Jems
Iesu Gaabee Ari Kakatodu, Jems Da Gefiria Gaga Re.
Ená buka gefiria embó, aná Jems re. Tago, Gaga Rekava ragaro Jems ririkiguturia embobo dano, ungagha-ungagha vitie. Beforo ririkigarimi gogorego Jems ungagha nundubeta rousue. Eini mo, Iesu da ambo nimbi Jems re. Tago umonu, Herot na sei derurieta ambubuturie. Amindu gogorego Jojabee Iesu da ikoko Jems nu reisi-nundubutue. Tutunova, umó unda kaka Iesu jo gaabee ambi re. Tago, ambova umó Iesu gaabee ea, ekaresiada* beforo righari jojabe eini urie.
Ená buka Jems nanjigo gefiria, aná itoko besiga eta rousue. Enembo dumenida nundubariva ghaeko* 60-62 Iesu siroruturia-da ambova anada rova gefirie. Tago, Jems 1:1 anava reirie: “Jiusi enembo, abua dano 12 dava” gefirieta vitie. Amindu Jiusi enemboda gitofo oruaruabe jo gaabee ambi feferava gefiria-jogo. Amindu beforo gari enembo oruabe aná ghaeko 48-50 Iesu siroruturia-da ambova aghagonu reisi-nundubutue.
Jems gogorego mema kotú bouvu ekaresiada rova siroreta uria-nu nundubuturota, unda gaga gefirie. Enembo gugua-ghayafade kakara urota, makasi enembo jo kakara ambi vitiria-da gaga rea, namonde andava gaabee arinu ivatava ititigasira-da gaga beago gefirie. Kotú ekaresiada irarida gagada mendó dumeni beago gefirie.
Jems Ená Buka Gefiria Gagada Mendó Mane, Aná Evere:
1:1 Jems avodu gefiria enembo-nu ghanena uria re.
1:2-11 Dara kotú mema futa rouvia amindu, namonde amó gangorogha iririgasire. Mania gugua-ghayafada ambo-ambo egegata!
1:12-18 Mema o bouvu itatama egeguturota, rourogo ari akokogo egegara-degea riria re.
1:19-27 God da gaga niningigea, ivatava itarida gaga re.
2:1-18 Enembo dano inonova neno rururota, mino-mino kakara egegasira-da gaga re.
2:14-26 Gaabee ari unda ivataghada gaga re.
3:1-18 Namonde anda aveva, kaifa arida gaga re.
4:1-5:12 Isuri ari gaga dumeni re.
5:13-20 Gaabee urota benunu arida emboro eghá re.
1
1 Mat 13:55; Mak 6:3; Eka 15:13; Gal 1:19Ariee, anda ikoko mendi, ariri gharovu,
Amó Jems, Jojabee Iesu Keriso kotú God da sabua* buro kato eini re. Nímane Jiusi enemboda abua dano 12 avona taivea andivea arera, naa naa dighia asusumbuguturera-nu ghanena roreta. Yata bua gigige!
1:2-8 Dara Kotú Mema Futa Rouvia Amindu, Namonde Amó Gangorogha Iririgasire!
2 Anda ikoko mendi, ariri gharovu, kuvia gari o mema dibe eini be eini furadua mo, gangorogha iririgadi rere. 3 Anada bee mo, dara kotú memami nímanda gaabee ari itia gata, jo jurambi egegadora mo, nímane kuvia gariva tumomi siregari inono aita rosoravore. 4 Amindu tumomi sireguturota, ano ea, iririgadi rere. Aghá egegadora mo, nímane durumugea gaa bee ari kakato ea, ano urota, kuvia gari dava jo jurambi egegaita rosoravore.
5 Atá, nímane avona neno nundubari baita uno egegadora mo, God dava benunu egege, unona utota bubugadi! Anada bee mo, umó kavevera urota, enembo dano gangorogha sonembeta rouvie. 6 Kotú gaabee urota, benunu egegadi rere! Anada bee mo, enembo avona númanda neno roo jo simbugambi benunu mana-managha egegadua, númane donu eini jo bubugambi aita rousue. Númane eto-bato yaurami karaje bua iru-furu uaveta, torú-torú eta rouvia, aghago re. 7-8 Nímane nundubari ungagha aghago urota, buro ea goghó ambi, Jojabeedava benunu egeguturota mo, Jojabee na nímandu eini-eini donu utota baita rora-nu, mania nundubata!
1:9-11 Mania Gugua-ghayafada Ambo-Ambo Egegata!
