1 Timoti du
Pol Unda Ingiso Sei Timoti Du Gefiria, Aná Evere.
Pol unda ingiso sei Timoti dava gefiria, aná evere: Timoti da nue mo, Jiusi evetu re. O numamo mo, Jiusi enemboda gitofo, Grik embó re. Pol Iesu da bingá minono ririeta, Timoti ningia, gaabee ea, bafutaito urie. Urieta, Pol na Timoti unda mendi aghago bua kaifa urie. Pol unda sei Timoti dava gefiria ingiso, umó jo diburava irirota gembambi re. O unda ingiso ambo kena gefiria mo, umó diburava irirota gefirie.
Enembo dumenida nundubariva, Pol fefera dabako Rom anava dibura ari nundubeta rousue. O enembo dumenida nundubariva, Pol fefera ungagha Rom anava dibura ari nundubeta rousue.
Avore, umó fefera ungagha dibura ari aná gaa bee irasua mo, umó sei dibura uria-da ambova, isaghava deĩ urota, aghajora ghaeko* 63-65 Iesu siroruturia-da ambova gefirie.
Timoti mo, fristi* aghago o Iesu gaabee eta uria enemboda barirari aghago urota, ekaresia* dumenida beforo righita urie. Aghá urota irieta, Pol ená ingisova ekaresiada irari, kotú buroda gaga dumeni-dumeni nghaĩ ititurota, Timoti dava gefirie.
Pol Ená Buka Gefiria Gagada Mendó Mane, Aná Evere:
1:1-2 Pol na Timoti ghanena uria re.
1:3-20 Timoti daiyagha God da Gaga bee o Irugari bee nuenembo irugasua-nu Pol na nghaĩ itituria re.
2:1-15 Kuristini daiyagha God tumogha baĩ asua-da aitonu isuri uria re.
3:1-16 Namonde amó, Iesu gaabee ari enemboda babarigari o ogababada gategaita adora mo, númanda irariva gerurota gategasire.
4:1-6:21 Pol na Timoti daiyagha asua, o ekaresia daiyagha kaifa asua, kotú ari donu injigha asua-nu isuri uria re.
1
1 Ariee, anda mendi, God namonde anda sonemba kato na, kotú Iesu Keriso namonde anda kaifa gigita arida ruru na ririeta, embó eini unda aghi kato ea vitia, aná amó re. Imó ghanena bee rore. Yata bua gi! Amó Pol re. 2 Eka 16:1Timoti, imó gari re. Anona arera, minono ririeta ningia, imó gaabee ea, anda mendi aghago ureravore. God Afa kotú angá anda Jojabee Iesu Keriso da sonembade, kaveverade, kotú siriride utota badi!
1:3-11 Pol Na Namonde Amó Irugari Gavera Kakatoda Agho Dari Ningauve-Degea Riria Re.
3 Amó Masedonia Frovensiva irurota, indú donu rirera, dabako ananu rekago raita rore. Imó Efesus irirota, enembo avona irugari gavera irugeta rouvia ananu radi-gea dodogari-du rere. 4 Ená enembo rera, númane evovo kikinu iruguturota gaa bee gaa rea, anade dano nuabua maneda ragarode kikide iruguturota vitie. Aná irugeta rousua kikide gagade dano rege-gea, dodogoe! Anada bee mo, númane aná gagada beenu rea niningiguturota, besiga urota, jebuga eini jo tambambi eta rousue. O God da uno mo, enembo undava yari emboro ifegea vitia-nu, gaabee ea, unda sasingu egegasue. 5 Amó aghá adi retora-da bee mo, amó uno rore: anava vitia enemboda neno evurari gaga inona radi, neno simbugea númanda ari akokogo karigea, gaabee ea goghó egegasue. Aghá urota, númane mino-mino neno rururota iririgasue. 6 Enembo dumeni ari-bari aghago dotuturota, emboro kasoviguturota, tefo gaga nuenembo reta rousua, anada bee eini tefo re. 7 Aná enembo rera-da uno mo, númane God da Agho Darida irugari kakato egegasue. Tago, númanda mana-managha rambi eta rousua gaga, anava bee tefo re. Númane donu reta rousua-da bee jo gerurota, tanana ambi eta rousue.
