11
1 1 Ko 4:16; Flp 3:17Amó, Keriso da ambo-ambo urota, unda aito fugituria aghagonu roreta. Nímane beago, anda aito daiyagha rei-fugitora, aghagonu egegadi rere!
11:2-16 Tafaroro Arida Agho Dari Re.
2 Amó nímandu raga rirota vitere. Anada bee mo, amó tumanadu nundubuturota, donu rirera, kotú iruguturera dano righia, aghá urota viteravore.
3 Tago, gagada mendó eini nímane gia tanana egegadi uno rora aná evere. Embobo nanjogoda Beforo Righari aná Keriso re. Kotú embobo, aná evevetuda beforo ririkigari re. Kotú Afa God, umó aná Keriso da beforo righari re.*1 Korin 11:3-16 enava ekaresiada* nundubari ungagha vitie. Nundubari eini eghá re. Pol kakara arida gaga reirie. Evevetu numu mane kakara egegasue. Embobo Keriso kakara egegasue. Pol evevetude embobode daiyagha kakara arida aito fufugegasua-nu rirota, Korin enemboda abua maneda kiki nundubuturota, nghaĩ ititurie. (Aghá-gea, namonde amó Baruga enemboda kakara daiyagha eta rousua-da aitonu fufugegasire.) Nundubari eini aná eghá re: Pol jo Korin enembo nuenembo nundubuturota gembambi re. Unda kasava asugari gagade feuka asugari gagade namonde amó nanjogodu gefirie. Tago, ekaresia nanjogo PNG enava gogorego jo aghá nundubambi re. Númanda nundubariva naa enemboda kakara arida aito fufugegari-du reisi-rie. Avore, Pol da gagada mendó jojabe mo, namonde amó dano Keriso ungá Afa God ghada gaga ambo-ambo urota, kakara egegore! Aghagonu, evevetu numu mane kakara egeguturota, embobo God kakara egegoe! 4 Avore, embó avona kasava ombea ya terua, tumogha baĩ adua, o benunu adua, o minono radua, aghá adua-mi, Keriso meka gaita rouvie. 5 Kotú evetu avona feuka jo ombambi, ya terua, tumogha baĩ adua, o erea jiria benunu adua, o feroveta aghago ea, God da Gaga isaghava minono radua, avore, aghá adua-mi, numu meka gaita rouvie. 6 Feuka ombari uno ambi adua mo, unda fouma arugasue. Tago, unda fouma arugasua-mi meka gasua mo, feuka ombari-du rere.†Avore, Pol jo evevetuda fouma arugarida gaga rambi re. Tago, Grik enembo Korin anava, númanda kiki mo, emborova kombo yagera eta rousua evevetu nuenembomi fouma arugeta egeguturie. Pol fouma arugarida gaga rirota, ininigha isuri eghá urie. Ekaresiada* rorova evevetu dumeni numu mane kakara ambi egeguturia-du, fouma arugea meka gigigasua aghagonu, meka gigigasua-du rirota ririe. 7 Gen 1:26-27Embobo kasava asugambi aita rouvia-da bee, aná evere. Sei embónu God na eto-bato umongo urota, unda durogha isagha ari-du rea, embódava ututurieta siroruturie. Tago, evetu mo, numuda durogha isuri ari-du rea, urieta siroruturie. 8 Gen 2:18-23Anada bee mo, God jo evetuda siruru einimi bua ata embó sirorambi re. Embóda siruru eininu bua urieta, evetu siroruturie. 9 Aghagonu, embó jo evetu sonembari-du rea, ata sirorambi re. Tago, evetu mo, numu sonembari-du rea, urieta siroruturie. 10 God da anera namonde amó gigigeta rousua-du, evevetu númanda feuka mane ombebegasue. Aghá urota, númanda numu mane kakara urota, númanda rari ningita rousua-nu isuri egegaita rousue.
11 Tago, Jojabeeda natofo namonde anda irari eghá egegeta rosore. Evetu embógha jo númane unuka airo-airo deĩ ambi egegeta rousue. Ungá danode takembea irirota, mino-mino sonembeta rousue. 12 Anada bee mo, God sei aná embónu urieta siroruturie. Anada ambova embóda siruru einimi bua urieta, evetu siroruturie. Tago, oreki embobo nanjogo dano evevetuda fufumbugari re. Aghá re-tago, evevetu, embobode dano númanda ruru aná Afa God umó re.
13 Nendufa gigigea, tanana egegadi rere. Evevetu beforova feuka jo ombambi ya terua, God du tumogha baĩ urota, isaghava jiria, benunu adua mo, taubana ra, aĩ tefo? 14-15 Natofo abua-abua seibe eghá nundubeta egeguturie, “Embóda fouma vitia badurube adua, umó undufa meka gaita rouvie. Atá evetudava unda fouma badurube adua mo, unda gari taubana bee durogha aita rouvie.” Anada bee mo, unda beforo gajari-du rea, God na unda fouma ututurie. 16 Aghá rera-du, avona feuka ombarida gorotova o kasava asugarida gorotova besiga adua mo, undú eghá rere. God da ekaresiade* tofo námane beago, dano aghá egegeta rosore. Amindu oreki beago, dabako aghagonu aita rosore.
11:17-34 Jojabeeda Banau Re.
