1 Námane bakode, amó ra, aĩ, Apolos ra, aĩ, Pita ra gigiguturota mo, “Númane tefo, Keriso da buro kakato re, kotú God da kivu gagada vesa kakato re.” aghá nundubasiravore! 2 Avore, amó embó avodava buro aita asira mo, gaa bee nuenembo urota, aná embóda uno rouvia aghagonu ambo-ambo asire. Avore, amó Kerisoda buro ari gaa radora mo, amó gaa bee urota, Keriso da uno eta rouvia nuenembo ambo-ambo asire. 3-4 Anda buroda gorotova andufa ari akuago jo itatama ambi re. Tago, Jojabee unuka unona anda ari-bari iruraita rouvie. Amindu anda ari-bari andufako jo irurambi aitare. Kotú, enembo einimi amó iruradua, amó jo oru ambi re. 5 Aghá-gea, fefera bee furá bubambi irota, dibe kena enemboda akuago mania inona irurata! Nímane kaifa egegutu-gea, fefera bubota, Jojabee na furá bubua, enemboda ari akokogo unona iruraita rouvie! Fefera aghade, enemboda unode nundubaride númanda neno rova nungari vitia, aná Jojabee na furá bua itota, isaghava bubaita rouvie. Jojabee, umó ananu gerurota, avona taubana vitia-du, raga raita rouvie.

6 Anda ikoko mendi, ariri gharovu, nímandu rea, God da Gaga daiyagha rari vitia-da beenu iruguturota, beforo isagha ari gaga, Apolos angá anda irarinu isuri etora-nu nundubadi rere! Rourogo beforo ririkigari dabakodu raga rirota, einida tamova gaa, regegara-degea rere! 7 Avona ritata, nímane babarigari ea, enembo dano nímanda barirarida tuva aghago reisi-rere? Donu inda righia vitera, aná God da vesa re. Jo inona doda bambi reta, mania “Anona tofo utata siroruta.” regegata!

8 Bakua, námane doa serigea, nímane seibe gugua-ghayafade enembo egegea, kini aghago ea vitera, aĩ? Avore, nímane sei kini ea iririgasira mo, amó “bakua!” rasire. Anada bee mo, namonde amó God da kambesiva kini kotú kokotofu egegaita rosore-gea, nímane seibe kini egegasira mo, námane beago kini ea iririgasire! 9 Tago, námandava aghago jo sirorambi eta rouvie. God námane Iesu da aghi kakatodu ená buroda bouvu ututurie. Námane mo, eto-bato ari-bari akokogo enembo dumeni, gavanami enemboda dibeva dedegota amburaita rosora, aghago re. Námanda mema ená roo endava enembode kotú anera manede dano isaghava gigigeta rousue. 10 Námane Keriso da ragarova minono reaveta endava enembomi, “Beforo dinunu embó eini re,” regeguturota kuvia gegha regegeta rousue. Tago, nímanda nundubariva, “Námane Keriso da natofo ea vitera-du, beforo rauko etue.” Aná gaa bee ra, aĩ? Tefo re. Námandu mo, “Ano tefo” rirota, endava enembomi nímandu ano kakato gaa regegeta rousue. Endava enembo nímanda irari gerurota, nímane kakara eta rousue. Tago, námanda irari gerurota, kuvia gegha regegeta rousue. 11 Tutunova reta etia oreki, námane baimanagha uvudu ukó sarai egegea, dighari ombari sasarinu asusugea deĩ eta rosore. Aghade, námane dea ga egegutueta, kambo tefo biruru eta rosore. 12 Eka 18:3Námanda ingomi buro fakara urota, námane andufa sonembeta rosore. Námane avona simboro ari mo, God na númane ea simbugari-du reta rosore. Kotú námandu bouvu mema ututurari mo, námane ano ea, jireta rosore. 13 Kotú námandu unongu regegari mo, námane mino númandu neno barimi reta rosore. Aghade, tutunovareta etia oreki dabako aghago roo endava enembomi námandu daghari betari gaa regegeta rousue.

14 Ená ingiso jo nímane meka gigigadi rea gembambi re. Tago, nímane anda sasingu aghago ea vitera-du, nghaĩ ititurota, rei-gefere. 15 Avore, Keriso da ekaresiava* nímanda kaifa kakato 10,000 aghago tatambugasira-jogo. Tago, nímanda afa mane aná jo oruabe irambi re. Gaa bee re, amó Iesu Keriso da Gaga minono rieta, nímane gaabee urota, anda sasingu egegutureravore. Kotú amó nímanda afa aghago ea vitere. 16 1 Ko 11:1; Flp 3:17Amindu, anda aito daiyagha fafoturadua-nu gigiguturota, dabako aghago egegadi rere. 17 Aghá-gea, Timoti anda mendi tofo aghago reta ninengetueta nímandava reiye. Umó neno buta rore. Kotú umó Jojabeeda buro ea goghó eta rouvia embó eini re. Ekaresia niavo niavo fugea vitia-dava donu irugeta rora, kotú Iesu da ambo-ambo urota, aito daiyagha fugeta rora-nu unona rekago iruguturota, nímane nundube-nundube egegadi rere.

18 Atá, nímane enembo dumeni, amó nímandava esega furambi ari gaa rirota, nímanda irariva deriva egeguturota viteravore. 19 Avotago, Jojabee “avore” radua, amó tutumi ya, nímandava bubua, gaa ningambi rousua enembodava ano mo domi irieta, gaga tefo-tafo reta rousua, ananu andufako tava ea tambaita rore. 20 Anada bee mo, God da natofo* kaifa ari o emboro taubana irugari, jo gaga vivimi ata sirorambi aita rouvie. God da anomi siroraita rouvie. 21 Atá, nímanda uno doro? Amó jarinu bua ya, nímane anami dara aĩ, durumugaride neno bari siriridenu bua yara?