1-2  1 Te 4:15-17Anda ikoko mendi, ariri gharovu, namonde anda Jojabee Iesu Keriso kaverea furá namonde amó bata danode iraita rosora-da gaga raita rore. Enembo eini gaga gavera anda ragarova eghá rirota, “Jojabeeda fefera seibe etia bubie,” radua o gembadua mo, mania gaabee egegata, kotú enembo einimi undufa feroveta gaa rirota, aghá radua mo, mania ningia gaabee egegata! Aná gavera raita rouvieta! 3 Mania doadi, enembo einimi imó gaga gaverami kuvirauveta! Anada bee mo, ari akuagoda beforo righari embó eini erea, isagha ata-gea, enembo dano unda ambo-ambo urota, God de mene-mene aita urota, ambova Jojabee kaverea furota, aná ari akuagoda beforo righari aná God na rata ambova amburariva mema tumanadu itatama aita rouvie. 4  Dan 11:36; Ezek 28:2Aná ari akuagoda beforo righari, enembo avona ingomi uubu ari o god dumeni tumogha baĩ egegadua-nu injigha urota, undufako righota erota, God du Tafaroro Ari Kambova terua asumbea, umó God gaa raita rouvie. 5 Nímane reisi-geroravore, amó namonde irirota, aná ari akuagoda beforo righari embóda gaga ririeta nímane niningigutureravore. 6 Kotú, aná embóda furari eini-eini einimi gajitueta vitia, nímane reisi-geroravore. Unda simbuguturia fefera bubadua, umó isaghava bubota gigigaita rosoravore. 7 Oreki ari-bari akuago seibe kivumi buro rouvie-tago, enembo oruabe jo gigigambi vitie. Embó avona aná ari-bari akuago gajiturota vitia-nu, God na rata serigota, aná ari akuagoda beforo righari embó isaghava bubota gigigaita rosore. 8  Is 11:4Ari-bari akuago retora-da beforo righari isaghava bubua, buro urota, Jojabee Iesu unanagha kaverea furá, neno asegota, unda beeda oenomi furota, aná ari akuagoda beforo righari amburaita rouvie. 9-10  Mat 24:24Iesu kaverea furaita rouvia-da dibe kena, ari akuagoda beforo righari embó umó Satan da anonu bua furá, jebuga tumanadu irari kasovigaita rouvia enembomi umonu gaabee ari-du rea, ari akuago manemi kuvia gerurota, gavera ivata dumenide dano takembea ata siroruturota, enembo sei aghago jo gambi iririgadua, aná ivatanu gia duduku-dadaka egegaita rousue. Aná enembo jebuga tumanadu irari kasovigaita rousua retora-da bee mo, númane gaa bee injigha ea, jebuga tumanadu irari kasovigea vitie. 11 Anada bee mo, númane jo gaabee ambi eta rousua-du God na númandava gaveranu gaabee arida ano utota, númane gaveranu gaabee egegaita rousue. 12 Anada mino mo, enembo avona gaga bee jo gaabee ambi urota ari-bari akuago manenu gangoro urota iririgadua, númane anada mema fakarabe itatama aita rousue.

13 Anda ikoko mendi, ariri gharovu, námane nímandu rea, fefera inono God Afadava “aiye” regegasire. Anada bee mo, God na tutunova, unda Asisi utota nímanda neno roo seghea simbugota gaga beenu gaabee urota jebuga tumanadu irari bubugadi rea, nímane gateguturie. 14 Námane Gaga Taubananu nímandu minono rieta, God nímane namonde anda Jojabee Iesu Keriso da durogha nímanda boanda bubugadi rea, God na nímane gateguturie. 15 Amindu rea, anda ikoko mendi, ariri gharovu, jiria goghó ea, námane gaabee nímandu rei-irugutora, bemi ritara, kotú ingisova gefivutara, ananu bua righia goghó egege. 16-17 Namonde anda Jojabee Iesu Keriso kotú God Afa, namonde amó neno bua, unda kaveverami tefo sonembutueta, namonde ano ea, unda kaverea furaita rouvia feferadu, uno urota, kaifa eta rosore. Ungá nímandu ari-bari taubana ari-du, kotú gaga taubana rari-du tavo urota, ano ututugoe!