1 Maa ufana Akurafa Yakeena amaaku fannoo Itieerana faqa Ukarana faqa akararuma niminau. Mifa maaqi qinau, Anutufa sia qini faqa maridanoo, Anutufa sia qini faqa marifaqa sia qini dadaaqirausa maridaqa.

2 Qinee aandaura foora maridaqa. Faiqí irirafa sia qiniki maridanoo.

3 Qinee sia amiqira iriranara iridaqa. Qinee sia uqanna Anutunara iridaqa.

4 Yafee innaarunai oorureenoo fee uminau. Yafee ufai narí asaukunnoo afapita qumareenoo fee. Yafee nammari qamunnasaa sakasee qumaraannoo fee. Yafee aiqama maqa atiuqa auquseenoo fee atukaramma quqanau. Mina auqu yafee. Yafee mina amaaku auqu. Anee iridana qimaqiminaqa iria.

5 Anutuna ufa aiqama anoona kai kambiqaidanoo. Mifa qi ufafa anoona kai kambiqaidanoo. Mifinnai fimariasa mifa rakira saqariara foora itita nimaqaidanoo.

6 Sia innee mina iriranasaa inneeqa irirana ootupaaqa. Mifa inni ootupara ufara unna fee qimaseenoo niqiannoo.

7 Qinee qaara ainainara Anutuna iraidaqa. Qinee kaqi maa maqanasaa marunaqoo qiminaqa marasee kuqua.

8 Nikaru qirana faqa unnufa faqa nianai futeeqa quqaa. Kaaqa kudikirana sia qimia, kaaqa moomoo ainaina faqa sia qimia. Qiqa qimana kai qimia.

9 Qinee moomoo ainaina faqaasa maridaqa aniara sia irianoora. Qinee ainaina siaisa maridaqa moosa ainaina ummuariqa qeeqa Anutuna auqu rafaaqa fuanoora.

10 Innee moo fasiqa ainainira faiqiara sia mandufa qiaqa. Mina rakisirafa irisee quandafi inni niqinaqa manda mareefaara.

11 Akaqa fasiqa anaasee narí nikausa manda afaaqooqa nimisee narí ninausa sia amiqimma nimaqaidaqa.

12 Akaqausa náriara ikairi siaisee qidaqa. Misa numoo marifaqa misa Anutuna afusaa ikairi faqaasa maridaqa.

13 Akaqausa náriara amiqirausee qidaqa. Misa náriara kaaqa amiqirausee qidaqa.

14 Akaqausa nifauru keedai miqirafa maridanoo. Misa nifauru musuka miqirausa maridaqa, minannai ainaina siaisa nambiqeefaranoo. Minanna kai kudi mariasa rukeefaranoo.

15 Tumooka qaara manaaqa faqaafa maridanoo. Aiqama qara moodaa nuqu faqaasa maridaqa. Miqanda nuqu Qini Qimia. Qaara faqa qaara faqa ainaina fannoo sia doo amanee qidanoo. Kaqi moo faqa moo faqa qimiaqee qidanoo.

16 Moo kuqirausa maqa maaqara qidanoo, Moo anaasee narí afaaqi faqa moomoo kari faiqeenoo sia faiqi maraidanoo. Moo aadana maqa maaqa fannoo aakuara aididanoo. Moo ida fannoo fifau faafau qaidanoo.

17 Faiqí moo fannoo narí akoonara uteeti qimaseenoo narí anoona asooqa ufa rukiainafa duee dueena fannoo mina afu qimbaannoo. Mina amaqi meemoonauqa rapeeifaranoo.

18 Qinee qaara faqa qaara faqa ainaina oosanara randaidaqa sia iridaqa.

19 Moo meemoona fannoo innaarunai qaqanoo nimari oosanna faqa moo sakani fannoo oonimau nimari oosanna faqa moo oosana sipa fannoo nammari amuaqumau nimari oosanna faqa moo faiqí faqa maanaaqa faqa nariara nariara rimaria oosannara sia iridaqa.

20 Dapi maraqa nua aanaaseesa maaqimidaqa moo ainaina qumee namaseenoo oorindanaindaraana rukaseenoo sia qinee ummuari marunausee qidanoo.

21 Qaara faqa qaara faqa ainaina maqa fannoo akooqainara maa maqafa kasidanoo.

22-23 Moo ainainira faiqi fannoo karaambaiqaiki marina faqa moo furufari mariasa moomoo narana neeneesaafanoo nimuaqu imarina faqa moo fidiaqaa imaria aanaaseefa faiqí maree marina faqa moo ainainira maanaaqa fannoo narí rakisira aanaaseena uriqararafaikirana mi ainainausara maqa fannoo akooqaifanoo kasidanoo.

24 Maa maqanasaa qaara faqa qaara faqa ainaina kaqikaa ainaina maridaqa misa irirafa firaafa maridanoo.

25 Moo ainaina tarika mifa afeeka siai ainainafa maridanoo. Suani aukuana narana suqu quqasee aaku aukana mina naidaqa.

26 Moo ainaina qiroosa maridaqa misa faqa afeeka siaisa maridaqa. Misa nári maaqa firaa ooniuqa qambaana usakaidaqa.

27 Moo ainaina pandaaqa maridaqa misa uriqararafa sia maridanoo sia qimannimidanoo misa nariqa kai andeeqasee irasasaa kai fidaqa.

28 Moo ainaina rufeeka maridaqa. Mifa kaqikaa ainaina maridanoo amana asaukunnai qumareennaranoo. Faiqí firaasa uriqararausa maaqaki kaqi nimarifa maridanoo.

29 Kafaa qaara faqa qaara faqa ainainausa amiqimmasee nimariasa maridaqa.

30 Moo raioonna aiqama aandau urinnaaqarara afeeka faqaafa sia moo aandaura rufiee maridanoo.

31 Moo ainaina kookooraana akoona fannoo anaasee kookooraana qambaanai kaqi sumoosumidanoo. Moo ainaina mimmi akoona fannoo moomoo indaaru nifiqanoo nidanoo. Moo ainaina maqasaa karaambaiqa fannoo ufa nimi marifa maridanoo.

32 Anee furufarammasee aneenna auqu uqeereenana kafaa oonu mafi iriseenana aneenna oo rafaaqa fua. Anee manda oosanara tipundaarinana aneenna oo rafaaqa fua.

33 Anee burimakau naamma anoona tatisee minannai adiafaa imari ainainna pataqa auqinnaranoo. Anee faiqí aikiru rumasainanoo fidika qumuannoo. Miqi kai masee aanooqirana uqeerasainanoo rakirafa kambiqaannoo.