2
2:1-4 God da Sonemba Enembodu Simbugea Ututuria, Aná Eto-bato Eghá Re.
1-2 God na unda gaga beenu aneradava ututurieta bua, namonde anda mambube manedava isaghava regeguturie. Aná gaga niningigea, jo ambo-ambo ambi egeguturia enembodava, God na mema bouvude ututurieta itatama egeguturie. Tago, anerada gaga, aná ijoko re, o oreki siroruta gaga, aná jojabe re. Anada bee mo, God da mendi anera maneda itiva re. Amindu rea, namonde rourogo gaga gaveranu niningigea, ananu ambo-ambo ara-degea rirota, ená gaga oreki enembo sirorutata reisi-niningora ananu kaifa ea goghó egegore! 3 Ená gagami jebugada emboro irugeta rouvia, aná sonemba jojabe re. Amindu rea, namonde amó ená gaga jo nundubea, gaabee ambi egegadora mo, jebuga kasovigea sirivu aita rosore. Namonde amó daiyagha umó gaabee egeguturota, jebugasira-da emboro namonde anda Jojabee furia, undufa iruguturie. Anada ambova, enembo dumeni aná gaga Jojabeedava niningigea furia, namonde andava ririeta ningia, tanana egeguturere. 4 Númane aghá iruguturia aghade, God na aná gagada beenu tanana ea, gaabee egegari-du rea, ari dumeni, kotú ivata dibe eini be eini urota ririeta, Asisi Kakara daiyagha uno uria-nu urota, buro arida ano dibe eini be eini namonde andava vesa urie.
2:5-18 Jebuga Tumanadu Tambarida Emboro, Aná Iesu Umó Re.
5 Reisi-gerora, namonde amó fefera reka ambova reifia, kotú enda reka ambova siroraita rouvia-du reisi-rere. Tago, God jo ená fefera reka kotú enda reka rera-nu anerami kaifa ari-du rambi re. 6 Ps 8:4-6God da Gaga gefirieta vitia-va, embó eini God du eghá ririe:
“God, imó jojabe re. Amindu imó námane enembo dodu rei-nundubuto? Kotú dodu kaifa eta ro?
7-8 Fefera tufoko, námane anera maneda tuva irari-du rireravore.
Inona unanade kotú bingáde námandu ututurieta bua, námane eini-eini nanjogoda barirari ea vitere.”
Avore, God eini-eini nanjogo namonde anda tuva irari-du ririe-tago, jo aghá sirorota gigigambi vitere. 9 Avotago, Iesu dava aghá siroruturieta, reisi-gerore. Fefera tufoko umó anera maneda tuva irari-du rea, God na ririeta, umó ená endava siroruturie.
Aghá urieta, God na namonde amó enembo nanjogo dano sonembari-du ririeta, Iesu namonde anda ari-bari akokogodu ambubuturie. Tago oreki, umó durogha bingáde bua righia irieta reisi-gerore. Durogha bingáde righia vitia-da bee mo, umó namonde andú rea, mema akuago beenu itatama urota ambubuturia-du, God na undava durogha bingáde ututurieta bua vitie. 10 God eini-eini nanjogo dano uubu urieta siroruturia, kotú unda anomi eini-eini dano bua righia vitia-mi ririeta, Iesu mema itatama urota, kofiri ea jebugada emboro irugari inono uria-du rera, aná taubana re. Anada bee mo, namonde anda jebuga utari kato, Iesu, umó aná mema itatama uria-mi, Afada uno urota, enembo oruabe God da sasingu ea, unda duroghava teterugari-du rea, emboro ifeguturie.
11 Aghá ea, Iesu na gaabee ari enemboda ari-bari akokogo seghea fugiturieta, númane God da dibeva kakara bee ea vitie. Aghá uria-du, aná enembo Iesu de dano, God da sasingu ea vitie. Iesu amindu, númandu ikoko mendi, ariri gharovu gaa rirota, jo meka gambi eta rouvie. 12 Ps 22:22Aghadu Iesu gaga eini God du eghá ririe,
“Tafaroro feferava, anda ikoko mendi, ariri gharovu danode desadua-da dibeva,
inda ragaro righota ererurota, daami indú raga raitare.”
13 Is 8:17; Is 8:18Kotú rekago eghá ririe,
“Anda gaabee ari indava re.”
Kotú, rekago eghá ririe,
“God da andú ututuria sasingu, namonde danode eve vitere.”
14 Namonde amó, God da sasingu dano enembo bee re. Amindu, Iesu furia, enembo beeda tamonu bua asuguturie. Umó aghá uria-da bee mo, Amburarida ano bua righia vitiria taimu Satan nu, data amburari-du rea, Iesu umó furia ambua, amburarivareta jebugea erorurie. 15 Enembo nanjogo amburarida anomi bunditurieta iririguturota, amburaridu oru egegutua-nu, vuregota jejebugari-du rea, Iesu aghá urie. 16 Is 41:8-9Aghá uria-da bee mo, Iesu jo anera mane sonembaita rea, furambi re-tago, umó Abraham da mambube mane sonembaita furie. 17 God enemboda ari-bari akokogo nundubea gia doaita riria-du, Iesu eto-bato unda ikoko mendi, ariri gharovu aghago ea, enembo beeda tamo bua asugasue. Aghade, umó God da unonu urota, fristi* iti bee itiva ea, namonde andú neno mema ea, undufa unda tamo vesa aghago utasue. Kotú namonde amó enembodu rea, aghá urie. 18 Oreki Satan da kuvia gari namonde andava furadua, Iesu na namonde amó sonembari inono re. Anada bee mo, umó beago Satan na kuvia gita rouvia-da bouvude memade itatama urie.