8 Namonde amó tanana rosore, Agho Dari aná taubana re. Amindu Agho Darida emborova igigasira, aná taubana re. 9 Tago, Agho Dari jo ari taubana ari enembodu utambi re-tago, enembo Agho Dari nundubambi urota, gogore eta rousua enembodu, God nundubambi urota, ari-bari akokogo eta rousua enembodu, God da jebuga, kotú Asisida jebuga jo nundubambi eta rousua enembodu, avona nue numamo deaveta ambuta rousua enembodu, kotú enembo dumeni kae righiaveta ambuta rousua enembodu, God unda Agho Dari ututurie. 10 Aghade, avona kombo yagera eta rousua enembodu, o nino okade kombo undiri eta rousua enembodu, enembo avona kokomana nandia bua iiava utua guri buta rousua enembodu, gavera kakatodu, kotú enembo avona irugari bee dotuturota gavera dibe eini be eini irugeta rousua enembodu nundubuturota, God unda Agho Dari ututurie. 11 Irugari bee retora, aná God da Gaga Taubana duroghade avore. Unona aná Gaga minono rari-du rea, anda ingova ututurie. Undú raga regegore!
1:12-20 Pol Jojabeeda Sonemba Itatama Urota, “Aiye” Riria Re.
12 Namonde anda Jojabee Iesu Keriso, anda gaa bee ari gia, “avore” rea, unda buro ari-du rea, andava ano ututuria-du “aiye” rere. 13 Eka 8:3; 9:4-5Sei amó undú sembago rirota, unda natofo dea ga urota, unda tamova gaga sembago reta urere. Tago, fefera aghade andava gaabee ari tefo, kotú amó donu eta urera, aná jo gerurota, ambi eta urera-du God andú neno mema ea kauta urie. 14 Namonde anda Jojabee Iesu Keriso unda natofo sonembeaveta, umonu gaabee urota mino-mino neno buta rousua aghagonu urota, unda sonemba andava avereguturieta, anda neno rova beago gaabee aride, ikoko mendi neno baride siroruturieta rururere.
15 Ená gaga, aná gaa bee re. Gaabee ea goghó egegadi rere. Iesu Keriso umó endava furia-da bee mo, ari bari akokogo enembo sonembota jebuga bari-du rea, furie. Ari akokogo enembo rera, eini jo amogo irambi re. Amó akuago bee eta urere. 16 Avore, ari akokogo eta rousua enemboda iti bee itiva anona eta urere. Tago, enembo avona ambova Iesu Keriso gaabee ea, jebuga tumanadu irari bubugaita rousua-mi amó gerurota, tanana egegasue: Iesu Keriso da daiyagha durumugea roboghomi amonu sonembea jebuga tumanadu ututuria aghagonu, númandava aita rouvie. 17 Amindu, namonde God kakara urota, unda duroghadu raga rirota iririgore! Umó namonde anda kini re. Umó vitirie, vitie, kotú tumanadu iraita rouvie. Jo dibemi gari aghago irambi re. Umó God bee re, eini umongo tefo re. Aĩ gaa bee re!
18-19 Timoti, anda mendi, ená raita rora gaga jo reka irambi re. God da feroveta einimi, imó donu asira aná seibe ririe. Aná riria gaganu kaifa urota, anami Jojabee gaabee urota, unda ragarova mene-mene ege! Aghá urota, inda neno roode gaabee aride kaifa adi rere! Enembo dumeni númanda neno roode gaabee aride jo kaifa ea simbugambi eta uria-mi, númanda gaabee ari jujururieta, númane bebeta ea, sembago urie. 20 Aná noni rera-da rova enembo ungagha, aná Himeneus ungá Aleksander gha re. Númane God da bingá utata akuago uta-du, amó tanana ea doari-du rea, ungá umó Satan da ingova itari vitie.