaqi marirana nimidanoo. Mandoosana maree mari fasiqana ufa fannoo narí irirana kukeeqa saifanoo narí aqoonausa mandaikamma nimaqaidanoo.

12 Faiqí aanaaseera fidiaqaa ira oosana fannoo ummaara kambiqaidanoo. Faiqí aanaaseera nidira oosana fannoo aiqama misa aaqarana minninnisaidanoo.

13 Irirana faqaa fasiqa afaurusaa amiqira ufa kai ururaidanoo. Furufarira fasiqa arirafa kai maridanoo.

14 Irirana faqaasa irirana oosana oosana moodaasaqa maridanoo. Furufarira fasiqa ufa qinanoo ummaara sia nianai mariannoo aaqa uqanna mariannoo.

15 Ainaina faqaana narí ainaina fannoo itita amaqaidanoo. Kudi fasiqa fannoo ainaina sia marinara kuridiannoo.

16 Amiqira oosana auqaana akiiqara kaqi marirafa maridanoo. Numoo fannoo nifiqeenoo firaa numooki kai fidanoo.

17 Naakapara ufa iri mariasa sia kuqifaranoo. Naakaparanara nikooqee mariasa manda aatata fifaranoo.

18 Faiqí moo fannoo faiqí aanaaseera ookiqari amiqi amiqidanoo umee fidiaqaa imarifa unnaqi marifa maridanoo. Munuqi miniqinoo nifa furufari marifa maridanoo.

19 Ufa moomoo qinana moomoo aaqarana mareennaranoo. Anee irirana faqaafa maridana qireeda marinnaranoo.

20 Amkiqira fasiqa ufa fannoo amiqira siruaara foora maridanoo. Mandoosana maree mari fasiqana irirafa maannukuara foora maridanoo.

21 Amiqira fasiqa ufa fannoo moomoosa dadaaqidanoo. Furufari marifa narí furufariranannai narí kai aridanoo.

22 Anutuna amiqi amiqiranannai kai ainaina faqaafaikinnaranoo. Ani kadaapirirafa sia amana minaki ookaa iannoo Anutufa kai amiannoo.

23 Furufarirafa manda oosana auqarara kai asasidanoo. Amiqira irirana faqaafa amiqira oosana auqee marinara kai asasidanoo.

24 Andeeqarausa nári nidimari ainainna mareefaranoo. Mandoosana maree mariasa kaaqa rufiee maria ainainna mareefaranoo.

25 Deedeefaa ufai firaafa uqinanoo mandoosana maree mariasa fuaqamma aqusaannoo. Andeeqarausa sia fuaqa aquannoo. Misaki kaqi marifaranoo.

26 Anee kudoosaapara fasiqa sia aneenna ainainiani feera afiqaa. Afiqasainanoo kudoosapee marinana afai sandurinafaara. Ida muna aninna afuki keeqeenoora foora iandoora sia afiqaa.

27 Yaaweena ufa qaindusinana sia dauni kuqinnaranoo kisaaqasaa marinnaranoo. Manda oosana maree mariasa kuqirafa kisaaqasaa marifaqa kasaaqai kuqidaqa.

28 Andeeqara fasiqa anaasee nidimari ainainafa kuqaa kambiqainaqa asasifaranoo. Manda oosana maree mariasa sia moo ainaina mareefaranoo.

29 Kuqaa qira oosana faqaasasaa Anutufa faandaamurara foora misa itita nimaqaidanoo. Miqimmaseenoo quandaki mandoosana maree mariasa kuridi nimaqaidanoo.

30 Andeeqara oosana maree mariasa sia amana atoosaa ususee kumbaimmaqifaranoo, misa doo miqoo mapukiqa maridaqa. Manda oosana maree mariasa sia mi maqa maaqanaki marifaranoo.

31 Andeeqara oosana maree mariasa amiqira ufa kai qidaqa. Manda ufa qimari fasiqana afaurusaa ititeefaranoo.

32 Andeeqarausa ufa qimannimidaqa narí oonu mafi iriseenoo mina ookiqari amiqira ufa kai qidanoo. Manda oosana maree mariasa aiqama kari narira ufa kai qidaqa.