2 Tesalonaika Enembodu
Pol Unda Ingiso Ambova, Tesalonaika Enembodu Gefiria, Aná Evere.
Pol unda ingiso sei Tesalonaika Enembodava gefiria-da ambova, umó itoko kaifa ea, ghaeko* 52 Iesu siroruturia-da ambova númandava rekago gefirie. Enembo dumenimi Jojabeeda kaverea furaita rouvia fefera seibe bubie. regeguturieta, Tesalonaika enembo oru egegutua-du, umó rekago gaga eghá gefirie. Jojabeeda furari fefera mo, daiyaghago ro ananu isuri urie.
Pol Ená Buka Gefiria Gagada Mendó Mane, Aná Evere:
1:1-2 Pol númane ghanena urie.
1:3-12 Namonde Jojabeeda ragarova mema itatama egegadora, aná taubana re.
2:1-17 God na rata, unda Asisi Kakara ená endava vitia, doa serigota Satan da ano rekago isagha adua-da ambova, Jojabee rekago kaverea furaita rouvie.
3:1-15 Kuristini da irari.
3:16-18 Pol númane ea simbugea unda gaga rea sidara urie.
1
1 Eka 17:1Ariee! Námane Pol, Sailas kotú Timoti de nímane Tesalonaika anava God Afa, kotú Jojabee Iesu Keriso da natofo ea vitera enembo ghanena rosore. 2 God Afa kotú Jojabee Iesu Keriso da sonembade, kotú siriri aride, kaveverade nímandava irari-du benunu rosore.
1:3-12 Pol Na, Tesalonaika Enembo Ghanena Urota, God Dava “Aiye” Riria Re.
3 Anda ikoko mendi, ariri gharovu, nímanda gaabee ari God dava baria jojabe rouvia-du “aiye” reisi-rere. Nímanda mino-mino neno bari aná rei-baborue, aghá uua-du námane God du “aiye” regegadora, aná taubana re. 4 Nímanda gaabee ari baria jojabe ueta, enembo nímandu mema kotú bouvu jojabe reisi-ututue. Tago, nímane durumugea jiria God gaabee rosoravore. Nímanda aghá rosora-du, námanena God gaabee eta rousua enembo dumenidava, nímanenu raga reisi-rere. 5 Nímanda mema itatama rosora-du rea, God da nundubari nímandava aná taubana vitie. Nímanda mema jojabe itatama urota, vitera anami ano utota nímane inono adi-gea, God na, “Anda enembo taubana re,” rirota, rata-gea ya, unda enembo tumanadu kaifa eta rouvia kambesiva* Ii, Gaga Isuri Ari Kambesi anava, gaga dumeni gaga Natofo da tuva vitia-nu irugea gia, tanana adi! terota, kaifa urota, iraita rouvie. 6-7 God na namonde anda irari gerurota, mino aghagonu ututa rouvie. Jojabee Iesu, ivari buburagha, kotú unda anera anoghade uutuvareta vorefuraita rouvia aghade, God na enembo avona nímandu mema reisi-ututua-du mino utota rururota, namonde andú siriri arinu utota bubugaitare. 8 God na enembo avona umó gambi vitia, kotú namonde anda Jojabee Iesu Keriso da Gaga taubana ambo-ambo ambi rousua-du, bouvu fakarabe utaita rouvie. 9 Is 2:10Aghá ata-gea, númane ari sembagoda mino utari kambesiva tumanadu iraita rousue. Númane, jo Jojabeeda dibeva irambi, kotú unda duroghade anode jo gambi egegaita rousue. 10 Iesu furaita rouvia feferava, unda natofomi undú raga rari-du, kotú umó gaabee eta rousua enembomi unda durogha gerurota, unda ragaro righota erari-du rea, furaita rouvie. Aghade, nímane beago, unda natofoda rova iririgaita rosoravore. Anada bee mo, nímanena námanda minono niningigea gaabee egegutureravore. 11 Avore, God na, nímane inono gerurie-gea, jebuga bubugadi, kotú unda unonu egegadi rea, aghi urie. Amindu, umó daiyagha ea sonembasueta, nímane unda uno arida ano bubugadi rea, námane benunu urota vitere. Kotú, umó daiyagha ano utasueta, nímane gaabee urota, buro egegeta rosora-da beede, kotú ari taubana aita nundubeta rosora-da beede, isagha asua-nu nundubuturota, námane benunu urota vitere. 12 Aghá sirorari-du uno rosora-da bee mo evere. Nímanena namonde anda Jojabee Iesu da ragaro righota erorurota, enembo dumenimi unda durogha nímandava gigigari-du uno rosore. Kotú, umó beago unda durogha nímandava utota bubugadi uno rosore. Aná mo, namonde anda God kotú Jojabee Iesu Keriso da sonembava siroraita rouvie.