1 Qinee Yoohaneesa mi ainainna qafammasaafanausa kafaa maa ainainna qafeeqa. Qangiroo qaara faqa qaara faqa safasa ati atisaa kikiqiqee maridaqa miqiqa maridaqa ufai maqasaa maqee maqee uqimari ufaina maqa maaqa mandaikianifee qimaseeqa ufai rafaaqafiisee maridaqa. Miqiqa mariafanoo sia ufai moo fannoo ooruku nammarisaa fee maqasaa fee saqarisaa fee sia fuaqeenoo. 2-3 Misa miqiqa marufaqa qinee qangiroo moo qafaqiafana. Qangiroo moo fannoo suani oosana qaanaindari kaqi marira Anutuna akarainaina uqirafa anireenoo ufai rafaaqafimaru qangiroosa naaramasee qimanniminoo qinau. Anutufa inniara ufainnai maqa faqa ooruku nammari faqa mandaikamma nimaqaannee qifaqa eekaa kaqikaa qoo kaqi marifaqa qinee Anutuna ainainira faiqiuqa niqinaaqa Anutuna akara rumasaanaqa miqoo maqa faqa ooruku nammari faqa saqariuqa faqa ufai quqasaifanoo firaaqoo uqinoo mandaikamannimaqaani. Mi qangiroofa miqi qimasoofaqa Anutuna faiqi namu maqasaaqaraasa niqinaaqa akara rumasoofanoo moo fannoo asaana rumasee kooroomasee qimaqiminoo qinau.

4 Isaraeena aiku asaukukiqari aiqama moodaanaki quqaseenoo wan handareeta faqa footi maqi tauseenna faqa (144,000) fifau nukudara foorammiqa mariqau. Miqimasee marunaki mi namusa kai niqinaaqa akara rumannimaqaseenoo Anutunaindi marifanoo ufai fannoo sia naruanifeera rumannimaqanau. 5 Isaraee maqaanna faiqi namu niqinaaqa akara rumannimaqaqoosa misa naadu naadu oosaa oosaa kai mariqau. Yudana aiku asaukukiqari (12,000) tueerufa tauseenna moomoo Anutuna akara niqinaaqa rumannimaqanau.

Reeubeenana aiku asaukukiqari (12,000) tueerufa tauseenna moomoo Anutuna akara niqinaaqa rumannimaqanau.

Kadana aiku asaukikiqari miqi kai maseenoo 12,000 rumannimaqanau.

6 Aseerana aiku asaukukiqari miqi kai masee 12,000 akara rumannimaqanau.

Napatarina atiuqa marusa miqi kai masee 12,000 akara rumannimaqanau.

Mannaseena aiku asauku marusa miqi kai masee 12,000 akara rumannimaqanau.

7 Simeeoona atiuqa marusa miqi kai masee 12,000 akara rumannimaqanau.

Reefina aiku asauku marusa miqi kai masee 12,000 akara rumannimaqanau.

Isakeena atiuqa marusa miqi kai masee 12,000 akara rumannimaqanau.

8 Seeburuna atiuqa marusa miqi kai masee 12,000 akara rumannimaqanau.

Yooseefaana aiku asauku marusa miqi kai masee 12,000 akara rumannimaqanau.

Beensaminna aiku asauku marusa miqi kai masee 12,000 akara rumannimaqanau.

Miqimasee mi qangiroofa Isaraeena aiku asaukukiqari moodaanaki mara ruqaumaseenoo 144,000 fifau nukudara foora Anutuna akara niqinaaqa akara rumannimaqanau.

9 Qinee Yoohaneesa mina qafamaseeqa quandaki qafaafana moo suqirafa marinau faiqí anaasee firaaqoo qusimariqau. Sia faiqí moo fannoo nisaanarirana amana moomoo uqanna mariqau. Misa aiqama firaa maqannaasakiqari faqa kaqikaa maqannaasakiqari faqa aiqama fasiqa anaaseekiqari faqa aiqama ufakiqari faqa Anutuna qaari oorinni sipsipa aanaaqi oorisaa aiqama ufa qimarusa kikiqammafiqau. Misa qamunna eekara afisirausa aufaqaa saqari asaana uqirausa Anutuna oorisaa kikiqiqau. 10 Miqoo kikiqiqa maridaqa maaqi qimasee Anutunara firaa kari qimamiqa qiqau. Maasa Anutufa rakisira qaarisaa ooqumarifuananoo sipsipa aanaaqi faqa anisaaqaraana kai maasa naaru marirana maraidaqee qiqau. 11 Miqi qimasoofaqa uriqararausa Anutuna rakisira qaari atimau fiqu fiqu iqa marusa faqa qaara faqa qaara faqa aandau marusa faqa marufaqa misa fiqu fiqu iqa maru qangiroosa misa kai maqasaa noorindari aqufufaqa Anutuna amooqiqa qiqau. 12 Kuqaa amooqirana faqa areenarana faqa irirana faqa dufi dufi qirana faqa auqu uqeerarana faqa uriqararana faqa afeeka faqa naaru naaru maasa Anutunaindi kai maridaqa. Kuqaa fee qiqau.

13 Qaari fiqu fiquqiranakiqari uriqarausakiqari moo fannoo quandaki qini Yoohaneesa irammirinoo qinau. Maa fasiqa anaaseesa yaindaraasee eekara qamunna afisirausa aiqama ufa qimarusakiqari ani maridee qufaqa qinee qiqiafana. 14 Sia qinee iridaqa anee qimaqimia qiafananoo mifa kooroo qimasee qimaqiminau. Maa fasiqa anaaseesa Anutuna ufamau fimarusa minasaara narirana maree marusa minakiqari amiqimasee ani marusa maridaqa. Misa nári ikairi aanaaqi qamunna sipsipa aanaaqi Yisuna fidikaki nári qamunna nammaruqusee eekara arufifaqa afisusee maridaqa. 15 Minara misa faasaana faqa eendaki faqa Anutuna naaquqara maqaki narí rakisinnimaqee maru qaarina oorisaa kikiqammambi eendaki faqa faasaana faqa amooqidaqa. Qaarisaa marifa Anutufa narí kai misa ititannimaqaannoo. 16 Ititannimaqaidanoo sia kafaa misa naara raannoo, sia nammariara nidiannoo, sia suani ididirafa nifaaqai naruannoo. 17 Sipsipa aanaaqi rakisira qaari qambaanai marifa mifa misa rakisirafa marinoo misa nifiqee munusainaqa kaqi marira nammari maqakiqari radiqisee ururee mariqoo neefaranoo. Anutufa misa naukunu rukasaina misa ikiraqarafa taikaannoo.