9 God da yavero makasi enembo, nímanda iraridu gangoro urota iririgadi rere. Anada bee mo, nímane God na ririeta, unda sasingu ea viteravore. 10 Is 40:6-7Tago, God da yavero gugua-ghayafade enembo, nímane God na ituturieta vorea, unda sabua* ea, unda ragarova meka gerurota vitera-du gangoro egegadi rere. Gigige, taima ika vuri gharasa ea, voreta rouvia aghagonu, gugua-ghayafade enembo ya sidara egegaita rousue. 11 Gugua ghayafade enembo aná tutumi manjaita rousue. Eto-bato vitari feferami janimbea, ika vuri eviaveta gharasa ea, rururu ea voreta rouvia aghagonu, númane buro urota, God na rata, númane ambubugaita rousue.
1:12-18 Mema O Bouvu Itatama Egeguturota, Rourogo Ari Akokogo Egegara-degea Riria Re.
12 Enembo avona mema o bouvu itatama urota, tumomi siregea, ano ea jiraita rouvia-du, God na umonu ea simbugea, unda utaita bee gajituria vesa, jebuga tumanadu irarinu, utota baita rouvie.
13 Kuvia gari enembo avodava furadua, jo eghá rambi asue, “Ená kuvia gari God na rei-ututue.” Anada bee mo, ari-bari akokogomi God jo kuvia gambi eta rouvie. Kotú God beago, enembo avonu jo ari akuago ari-du rea, kuvia gambi eta rouvie. 14 Tefo! Enembo nendufa númanda tamoda unomi bundeaveta, sembagova ita rousue. 15 Avore, númanda tamoda unomi eaveta, ari-bari akokogo siroreta rouvie. Sirorea iiava jojabe ari mo, amburari beago siroreta rouvie.
16 Avore, anda neno bari ikoko mendi, ariri gharovu, mania nendufako kukuvegata! 17 Vesa esiko-esiko dibe eini be eini dano, God na uutuvareta utuaveta voreta rouvie. Umó aná uutuva unana nanjogoda numamo re. Unda unana jo itoko gotea, bingoi o utumu ambi eta rouvie. Unda unanada janimbari jo kaverea, dibe eini ambi eta rouvie. Umó aghago re. Unda nundubaride aito fugaride tumanadu dabako ananu irita rouvie. 18 Unda unonu ea, unda gaga bee anomi namonde amó uubu urieta siroruturere. Aghá ata-gea, uutuva, kotú endava unda uubu uria eini-eini nanjogonu namonde anona beforo righari-du urie.
1:19-27 God Da Gaga Niningigea, Ivatava Itarida Gaga Re.
19 Anda neno bari ikoko mendi, ariri gharovu, ená gaganu ningia goghó egege! Nímane dano gangorogha kokomanada gaga niningigaita rea, simbugea iririgadi rere! Kotú gaga mino durumugea, roboghami regege! Aghá urota, mania tutomi neno akuago egegata! 20 Anada bee mo, nímanda neno akuago eta rosora-mi nímane bundiaveta God da uno jo ambi eta rosoravore. 21 Amindu rea, ari-bari akokogo, kotú tamo firída uno dumeni eta rosora dano dodoge, sidara ata, durumugea, God da gaga nímanda neno rova rei-ututua-nu kaifa ea goghó uu-gea, ami sonembota, jebuga tumanadu irarinu bubugadi!
22 God da Gaga mania ningari vivi egeguturota, nendufako kukuvegata! Umó donu ari-du reiria aghagonu egege! 23-24 Enembo avona God da gaga ningia, ivatava itambi eta rouvia, umó eto-bato, embó einimi unda dibe be itutuva gia doa, itoko airo yari mo, jo gaimbo ambi, umó undufako neno itita rouvia aghago re. 25 Nímane reisi-geroravore, God da Agho Darimi namonde amó vureguturieta, jebuga tambua vitere. Aghá-gea, enembo avona God da Agho Dari iruguturota, ningari vivi ea, kotú ivatava ititurota, neno itambi adua mo, aná embó aná God na taubana ea simbugaita rouvie.
26 Enembo avona, umó God gaabee ea goghó ari gaa rirota, unda aveva jo kaifa ea goghó ambi adua, umó aná undufako kukuvirota, unda gaabee ari aná bee tefo aita rouvie. 27 Gaabee arida emboro esiko-esiko God da uno rouvia mo, aná evere: sasingu babagha kotú evevetu dodorude númanda mema sonembea kaifa tavo urota, indufako inda jebugava ari-bari sembagomi beda auvede-gea, amigha dano kaifa ea goghó egegasiravore.