Hibru Enembodu
Hibru Enembo (Kotú Israel Enembo Reta Rosore) Númandava Ingiso Gefiria, Aná Evere.
Hibru Enembodu buka gefiria embó mo, jo undufako isuri ambi re. Aghajora jo Pol irambi re. Tago, ekaresia* seida beforo righari o beforo gari embó einimi gefirie.
God Du Tafaroro Ari Kambo anava tafaroro egegutueta, aná embómi ená ingiso gefirie. Aghá-gea, namonde amó tanana rosore: umó Rom enembomi ghaeko* 70 Iesu siroruturia-da ambova aria, bogu naa Jerusalem anava God du Tafaroro Ari Kambo susughi ea dea, bununu urieta vovoruria-da dibe kenava gefirie.
Namonde amó gogorego Abraham da mambube mane nundubuturota, Jiusi enembo o Israel enembo regegeta rosore. Tago, ená gefiria embómi Isip enemboda gaga sei jijimu urota, unda enembo totofo Jiusi enembodu gefirota, Hibru enembodu gefirie.
Unda enembo totofo Jiusi enembo dumeni neno kaverea, Iesu gaabee egeguturia-mi, rourogo kaverea rekago Jiusi enemboda evovo kiki gaabee urota, Iesu du goitu fotauve-degea rirota, ená buka gefirie.
Aghá urota, unda isuri uria-va, Iesu aná iti bee itiva re, Moses jo Iesu aghago irambi re. Anera mane beago, jo Iesu aghago irambi re. Kotú emboro God dava Agho Darimi ifeguturia, jo God dava yari emboro Iesu da tatangumi ifeguturia aghago irambi re. Iesu aná eini-eini nanjogoda iti bee itiva re.
Hibru Enembodu Ingiso Gefiria Gagada Mendó Mane, Aná Evere.
1:1-3 Ená ingiso gefiria embómi, unda ikoko mendi, ariri gharovu Israel enembo ghanena uria re.
1:4-2:18 Keriso, umó jojabe, anera maneda iti bee itiva re.
3:1-4:13 Keriso umó jojabe, Moses ungá Josua ghada itiva re.
4:14-7:28 Keriso umó namonde anda fristi* iti beeva re. Fristi eini jo umongo irambi re.
8:1-9:28 God dava ya bubarida emboro, Iesu na ifeguturia, aná taubana bee re. Emboro sei jo aghago irambi re.
10:1-39 God du vesa dumeni ututa egeguturia, jo anogha irambi re. Tago, Keriso unda tatangu ututuria mo, unda anogha re.
11:1-12:29 God da enembo seibe umonu daiyagha gaabee egegeta uria aghago, namonde amó beago egegasire!
13:1-25 Ingiso gefiria embómi, gaga dumeni-dumeni rirota, ari-bari taubana egegari-du rea, gaga tano uria re.
1
1:1-14 God Da Mendi Anera Maneda Iti Bee Itiva Re.
1 Seibe sei, God na fefera oruabe kotú emboro dumeni-dumeniva reaveta ningia, unda feroveta mane erea, gaga rirota, ari dumeni-dumeni egegeta uria-mi irugutuaveta, namonde anda mambube mane niningigeta urie. 2 Tago oreki mo, undufa unda mendi ninenguturieta furia-mi, Afada gaga namonde andava rieta reisi-niningore. Unda mendi rera-da anomi God ririeta, uutu endagha siroruturie. Kotú, fefera ambova eini-eini dano unda mendida tofo ari-du rea, umonu gateguturie. 3 God da durogha unanagha unda mendidavareta janimbeaveta gita rosore. Kotú, gari unda mendidava vitia beago, jo eini irambi re. Eto-bato God dava vitia dabako aghago re. Unda mendida gaga aná anogha re. Iesu aná anomi uutu endagha ririkurota vitie. Unona enemboda ari-bari akokogo seghea fugea, uutuva vitaria, God duroghadeda ingo bee kena asumbuturie.
4 Aghá urota, umó aná anera mane serigea, iti bee itiva viviturie. Aghade, God unda mendidu bingá ututurieta isagha urie. Anera maneda bingá jo Mendida bingá vitia aghago, irambi re. 5 Ps 2:7; 2 Sam 7:14; 1 Chr 17:13God na, Iesu du eghá ririe,
“Imó oreki anda mendi etoravore. Imó anda mendi reta isagha rore.”
o gaga eini mo
“Amó nimamo re, imó anda mendi re.”
God na gaga aghagonu jo anera einidu rambi re. 6 Deut 32:43Kotú, God unona unda mendi begonu endava sirorari-du ninenguturota, anera mane umonu tumogha baĩ egegari-du ririe. 7 Ps 104:4Tago, anera manedu rirota, eghá ririe,
“Anda anera mane simbuguturieta, yaura anogha aghago vitie.
Númane anda buro kakato ari-du simbuguturieta, ivarida bubura aghago urota vitie.”
8 Ps 45:6-7Avotago, Afa God na unda Mendidu eghá ririe,
“Ariee God, imó kini ea, eini-eini dano kotú enembo dano inona tumanadu kaifa aita roravore.
Kotú, imó gaa bee nuenembo rirota, ari-bari bee nuenembo urota,
inda natofo* kaifa urota iraita roravore.
9 Imó gaga sembago kotú ari-bari akokogo injigha urota, gaga taubana, kotú ari taubana nuenembo uno eta rora-du,
God, inda God imó gangoro ari-du rea, imó ea simbugea goghó urie.
Inda kokomanadava jo aghá ambi re.”
10 Ps 102:25-27Kotú unda mendida gaga kambesi einiva eghá ririe,
“Jojabee, tutuno bee tutunova inona enda uubu urieta siroruturie.
Kotú, indufa inda ingomi, uutu uubu urieta siroruturie.
11 Uutu endagha manjaita rouvie-tago, imó tumanadu iraita roravore.
Eto-bato bo-eembo sari ea, boma eaveta, reka buta rosora aghagonu,
12 uutu endagha sari ea boma ata, gajea airo itia, uutu endagha reka ata siroraita rouvie.
Atá imó jo dibe eini ambi, tumanadu aghá iraita roravore.”
13 Ps 110:1Kotú, unda anera einidava jo eghá rambi re. “Fu, anda ingo bee kena asumbadi-gea,
anona inda gitofo dea bundia bua furá, inda eka tuva ghandada gharari-du itota vasioe!”
14 Amindu rea, anera maneda buro doro? Númane aná asisi dibe eini re. Númane God na ninengeaveta fuava, jebuga tumanadu irari baita rousua enembonu sonembeta rousue. Númanda buro aghá re.