1-2 Miqi qimasoofanoo sipsipa aanaaqi fannoo mi papiqana kukuqirana qumareenoo moo sanda rumbaqoona idukinau. Idukusoofanoo Anutuna aaqa qaara faqa qaara faqa aandau mariunakiqari moo mina ufa fannoo innaarunai miqirafa darara qimaseenoo qimaqiminau. Anee aniannee qufaqa qinee Yoohaneesa miqoo oonuraafananoo qoosa moo eekara arirafa marinau. Faiqí minasaa ooqufaaqeeu fasiqafa duru faqaafa marinau. Miqooqaraasa qafee afisuamaqasoofanoo maaqanna maaqanna rakiranannai narí aramandunnai quqararee qimasee finau.

3 Mifa fufanoo sipsipa aanaaqi mi papiqana sanda moo rumbarana idukinau. Idukusoofanoo Anutuna aaqaqari aandau moo qiniara aniree qafaannee qinau. 4 Qinee oonu qafaafananoo qoosa moo taatuqee arirafa animarinau. Miqooqaraasa qaseema firaana raiqarana mi qoosanasaa maruna amisee qimamiqau. Anee ooqu maqasaaqaraasaki maa qaseemanannai nirana fundakinaqa rakirana uqeera niminaqa narí ari narí ariaqa.

5-6 Mifa fufanoo mi papiqana rumbarana sipsipa aanaaqi fannoo moo sanda idukinau. Idukusoofanoo Anutuna aaqaqari aandau moo findifinoo qiniara aniannee qufaqa oonu qafaafananoo qoosa moo runduqarirafa marinau. Mi qoosanasaa marufa sikeera uqusee marufanoo Anutuna aaqaqari aandau moo ookiqari ufara foora mi fasiqana qimaminau. Aandaroo aukuana maridanoo moodaa faasaana saikiana amana kai raisa nimia. Raisa sia marinaqa kamaa miqi kaimmasee rainasee nimia. Misa fadameena faqa nammari faqa sia anee mina arua saina kaqi nimia, narana ainaina kai aandaroo naruannoo.

7 Miqi qimasoofanoo sipsipa aanaaqi mi papiqana rumbarana moo idukusoofanoo Anutuna aaqaqari aandau moo fannoo qiniara aniree qafaannee qinau. 8 Qinee Yoohaneesa irisee oonuraafananoo qoosa moo afaaqa eeqaku arirafa marinau. Mina ataufakaaqa maruna auqu Kuqirafa marinau. Faiqí nimana madikakinaasa faiqiara fooqiara mi fasiqana faqa fidanoo narí dadaaqi narí dadaaqi mariqau. Miqoo innaarunai marusa maaqi qimasee qimamiqau. Innee qoosa faqa faiqí faqa faiqí nimana madikakinaasa faqa maqasaa fasiqaki ooquree duru feefannai faqa aandaroonnai faqa auriranannai faqa kaasau aandaunnai faqa moomoo fasiqa anaasee maqusa maqusa mariasa narida mariaqa.

9 Misa fufanoo sipsipa aanaaqi mi papiqanasaa rumbarana moo sanda idukinau. Idukusoofaqa qinee miqoo aandau tatufimaru qaindana marufaqa qafaqiafana. Mi qaindana ameemaanai kuqirausa nimana moomoo marufaqa qafaqiafana. Sia fifau kuqirausa mariqau. Maqasaa maridaqa Anutuna ufa andeeqasee faiqí anaasee qimannimunara mina akiaqara narusoosa kuqiqa mariqau. Misa oosana Anutuna ufamau kai fimarunara minara narusoofanoo Anutufa misa nimana mareeqeenoo innaaruna qainda ameemaanai quqanau. 10 Qinee Yoohaneesa qafeemariafanaqa firaakari mindari Anutunara nameera qiqau. Oo uriqarara karaambaiqa anee andeeqarafa naaquqarafa anoona ufa kai qimarianafa mariananoo. Yairee fee maqasaaqaraasa ufa iriseenee maasa daruana akiaqara nári narinnaree. 11 Miqi qimasoofaqa innaarunai marusa eekara qamunna marasee aiqama nimisee qimannimiqau. Innee maana afisusee kafaa miqoo kaqikaaqoo idooaaqa. Inni nikaqaafasaa maqasaaqaraasa inni naanna reeqa Anutuna ufasaara kuqifanoo Anutufa mikari inni ufa faqa misa ufa faqa iriannoo.

12 Miqi qimasoofanoo sipsipa aanaaqi mi papiqana rumbarana moo sanda idukinau. Idukusoofanoo maqa firaaqoo uqanna kasinoo suani afu arusoofanoo runduqarira qamunnaikinoo marinau. Quqoona faqa aiqama taatuqee arinoo fidikandandinau. 13 Fasau saqari qaqamma miqirafa ufai uqifanoo adusa aiqama maqasaa kakasidanoo aiqama fasau maqasaa kakasinau. 14 Innaaruna kudimanda fannoo papiqa fooqaana atindari raqandaamamaree mafi aiqama raqandaamma taikanau. Aaqana aaqana nári maruqooqari nári maruqooqari moosa minifi mafi quqaidanoo ooruku nammariki afumauqa faqa miqi kaimminau. 15-16 Miqimarufa maqasaaqaraa karaambaiqauqa faqa uriqararausa faqa sundiaki kiateenauqa faqa ainaina faqaasa faqa nimudaanai qimarusa faqa faiqí aiqama karabusara fooqaana ainaini mariasa faqa kaiqeesa faqa aaqanasaa maru ooni aamaranaki keeqafi kukeeqafiqa aaqanara faqa ooniara faqa nameera qimasee qiqau. Innee maasasaa aqufiqa maasa dariqa kukeeqaqimaqaaqa. Qaarisaa ooqumarinoo marina afusaara rufiaidaqa ititaqimaqaa. Sipsipa aanaaqi aanooqiranasaa faqa ititaqimaqaa. 17 Miqanda firaa aanooqira faasaana doo animaridanoo, sia moo fannoo amana misa nifusaa kikiqiannoo.