1 Faiqí sia nári niqoonausa faqa moodaanaki kiasa náriara kai iridaqa. Nana ainainaree aiqamausa andeeqarafee qimasee irimarianara mi fasiqausa sia asasidaqa.

2 Furufarira fasiqa amiqira oosanara sia irinara sia minara iridanoo. Mifa aiqama kari narí amiqirafa marina uqannifiqarara kai aididanoo.

3 Numoo faqa nisaurirafa faqa moodaanaki fidaqa. Ummuarira oosanaki keeqafinara asaurirafa mina afaaqasaa kambiqaidanoo.

4 Faiqí ookinaa ufa faruma firaafara foora mandinoo maridanoo. Mina irirafa qumi mari nammarifara foora asooaidanoo rukukuqnama amaqaidanoo.

5 Manda oosana maree mariasa kootaki dadaaqinana aaqara oosana mareennaranoo. Andeeqara oosana maree marina fifau kootaki quqeenana mina faqa aaqara oosana kai mareennaranoo.

6 Furufarirausa aanoo qirana oosana arasee nariqa nariranara innaaru qidaqa.

7 Furufarira fasiqa ookinaa ufa fannoo narí kuridi amaqaidanoo. Mifa narí ufaki ufaanakiara foora aridanoo.

8 Munuqi miniqira ufa fannoo kaaqa adiafaaira narana miqirafa maridanoo maasa kaaqa mina nambiqarara dididanoo.

9 Ainainiafanoo raindaani mari fasiqafa ainaina deedeepinoo turitaari marina aanna reemarifa maridanoo.

10 Yaaweefa afeeka faandaamurara foora maridanoo. Andeeqara fasiqa anaasee minaki kukeeqafi sia kuridifaranoo.

11 Ainaina faqaasa nári qumiasanara maasa kisaaqa faandaamura fee qimasee fifau nári ainaina saqarikidaqa.

12 Sia kaqi moona ameemaanai keeqeefara mifa narí mara maree quminaqa mina ameemaanai keeqeefaranoo. Nári nimoo qimariasa kuridira aataa fidaqa.

13 Moona ufa amiqimmasee irisee ufa qia, sia miqinana furufariranaki faqa manda asauriranaki aqufinnaranoo.

14 Ani kaqi marira aidirafa anee aurinanoo ani pooduqaannoo. Anee sia miqinanoo ani mi oosanafa taikafuannoo.

15 Irirana faqaasa maqee maqee fuka irirana irirara deedaqidaqa.

16 Anee uriqarara fasiqa qafaanee qimasee moo ainaina mina amira ainaina mara maree finanoo amanaika miannoo.

17 Faiqí kootaki qimannimisaafaqa irisee kuqaa fee qidaqa. Moo fannoo mi ufana quandafi qimanniminaqa indaaruqaa ufara boo narí kai narí amooqidanoo mifoo qifaranoo.

18 Afeeka fasiqauqa moo ainainara aanooqidaqa narafumau narafumau idaqa masisara foora quandasee qafeeqa doo dinni dinni asooqaidaqa.

19 Aneenna akaqaafasauqa dadaaqinaqa misa afeeka faandaamurara foora anisaa itita amaqeefaranoo. Anee misara aanoo qinaqa misa nári kooqi itita saifana sia keeqeennaranoo.

20 Faiqí moo fannoo narí ookinaa ufannai narana paqurinanoo amuaqu ianno. Narí afauru saaqaraa ufa fannoo amuaqu iannoo.

21 Afai afauru qaaraiki marifa maridanoo mifa kai faiqí narirdanoo kafa faiqí dada qidanoo. Aneena ufa qimaseenana mi ufafa qiqa fawa qumaraannoo fee qimaseenana iria.

22 Adeedaana kumaara fannoo adeedaana maanaaqa paqurimmasee marainanoo Yaaweefa irinoo asasa miannoo.

23 Ainaina siaifa kudi fasiqa fifimmasee ufa qimari fasiqafa maridanoo. Qumiasana tiafa kaukaata ufa kai qimarifa maridanoo.

24 Moomoosa aqoondiki marinafa sia kisaaqasaa mi aqoondikirafa mariannoo. Moodaa moodaa amiqira aqoondi afaaqasaa aqoondi marifa mi fasiqana mi amiqira aqoondina oosana fannoo narí moodaa fidika faqa amiqi marina arusee uraaqaranoo maridanoo.