1 Qinee Yoohaneesa miquna qafamaseeqa quandaki moo ainaina qafaqiafana. Innaarunai firaaqoo kooroo ira ainaina kikiqusirafa kambiqoofaqa qafaqiafana, anaasee moo fannoo suani afu miqira kurusa afisusee maru qafaqiafana aikuqara quqoonasaa ranoo marufaqa qafaqiafana mina akiaqaki afisira qafeesaa qisaukuqara taikasee qiku ooqu qaaraqanda marasee fasaunamu mina qafeesaa qeemaru qafaqiafana. 2 Mi anaaseefa amuaqu uqaikinoo marufa innaamunara aurinoo aupureenoo faaqa rinau.

3 Faaqa rimarufaqa qinee quandafi moo ainaina innaarunai mari ainainna kooroo ianinnana qafaqiafana. Qaareena qinaakuna qafaqiafana mina afaaqa aiqama taatuqee arinoo marinau mina akiaqa aambumanamu qisauku dinni taikasee dinni ani qaara marasee akiaqafaqaafa marinau. Aiqama akiaqasaa qafee afisinoo marinau, mina akiaqaaqa aanai qisaukuqara taikasee marinau. 4 Mina ameesa fannoo innaarunaidaraa fasau moomoo nukudara foora rarisameeqeenoo maqai aqimarinau. Mi qaareenafa amuaqu uqaikira anaasee oorisaa kikinoo maridanoo faiqi maqasainanoo nambiqarara rakisidanoo. 5 Mi anaaseefa akoonaiqi maqasoofanoo findifinoo qainna auqira samu qumareenoo aiqama aanaamurusaa rakisi nimaqaaninnana maqanau. Mi anaaseefa akoonaiqi maqasoofanoo Anutufa qaareena naandoo qimasee aranaiqi rafusueeqeenoo innaarunai narí ufa irira qaarisaa quqasoofanoo marinau. 6 Miqiufanoo mi anaaseefa quqasee qaareenara rufiasee sandee aadana maqa maaqaki Anutufa deedaqammaqoonaki oonu marinau. Qaaramoo aukuana faqa moo aukuana atisaa faqa Anutufa miqoo rakisinau.

7 Qinee Yoohaneesa qafeemariafananoo rakirafa innaarunai kambiqanau. Dinni qangiroo karaambaiqa mina auqu Mikaraafa Anutuna qangiroo namufaqa dinni qaareena narí manda qangiroo namufaqa maridaqa innaarunai rakimariqau. 8-9 Mikaraafa Anutuna qangiroo namufaqa afeekaikamasee qaareena rafaaqafuseenoo narí faqa narí qangiroo namufaqa rafuseeqeenoo innaarunaindari maqasaa aqusanau. Anutufa aniara sia maaqooqari maaqoo mariannee qifaqa ani maqasaa rafusueeqee aqida fee qimasee aqusanau. Mi qinaakuna qaareenafa ooqai sakani marufa aiqama maa maqanasaaqaraasa ueeqee marufa marinau. Mina auquara Afaanna firaafa Sadannee qinau.

10 Mikaraafa Sadanna maqasaa aqusoofaqa qinee Yoohaneesa qifu pisipasamasoofaqa innaarunai maridara fooqaana qafaafananoo ufa moo firaa kari nameera qinau, Anutuna asumu maree mariafa doo animaridanoo. Doo maqee Anutufa narí Karaambaiqa afeeka kooroomaseenoo. Doo maqee mina asauku mundirafa narí aanoo doo uqannifiqeenoo. Doo maqee maasa qikaqaafasaauqa maqasaaqaraasa nikaruqirafa eendaki faqa faasaana faqa Anutuna afusaa munuqi miniqi marifa Sadannafa innaarunakiqari aranaiqi futeeqa rafusueeqeenoo maqasaa doo aquseenoo. 11 Maasa qikaqaafasaauqa maqasaa fasiqauqa Anutuna sipsipa aanaaqi kuqu fidikanannai doo Sadannana uraaqareenoo nári Anutuna anoona ufara kuqunannai faqa mina uraaqareenoo misa mi ufanara narí mariranara sia anoonee qimasee kaqi kuqiraree qimariasa maridaqa. 12 Ufa firaaqoo kai qidanoo qinau. Innaarunaki mari ainainausa innee aiqama asasiaqa Sadannafa inniki marifa doo maqai aqufinoo. Innee maqasaa mariasa faqa ooruku nammariki mari ainainna faqa innee rufiaida mariaqa. Afaanna firaafa inniki ooqu finoo mina aanoo firaafa mariannoo narí qusasaa marianinnanara iriseenoo mina aanoo firaafa mariannoo fee qinoo.

13-14 Qinee Yoohaneesa mi ufana iriseeqa quandaki qaareena maqasaa qafeeqa. Qaareena qinaakufa doo maqasaa aqufinoo maridano qafeenoo aanoomaseenoo quandaki faiqi maqoo aanaaseena arunaaneera afaqanoo fufanoo Anutufa firaa quqaumu aqoosa qaaraaqanda amufanoo qaqamareenoo aadana maqasaa Anutufa deedaqammaqoo maqanasaa aqufinoo asumu marinau. Qaaramoo aukuana faqa moo atikai marasoofanoo Anutufa rakisimarufanoo qaareena fannoo mi anaaseena ariranasaa Anutufa ititeemarinau. 15-16 Qaareena fannoo mi anaaseena qafamasee aanoo qufanoo mina ookiqari nammari moomoo aufinau. Nammari aufinoo mi anaaseena mi samuna aruanifeera fufanoo maqa fannoo mi anaaseena soodaaqinoo maqa oo raqafufanoo nammari minaki kai keeqanau. 17-18 Qaareena fannoo mina qafoofanoo firaaqoo uqanna aranaqoofanoo quandakinoo mi anaaseena ati aiku asauku marusa aiqama Anutuna aauqira sandufamau fimariasa Yisuna kooroo ira anoona ufamau fimariasa faqa naruanee qimasee fufa ooruku nammari afainni kikiqinoo marinau.