1 Aadana narana narí aqoondi faqa reendeenammasee neemarifa uriqararafa maridanoo. Firaa qoomaqa sakasee nári tinoo taanoo rirana namu faqa nee mariasa oorudupirausa maridaqa.

2 Moo fasiqa ainaina faqaana faiqi fannoo narí akoona asaurirana ami marinanoo mina amiqira ainainira faiqi fannoo mi faiqina iraaqaranoo maridanoo rakisi amaqaannoo. Kaasooaqee mi fasiqana faiqi namu nári nikoona qumiasana rainaidaqa mina andeeqara ainainira faiqi faqa raina amifaranoo.

3 Koora faqa siruaa faqa tasirisiri mandee qafaandee inoo Yaaweefa faiqí nimuqusa nimanammasee qafaidanoo.

4 Manda oosana maree mariasa manda ufauqa kai iridaqa. Unnufa qimariasa unnufa kai iridaqa.

5 Anee kudi fasiqauqara uteeti qinana mi kudi fasiqausa auquna Anutunara faqa uteeti qinnaranoo. Moo fannoo moo mandainainaki aqufinana anee minara naanaidara qinana sia kaqi marinnaranoo Anutufa ani aruannoo.

6 Ninaaku nitaatoosa nári ninaiqimarara nasuriandee iqa faiqiuqa nári ninausa nikausara nasuridaqa.

7 Amiqira fasiqa anaasee sia unnufa qidaqa. Kuqaa ufa sia furufarirausaindi maridanoo.

8 Umee raqeera nimimaria feefaurufa fadueera foora dadaaqifaqa auqararee qiana kaqi auqeefaranoo fee qidaqa.

9 Anee faiqí anaasee aniara ruaqeera ani mandaikamma amaqaifana minninnisaa. Misa ani mandaikamma amaqaifana kaqi mina irina fidana anee aqoondikirana rakeemminnaranoo.

10 Anee irirana faqaa fasiqa moodaannai qimaminanoo mifa kai kaqi iriannoo. Anee quandakinana furufarira fasiqa saamu qumaree moomoo wan handeereeta kari arusee qimaminanoo mifa siamma qiriannoo.

11 Kuqirafa faiqí narimari fasiqafara foora aiqama kari mandainaina uqeeree maria fasiqa anaaseesa naridanoo.

12 Anee kaasau faini aanaaqi rausumaree aanai oonu mina anoona paquri masainanoo ani rufiarafa mariannoo. Furufarira fasiqa narí furufarira aatata fimarinana paquri maseenana firaa mandainainaki marinnaranoo.

13 Moo fannoo amiqira ainaina moona amifanoo qumareenoo mina akiiqara manda ainaina amifanoo minara mandainaina kai mi fasiqana maaqaki naaruara mariannoo.

14 Tinoo rira oosana fannoo aandaani tatiara foora idanoo. Tinoo rirafa kambiqainana kai kaqi rafaaqafu sainanoo sia kambiqaani.

15 Manda oosana maree mari fasiqana idukiranara faqa andeeqara fasiqa fifau rumbaranara faqa Anutufa mi oosana qandara fidiaqaa midanoo.

16 Faiqí moo fannoo irirana sia maraifa nanaree fifau sukura feefauridanoo fee mina irirafa sia maridanoo.

17 Amiqira aqoondi fannoo aiqama kari aniara aididanoo. Faiqí ani ainaina sia fifau maridaqa anee ummaaraki aqufinaqa ani dadaqirara maridaqa.

18 Akaqausa amiqira irirana siaisa kai moona aaqarana akiiqara idaqa.

19 Faiqí moo fannoo numoo kambiqara oosanara aidi marifa mifa rakirana kambiqaranara faqa aididanoo. Aneenna afaaqa amooqinana anee ummaarara randaida miqimariananoo.

20 Manda irirana faqa mandufa faqa kai qimarifa sia amiqirana paquriannoo kuridirana kai paquriannoo.

21 Moo fasiqa faiqi namu furufarira ainaina auqaifaqa misa ninaukoo naundura ummaara faqa aiaaee qirana faqa kai maraidaqa.

22 Anee asasi mariananoo mifa anee marasinna namasaananoora foora maisaidanoo. Faiqí moo fannoo afaaqa rumbanoo marifa aiqamausa nifaaqa rumbaidanoo.

23 Manda oosana maree mari siaasafa umeenni umeereemaria feefauruna maraseenoo sia amiqimmasee ufa rainaidanoo.

24 Irirana faqaa fasiqa fannoo irirana narí oorisaa kai quqaqaifanoo maridanoo. Irirana siai fasiqafa aiqama aanai afu munu maqee mini maqee ifanoo sia amanaikidanoo.

25 Furufarira faiqiuqa nári nikoona oori runirana amidaqa. Nári ninoona sukaqarana amidaqa.

26 Andeeqara fasiqa fifau arirana rumbarana amiafanoo sia andeeqaidanoo. Andeeqara rakisirausa narirafa aaqara oosana maridanoo.

27 Irirana faqaasa moodaa moodaa ufa kai qidaqa. Uqbiqasee mariasa irirana faqaasa maridaqa.

28 Furufarira fasiqa narí ooki kadara masainaqa faiqí anaasee minara irirana faqaa fee qifaranoo. Mi fasiqafa narí ooki amiqimmasee ititasaifaqa misa minara akeepamasee irimari fasiqa fee qifaranoo.