(Matyu 26:26-29; Mak 14:22-25; Luk 22:14-20)
17 Atá, oreki amó gaga eini raita rore. Amó jo nímandu raga rambi aita rore. Anada bee mo, nímane God du tumogha baĩ urota, enembo sonembasiravore-tago, nímane dara ea, besiga eta rosora-mi, enembodu mema ututa rosoravore. 18 Dara jojabe eini anda niningara, aná evere. Nímane tafaroro aita rea, danode egegeta rosora aghade, totofo rorova sarigea, besiga egegeta rosora-nu ningia, gaa bee aghago nundubutare. 19 Tago, besiga egegasira-jogo! Anada bee mo, besiga egeguturota, gaa bee avona reiria, o gavera avona reiria, ananu tutumi isagha ata gigigaita rosore. 20 Tago, nímane danode egegea, totofo nímanda undari undidigadora, aná jo Jojabeeda Banau reta undidigambi aita rosoravore. 21 Enembo eini gare garegha aita rouvie. Kotú enembo einidava undari tefo-gea, umó baimana itatama aita rouvie. Atá, kotú enembo eini umó uvu fakara jojabe undia beforo biruru aita rouvie. 22 Nímanda kambova sei undari undia, furá Jojabeeda Banau kakara durumugea undidigadi rere! Imó inda undari-bari taubana guri jojabemi utua bua ya diradi-gea, inda kasava makasi enembo meka gigigaita rousua, jo taubana irambi re. Aghá urota, God da Ekaresianu* injigha eta rosoravore. Ari-bari aghago, egegeta rosora-du, amó nímandu daiyagha raga ra? Tefo bee tefo re.
23-24 Jojabee Keriso da Banau daiyagha egegasira-da irugari unona andava ututurieta bua, seibe nímandava ututurere. Tago, rekago oreki irugaita rore. Judas Iesu bua, gitofoda ingova utambi irirota, Iesu na turiride farava bua, God du aiye rea righia ingegebea ututurota ririe. “Ená anda tamo reta, nímandu rei-ututoreta bua undidige! Enanu urota, amonu nundube-nundube egege!” 25 Ex 24:8; Jer 31:31-34; Ex 24:6-8Undari undidiguturia-da ambova, vaini da aagha beago bua, númandu ututurota, eghá ririe, “Ená aagha anda tatangu re. Anda tatangu enami God dava yari emboro* reka ifegaita rouvie. Nímane, niavo danode ea undidiguturota mo, amonu nundube-nundube egege!” aghá ririe. 26 Avore, fefera inono niavo-niavo aghá urota, ená faravade vaini de bua undidigaita rosora-mi, unda amburarida bee iruguturota nundube-nundube urota iririguturadi-gea, Jojabee kaverea furoe!
27 Atá avona, unda neno roo jo simbugambi irirota, Jojabeeda Banau kakara undadua, unda yavi aghá aita rouvia-mi, Iesu da Tamode Tatangude bebeta aita rouvie. 28 Amindu, nímane inuka inuka inda ari-bari akokogo sei neno rova vitia-nu irurea simbugea, anada ambova undadora, aná avore. 29 Anada bee mo, umó avona Jojabeeda tamoda bee jo tanana ambi irirota, neno righambi faravade vaini de bua undadua, God na umó irurea, bouvu utota, itatama aita rouvie. 30 Aghá rera-da bee mo, nímane jo aghá egegambi uta-du, dumeni kae akokogo bubugea iririgutueta, dumeni reisi-ambubugutoravore. 31 Avona, unda ari-bari akokogo undufa irurea, neno roo simbugadua, God jo aná embóda ari-bari akokogo irurea, mema eini utambi aita rouvie. 32 Tago, God namonde amó gaabee ari kakatodava mema utua irureta rouvia-da bee mo, rourogo namonde amó ambova endava enembode dano mema itatama urota amburara-degea rea, aghá rouvie.
33 Aghadu rea, anda ikoko mendi, ariri gharovu, Jojabeeda Banau kakara undaita rea, furá danode egegadora mo, mino-mino kaifa urota, asumbea undidige! 34 Atá, imó, avona baimana itatama adora mo, inda kambova undari avo undia, anada ambova Jojabeeda Banau undaita danode totorugaita rosoravore. Rourogo, God na nímane irurauve-degea, amindu rere. Avore, nímanda gaga dumenida mendó anona ya, nímandu irugaita rore.
*11:3 1 Korin 11:3-16 enava ekaresiada* nundubari ungagha vitie. Nundubari eini eghá re. Pol kakara arida gaga reirie. Evevetu numu mane kakara egegasue. Embobo Keriso kakara egegasue. Pol evevetude embobode daiyagha kakara arida aito fufugegasua-nu rirota, Korin enemboda abua maneda kiki nundubuturota, nghaĩ ititurie. (Aghá-gea, namonde amó Baruga enemboda kakara daiyagha eta rousua-da aitonu fufugegasire.) Nundubari eini aná eghá re: Pol jo Korin enembo nuenembo nundubuturota gembambi re. Unda kasava asugari gagade feuka asugari gagade namonde amó nanjogodu gefirie. Tago, ekaresia nanjogo PNG enava gogorego jo aghá nundubambi re. Númanda nundubariva naa enemboda kakara arida aito fufugegari-du reisi-rie. Avore, Pol da gagada mendó jojabe mo, namonde amó dano Keriso ungá Afa God ghada gaga ambo-ambo urota, kakara egegore! Aghagonu, evevetu numu mane kakara egeguturota, embobo God kakara egegoe!
†11:6 Avore, Pol jo evevetuda fouma arugarida gaga rambi re. Tago, Grik enembo Korin anava, númanda kiki mo, emborova kombo yagera eta rousua evevetu nuenembomi fouma arugeta egeguturie. Pol fouma arugarida gaga rirota, ininigha isuri eghá urie. Ekaresiada* rorova evevetu dumeni numu mane kakara ambi egeguturia-du, fouma arugea meka gigigasua aghagonu, meka gigigasua-du rirota ririe.
11:7 Gen 1:26-27
11:8 Gen 2:18-23
11:25 Ex 24:8; Jer 31:31-34; Ex 24:6-8