1 Qinee Yoohaneesa qifu pisipasamandoo innaarunai maridaqara foora qaareena ooruku nammari afainni kikiqinoo marufaqa qafamasee akara rumaqaafananoo. Mifa miqoo kikiqinoo marufanoo ooruku nammarikiqari kaasau aandau moo fannoo ururoofaqa qafaqiafana. Mi kaasau aandauna aanai qisaukuqara taikasee marinau mina akiaqa dinni qisauku taikasee dinni ani qaara marasee akiaqafaqaafa marinau. Aiqama aanaisaa karaambaiqa qafee afisinoo marinoo aiqama akiaqamau narí Anutunara fidiqaaira manda nuquqa akararinoo marinau.

2 Mi kaasau aandaufa firaa kusina fooqaatia faiqí narimarifa marinau. Mina aiku firaa samaada aikuara foora marinau. Mina oo aamara raioona oo aamara fooqaafa marinau. Mifa ooruku nammarikiqari ururoofanoo qafamaseenoo qaareena fannoo narí afaaqai maru ainainna mi kaasau aandauna ooruku nammarikinaana aminau. Narí rakisira qaari faqa aiqama maqannaasa rakisirana faqa mi kaasau aandauna amisoofanoo rakisinnimaqanau. 3 Mi kaasau aandaufa marufanoo moo fannoo mina akiaqaki moo arufanoo kuqinoora fooqaana maseenoo aru afaaqana ateekaqoofa unufufanoo kaifaa findifinoo nammarikiqari ururoofaqa qafaqiafana. Aiqama maa maqana afaaqasasa mariasa mifa findifuna qafamasoofanoo naaquqoofaqa aiqama mina ufamau kaimbiqau. 4 Qaareena fannoo firaa uriqarara afeekana kaasau aandau amunara minara aaqee maria fasiqa anaaseesa qaareenara innaaru qidaqa amooqi mariqau. Misa kaasau aandau oorinni faqa innaaru qimasee amooqiqa qiqau. Yafee maa kaasau aandauna amana maridanee. Sia uqanna. Yafee mina ariraramasee aruannoo fee, sia moo fannoo amana arifara.

5 Mi manda kaasau aandaufa aiqamai rakisidanoo mandufa uqanna oosana oosana ufa qimarufanoo Anutufa sia qaoo qinau, qaara fasiqa niku nisauku taikasee moo fasiqa oonu qaara marasee quqoonasaa kaqi maridanoo mina kai qafee marinau. 6 Mi kaasau aandaufa Anutuna faqa mina auqu faqa manda niqurarara niquraree marinau. 7 Mifa Anutuna aiku asauku faqa rakinoo rafaaqafinau. Mifa kaqikaa maqannaa faqa firaa maqannaa faqa aiqama ufa qimariasa faqa aiqama maqusanaasa faqa rakisimarufanoo Anutufa sia qaoo qinau kaqi kai qafanau. 8 Aiqama maa maqa maaqana afaaqasasa mariasa mi kaasau aandaunara Anutufara foora innaaru qimasee amooqifaranoo. Misa nári nuqu kaqi marifandinausa Yisuna bukaki akara rimariasa misa kai sia amooqifaranoo. Ooqai maa maqa maaqana sia maruqoo Anutuna sipsipa aanaaqi kuquna bukaki nuqu marisa kai sia kaasau aandau amooqifaranoo.

9 Aiqama naaqoo faqaasa ufa iriaqa. 10 Kasooqaqee kaasau aandau Yisuna ufasaara naruaninausara Anutufa ooqai irinau. Kaasau aandau fannoo rumbaaninausara faqa ooqai irinau. Mi narira aukuannai Anutuna ufa iri mariasa sia rufiasee minnisaaqa afeekaikamasee uaqee iaqa minasaa mundufi firana faqa kaqi kai fuaqa.

11 Qinee Yoohaneesa mi kaasau aandauna qafamaseeqa quandakufaqa moo kaasau aandau maqakiqari ururoona qafaqiafana. Mina aanai qaaraqanda sipsipa aanaira foora ururanoo marinau. Mina ufa fannoo qaareena ufa qimarinau. 12 Sipsipa aanaikirafa indaaruqaa kaasau aandau oorisaa kikiqammambi mina afeeka firaatia maranau. Mifa aiqama maqa afaaqasasa mariasara indaaruqaa kaasau aandaura amooqiaqee sia amooqifaqa naruanauree qinau. Mi indaaruqaafa kuqiraramasee afaaqa ateekarafa qunufunara innaaru qida amooqiaqee qinau.

13 Sipsipa aanaikirafa inaaqianna aandau fannoo aiqamausa nifusaa faiqí sia auqaaqaa ira ainaina auqinau, aiqamausa nifusaa innaarunaindari ida fannoo maqasaa aqu fuannee qufanoo aqufinau. 14 Mifa indaaruqaa kaasau aandau oorisaa faiqí sia auqaaqaa ira ainaina auqusoofanoo minannai maqasaaqaraasa aiqama nikaruqinau. Miqidanoo mifa aiqama maqasaaqaraasa qimanniminoo qinau, Innee afaaqa ateekasoofanoo kuqiraramandee findifuna amana auquaqa. 15 Misa auqusoofanoo sipsipa Anutufa uqeeqararee qimasee narí namuqaa qumee afeeka amufanoo aanaikira aandau fannoo unnaqimasee narí afeeka fee qimasee aidoo indaaruqaa kaasau aandau amana auquqoonaki aidoo fuaqasoofanoo mina amana fannoo faiqiara foora ufa qinoo nariara sia innaaru qimasee amooqusa kuqa narinau. 16 Sipsipa aanaikira aandau fannoo narirarufaqa aiqama maqannaasa kaiqeesa faqa uriqararausa faqa ainaina faqaasa faqa kudifasiqa faqa rumbee mariasa faqa idukimariasa faqa aiqama narí akara nári nisauku uqannai fee niqinaaqafee akara rumannisanau. 17 Mi akarana sia marinausa sia ainaina nimisee mina akiaqara feefauru mareefaranoo, ainaina faqa sia amana munnimma aqusee mareefara. Mi akarana oosana kaasau aandau mina auqu nambaqa mariannoo.

18 Irirana faqaasa maa ufana iriaqa. Irirana faqaasa mi nambaqana kaasau aandau nambaqa oosana irifaranoo. Mi nambaqafa faiqí auqu kikiqammusidanoo. Mi nambaqafa maaqimminoo maridanoo. Sikisa handareeta faqa sikisti sikisa faqa maridanoo, (666).