1 Faiqí moo fannoo aaqamasainanoo moo fannoo qimaminanoo eedoo qimasee irinafa irirana faqaafa mariannoo. Aakapara ufara akooqee marifa furufarira fasiqa maridanoo.

2 Yaaweefa andeeqara fasiqa aanaaseera asasidanoo. Manda iriranara tipundaari mariasara akooqaidanoo.

3 Mandoosana fannoo sia amana itita nimaqaannoo. Andeeqarausa sia amana kasi kasifaranoo atuka araqa marifaranoo.

4 Irirana faqaa aanaase afaaqi fannoo mina amooqida asasidanoo. Manda oosana maree mari anaaseefa narí afaaqi asaurirana amisaifanoo amudaani rumafifanoo aurinoora foora inoo maridanoo.

5 Kuqaa anoona ufa qimariasa aiqama ainaina andeeqa nimaqeefaranoo. Manda oosana maree mariasa inni nikaru qiranara kai iridaqa.

6 Manda oosana maree mariasa misa ufaana fufidaqa ufannai faiqí naridaqa. Faiqí andeeqee mariasa misa ufaana kinaana andeeqara ufannai idukidaqa.

7 Manda oosana maree mariasa kuqifanoo misasaa ani aruakinausa sia marifaranoo. Andeeqara fasiqa aiku asauku sia dauni kuqifaranoo kaqi marifaranoo.

8 Anee irirana faqaafa marinaqa faiqí anaasee ani amooqifaranoo. Anee irirana siaifa marinaqa faiqí anaasee noori runifaranoo.

9 Kaqi fifau fasiqa narí ainainiranannai narana naidanoo amiqiranaki maridanoo. Moo fannoo nariara unnaqimasee karaambaiqee qimasee oonuree aniree inoo nidanoo naranara sia, marifanoo aarara nidanoo.

10 Andeeqara fasiqauqa nári aandau kuara faini nimuqusi marifaqa rakisidaqa. Manda oosana maree marifa kuara faini kaukaata qimannimaqaidanoo.

11 Kaaqa ainaini mari fasiqana narana moomoo marifanoo naidanoo. Fifau unnaqira ainaina auquanoo nifa narana sia marifa maridanoo.

12 Manda oosana maree mariasa manda ainainara kai randaidaqa. Andeeqee mariasa misa atukaraqa maridaqa.

13 Mana oosana maree mariasa nári ufaki ufaanakiara foora aridaqa. Anoona qira oosana maree mariasa misa rakeemmaki kaqinni maridaqa.

14 Aneenna ufa qimariannana akiiqara faqa aneenna asaukunnoo auqee mariannana akiiqara faqa mareennaranoo. Aneenna auqaannana amana kai aiqama ainaina mareennaranoo.

15 Furufarira fasiqauqa aiqama kari náriara amiqimmidee qidaqa. Irirana faqaasa naamuaqia ufana amiqimmasee iridaqa.

16 Irirana siaifa kaqikaa ufa iriseenoo tautummeeqeenoo aanoo qidanoo. Irirana faqaafa iriseenoo mafi rafaaqafusee mana mana fidanoo.

17 Faiqí moo fannoo andeeqarafa anoona ufa kai qidanoo andeeqara ainaina uqeeraidanoo. Unnaqi mari fasiqafa unna qira ainaina kai uqeeraidanoo.

18 Sia irirana irisee qimaria ufafa aseemara foora faiqí ateekaidanoo. Irirana faqaasa nifauru fannoo ufaanakuru ununnisaidanoo.

19 Kuqaa anoona ufa qimari afai afaurufa kisaaqasaa maa maqanasaa mariannoo. Unna qimari afai afaurufa qusasaa taikaannoo.

20 Manda ainainara tipundaari mariasa naundurai suka sanda itaranda maridanoo. Faiqí anaasee amiqiranaki mariaqeeree qimasee ainaini mariasa asasifaranoo.

21 Andeeqara fasiqa afaaqai sia mandainaina auqufuannoo. Mandainaina maree mariasa sia moo ainaina uaqeeidaqa misaki ummaara kai qumbiqanoo maridanoo.

22 Yaaweefa unnaqi maria afauru afainara fidiaqaa midanoo. Andeeqara ufa mau fimariasara Yaaweefa asasidanoo.

23 Irirana faqaasa nári iria ufana rafaaqafusee maridaqa. Furufarirausa nári furufarirana faaqa quqasaida nimidaqa.

24 Kadaapi rumasee ainainirafa ani afeeka amiannoo. Kudoosaaparafa ani moona ainainira faiqika maisaannoo.

25 Moo ainainara amukee marifa ani asasirana aruannoo. Reedeenira ufa fannoo ani asooama amaqaannoo.

26 Andeeqee mari fasiqafa narí aqoondiuqa amiqira aana uqannifiqaidanoo. Manda oosana maree mariasa nári mandoosana fannoo nári mareeqee kaqirunna ubeekaidanoo.

27 Anee ainainirara kudoosaapeenana sia aneenna masaree qimarianna ainainna mareennaranoo. Anee amudaanai qimasee ainaininana aneenna aiki mari ainainna mareennaranoo.

28 Kaqi marirannai fimaria aanafa andeeqara oosana maridanoo. Kuqirannai fimaria aanafa mandoosana maridanoo. Aaquqira Ufa.