1 Manda oosana maree marifa sia moo arirafa marifanoo kaqi fifau sandaidanoo. Andeeqara oosana faqaafa kaasau faini raioonnara foora pasoosidanoo.

2 Ufa rukiee maria maqanaasa misa uriqararausa qusasaa mariqa moo fannoo mina maraqusee kikiqidanoo. Irirana faqaafa irirana rainee marifa mifa andeeqa nimaqaidanoo kisaaqasaa mariannoo.

3 Kudi fasiqauqa manda rakisira rakisi nimaqee marifa aaku firaafara foora rinoo narana aina madaikamma aqimarifa maridanoo.

4 Andeeqara ufara nikooqee marisa ufa rukiee mariasa dadaaqidaqa. Andeeqara ufa mau fimariasa ufa rukiee mariasa itita nimaqaidanoo.

5 Manda oosana maree mariasa sia andeeqara oosanara iridaqa. Yaweenara inaaru qimariasa misa andeeqara oosanra amiqimmasee iridaqa.

6 Moonoo ainaina faqaafa eendaanidira aatata nimarifa ureeqarafa maridanoo. Kudi fasiqa andeeqaraqoo kai nimarifa mina urirarafa maridanoo.

7 Sanda ufamau fimarifa kumaaraafa iriana faqaafa maridanoo. Moo kumaara fanoo kaaqa narimari fasiqana aqoondiki marifa narí akoona asaurirana amidanoo.

8 Faiqí moo fannooo narí munnimma ufaasu nimiseenoo mina akiiqara firaaqoo ootupamasee maree marifa sia mi munnimmana uaqeeiannoo. Mi munnimmafa aiqaree kudi fasiqauqara amuqusi mari fasiqafinnai fuannoo.

9 Faiqí moo fannoo Yaaweena sandufa ameesuqinafa Yaaweenara inaaru qinanoo Yaaweefa mina innaaru irinoo fidiaqaammiannoo.

10 Andeeqarausa rarisameeqee manda ainaina auqarafaki uqeemarifa narí ufaanaki narí aridanoo. Asakadiki ikariri sia marifa Anutufa mina akiiqara amiannoo.

11 Ainaina faqaafa unnaqimasee nariara irirana faqaasee qidanoo. Kudi fasia fannoo kuqaa irirana faqaafa maridanoo mifa misa oosanara amiqimmasee iridanoo.

12 Andeeqara fasiqa uriqarafaikinaqa faiqí anaasee aiqamausa firaaqoo asasifaranoo. Manda oosana maree marifa uriqararafaikifaqa faiqí anaasee rufiasee kukeeqeefaranoo.

13 Faiqí anaasee moo fannoo narí aaqarana kukeeqee marifa sia amiqirana maraannoo. Kooroommasee minnisainnana Anutufa afauaannoo.

14 Aiqamakari Yaaweena ufa mau finana asasiranaki marinnaranoo. Ufa rukieenana mandainainaki marinnaranoo.

15 Manda oosana maree mari karaambaiqafa kudi fasiqa anaasee manda rakisira rakisinnimaqee marifa kaasau kuarara foora faqa kaasau fainiara foora faqa maridanoo.

16 Narí maqannaa mandaikamma nimaqee mari urirqararafa irirana oorudupirafa maridanoo. Unna qira oosanara akooqee marifa kisaaqasaa rakisi nimaqaannoo.

17 Faiqí kuqa arinafa narí madika indufidanoo. Sia moo fannoo mina dadaaqiannoo.

18 Kuqaa qira oosana mareenana amiqimmasee marinnaranoo. Sia kuqaa qifa oosana mareenana kai kaqi tautummaki manda ainainaki aqufinnaranoo.

19 Maqa auqee mari fasiqafa mina narana moomoo maidanoo. Fifau faafau inoo nifa kudi mariannoo.

20 Kuqaa qira oosana faqaasa Anutufa firaaqoo amiqi amiqimma amaqaanoo. Kai kaqi moomoo munnimma ainaina faqaasa mariraree qimariasa aupuraranaki aqufifaranoo.

21 Kootaki moo fasiqa dadaaqinara moo fasiqa mandaikamma amaqarafa manda oosana maridanoo. Akaqa siaasauqa noo rafaaqafia munnimma maraseeqa miqidaqa.

22 Kaaqa ainainara tatamaqi mari fasiqafa kai kaqi moomoo ainaina maranaa qidanoo, miqi marifanoo sia irirai miqi mari kudikirafa doo mina amaarusinoo maridanoo.

23 Anee faiqí moo manda oosana marainara qaoo qinanoo mifa minara kasooaqee dufi dufi qinanoo mina dufi dufi qira ufa fannoo fadameena akira ufa uraaqaranoo maridanoo.

24 Faiqí moo fannoo narí anoofa akoona ainaina ummuarammasee sia manda oosana maree fee qinafa mifaa faiqí ainaina mandaiki mariasa naanna raidanoo.

25 Ainainara tatamaqi mari fasiqafa ummaara uqeeraidanoo. Yaaweenasaa mundi mari fasiqafa moomoo ainaina faqaafa maridanoo amiqimmasee mariannoo.

26 Faiqí moo fannoo narí irirana mau fimarifa fufufarirafa maridanoo. Faiqi moo fannoo irirana faqaasa aatata fimarifa asooaranaki maridanoo.

27 Faiqí moo fannoo kudi fasiqauqa nimimarifa mifa sia sarau iannoo. Kudi fasiqauqa sia nimimarina faiqí aquraraidaqa.

28 Manda oosana maree mariasa uriqararausai kiafaqa faiqí anaasee kukeeqaidaqa. Mi manda oosana maree mariasa kuqifanoo andeeqarausa kaifaa rakisi nimaqeefaranoo.