1 Kaukaata qimari fasiqana moomoo kari andeeqaafanoo sia irimarifa qusasaa radamu saifanoo mina andeeqara aana sia mariannoo.

2 Andeeqarausa rakisirausaikiafaqa aiqama fasiqa anaasee asasidaqa. Manda oosana maree mariasa rakisirausaikiafaqa aiqama faiqí anaasee ummaara maraidaqa.

3 Irirana faqaafa marinanoo ani anoofa akoofa asasiannoo. Dapi maraqa nua aanaaseefinnai fimarifa narí munnimma aiqama aqu taikaidanoo.

4 Maqasaa karaambaiqa fannoo andeeqara oosananoo maa maqa maaqana rakisifanoo afeekaikinoo maridanoo. Munnimmara iridanoo rakisifanoo mifa rakisimari maqa maaqafa maaniki aqufidanoo.

5 Faiqí moo fannoo narí aqoonnana fadameena akira ufa ami marifa narí mina ufaana fufidanoo.

6 Manda oosana maree mariasa nári aaqarafa nári ufaana fufufifaqa aridaqa. Andeeqee mariasa asasammasee idiana faqa fidaqa.

7 Amiqira fasiqa fannoo kudi fasiqa ummaarara faqa iridanoo. Manda oosana maree marifa sia miqira ainainara iridanoo.

8 Ufa rukiee mariasa nári maqannaasa nirana fundakida aanooqirana uqeera nimidaqa. Irirana faqaasa aanooqirana asooama nimaqaidaqa.

9 Irirana faqaafa furufarirana afiqee kootai munusaifanoo furufarirafa aanooqimasee uteeti qidanoo.

10 Faiqí fidika ruiqarara rimariasa andeeqara fasiqara fidiaqaa midaqa. Andeeqara fasiqauqa misa mariranasaa itita nimaqaidaqa.

11 Irirana siaisa nariqa aanooqirana akooqoo koorooidaqa. Irirana faqaasa nári naundurai kai nári ufa rafaaqa fidaqa.

12 Uriqararafa unna ufa irimarifa marinaqa aiqama mina dadaaqimariasa unna ufa qimariasa kai marifaranoo.

13 Kudi fasiqa faqa minasaa rakisi marina faqa Yaaweefa kai nifu nimiqaifanoo.

14 Uriqararafa kudi fasiqa andeeqaranara qimarifa naaru naaru rakisi nimaqaannoo.

15 Faiqi aanaaqi arusee andeeqainafa amiqiannoo. Faiqi aanaaqiuqa nári irirana mau fiqa nári ninausa nisaurirana nimifaranoo.

16 Manda oosana maree mariasa uriqararausai kifanoo mandoosana fannoo firaafaikiannoo. Andeeqarausa manda oosana maree mariasa saamurifaqa qafeefaranoo.

17 Aneenna faiqi namu andeeqara ufa naakapainaqa misa andeeqara aatata fifana anee asasinnaranoo.

18 Anutuna itita nimaqarafa sia mari maqa maaqanaki sia mina sandufa maridanoo. Anutuna sandufa mau fimariasa asasiranaki maridaqa.

19 Anee ufannai kai ainainira faiqi ufa qimaminanoo siamma iriannoo. Mifa ani ufa amiqimmasee irisee sia mimau fuannoo.

20 Irirana siaifa kaqikaaqoo amana maridanoo. Sia irirana irisee ufa qimarifa mandaika uqanna inoo maridanoo.

21 Anee aneenna ainainira faiqi faiqi aanaaqisaaqari aidi maru ainainna amisainanoo kaqi kaaqoo marinoo mi ainainira faiqifa ani aiqama ainaina maraannoo.

22 Qusufa qimarifa moomoo aanoo qirana faqa ummaara faqa uqeeraidaqa.

23 Narí auqu uqeeree marifa asauriranaki aqufuannoo. Narí mara maree qumi marifa uriqarara auqu maraannoo.

24 Ummuarira fasiqa dadaaqinara aneenna kai aneenna namuqaakinnaranoo. Kootaki oonuree anoona ufa qinaqa mina akiiqara misa aupurarana amifaranoo. Mifa kukeeqainanoo Anutufa mina aqurara ufa qiannoo.

25 Anee faiqiara rufieenana aneenna ufaana fufi mariananoo minaki aneenna arinnaranoo. Yaaweena saqariki marifa amiqiranaki maridanoo.

26 Aiqamausa maqasaa uriqararana oorisaa oonuree andeeqaranara iraidaqa. Sia minannai nári andeeqarana mareefaranoo Yaawee finnaindaraana mareefaranoo.

27 Andeeqarausa manda oosana maree mariasara fidiaqaa midaqa. Manda oosana maree mariasa andeeqarausara fidiaqaa midaqa.