1 Sia andeeqara sikeerara foora imariasara Yaawefa fidiaqa midanoo. Mifa andeeqara sikeerara aidifanoo asasidanoo.

2 Faiqí moo fannoo narí afaaqa amooqi marifa qusasaa asauriranaki aqufuannoo. Moo fannoo narí afaaqara reendeeni marifa irirana faqaafa mariannoo.

3 Ainainara kuqaa qimariasa misa nári kuqaa qira oosana fannoo manda ainainasaa itita nisaidanoo. Sia Yaaweena saqarikinausa nariqa unnaqira oosana fannoo nariqa kuridi nimaqaidanoo.

4 Ani moomoo ainaina fannoo sia ani kuqiranasaa itita amaqaanoo. Aneeqara oosana fannoo ani itita amaqaannoo.

5 Kuqaa qira oosana fannoo andeeqara fasiqa marirana amanaikamma amaqaidanoo. Sia saqariki mariasa nariqa mi oosanafa nári nikuqama nimifaqa aqufidaqa.

6 Andeeqarausa nári andeeqarafa idukunnisaidanoo. Sia saqariki mariasa nári mi manda oosanafa nári ufaanara foora ninuka aridanoo.

7 Manda oosana maree mariasa nári kuqira faasaana nári nidi marifaqa mararee qimaria ainainafa mi faasaanna taikaannoo. Manda oosanannai ainaina marararee qimariasa mi faasaanna nári ainaina mararafa taikaannoo.

8 Amiqira oosana maree marina mandainaina anifanoo Anutufa itita amaqaifanoo mi mandainainafa aiqareenoo mandainaina maree mariasa nifaaqai aqufidanoo.

9 Anutunara nikooqee mariasa ufa fannoo ani mareeqee mandaki quqaisaannoo. Andeeqara oosana maree mariasa irirafa ani mareeqee amiqiraqoo quqaannoo.

10 Andeeqee maria misa aiqama ainaina andeeqaifaqa faiqí anaasee mina qafamasee asasidaqa. Manda oosana maree mariasa kuridifaqa asasifaranoo.

11 Andeeqee mariasa maqusa amiqi amiqinoo maridanoo. Manda oosana maree mariasa ufa fannoo nári maqusa naakunduka midanoo.

12 Irirana siaifa narí aqoonausa raiqara ufa qimannimaqaidanoo. Irirana faqaafa sia miqira ufa qidanoo oo qummunimmasee maridanoo.

13 Munuqi miniqimarifa aaqaidanoo kukeeqarana kooroo imarifa maridanoo. Amiqi mari fasiqafa mifa kukeeqarana rafaaqafidanoo.

14 Moomoo irirana faqaasa marinna maqusafa sia aqufuannoo. Irirana sia marinna maqusafa aqufuannoo.

15 Anee moo maqannaa dinnaakira munnimmara dadaaqianee qinana dadaaqinanoo doo ani munnimma kuridiranaki finanoo ani afaaqa mandaika uqanna iannoo. Anee aanaamuru feefauru dadaaqiranara akooqee marinanoo ani munnimma kaqi mariannoo anee amiqiraqoo kaqi marinnaranoo.

16 Afaaridanoo fifamari anaaseefa amiqirafa aiqamausa mi anaaseena amooqi mariafa maridanoo. Manda oosana maree mari anaaseenara fidiaqaa midanoo. Kudoosaapee maria fasiqa anaaseesa sia ainaina moomoo mareefaranoo. Nimudaanai qimaria fasiqa anaaseesa ainaina qumiasana moomoo marisa maridaqa.

17 Afaarimari fasiqafa narí afaarimarifa nariki kai maridanoo narí dadaaqidanoo. Kaqi narimari fasiqafa mi narirafa quandaki narí aridanoo.

18 Manda oosana maree mariasa maree maria qumiasana ainainafa sia misa dadaaqidanoo. Andeeqara oosana maree mariasa maree maria ainainafa akooqoo afeeka ainaina mariannoo.

19 Yafee andeeqara oosana aiqama kari auqaee marifa sia kuquannoo kaqi mariannoo. Manda oosanara sandanainai qimarifa dauni kuqirana paquriannoo.

20 Yaaweefa manda irirana faqaasara fidiaqaa midanoo. Andeeqee mariasara Anutufa ridanoo.

21 Anee irimmariananoo manda oosana maree maria fasiqa anaaseesa aupuraranaki fifaranoo. Andeeqara oosana maree mariasa sia mi aupuraranaki marifaranoo.

22 Amiqira afaaqa faqaa anaasee maridanoo irirana furufari marifa kuara aanna raidanoo. Amiqira afaaqa faqaafa fifau maridanoo.

23 Andeeqara oosana maree mariasa moo ainainara nidifaqa marasaafanoo amiqirafa maridanoo. Manda oosana maree mariasa nári nidi mari ainainna marasaafaqa aiqamausa aanoo qidaqa.

24 Faiqí moo fannoo afaarinoo nimi marifanoo mina ainaina marirara kai idanoo. Faiqí moo fannoo manda fasiqa kaaqa ainainara tatamaqidanoo rakisi qumaraifa sia mina ainaina moomoo kidanoo.

25 Afaarinanoo ani ainaina moomoo mariannoo. Anee aneenna ainaina akaqausa dadaaqinana niminaqa ani faqa dadaaqiqa amifaranoo.

26 Faiqí moo fannoo aandaroo narimarifanoo narí narana moomoo marifanoo saina munnimma nambaqa meeraqoo auqu ramasaanaqa qimiaqee qimarinara faiqí anaasee mi fasiqa anaaseena aquramma araidaqa. Kaqi feefauriaqee qimari fasiqana amooqidaqa.

27 Fainqi moo fannoo amiqira oosanara afeekaikammasee randainafa mi fasiqafa narí amooqirana faqa paquriannoo. Faiqí moo fannoo manda oosanara randanoo fimarifa mi manda ainaina paquriannoo.

28 Nári qumiasanasaa mundi mariasa ufai firaafa uqnoo saqari amanee rauqu aqusaifafanoo maqasaa aqufindee mifaranoo. Andeeqara oosana maree mariasa misa sia fuka saqari amanee rafoora amiqi amiqi faranoo.

29 Faiqí moo fannoo faiqí aanaaseera manda ufa qimarinaqa faiqí anaasee findimeeqee daraani mambifanoo nariara quanda quandidanoo. Furufarira fasiqauqa irirana faqaasa ainainira faiqi marifaranoo.

30 Andeeqee maria oosanafa kaqi marirana nimidanoo. Mandoosana maree mariasa kasaaqanda midaqa.

31 Amiqi maria fasiqausa maa maqanasaa nári andeeqasee marinnana akiiqara mareefaranoo. Manda oosana maree mariasa misa faqa maqee kamuqoo nári manda oosana akiiqara firaaqoo aupurarana mareefaranoo.