2
2:1-7 Meri Iesu Fufiria-Da Gaga Re.
(Matyu 1:18-25)
Fefera aghade, Rom enemboda kotofuko ragaro Sisar Ogastus na agho dari eini urieta siroruturie. Rom enemboda kaifa eta rousua enembo dano kaverea ya, nuabua mane niavo siroruturia naava, númanda abua ari ragaro gegembugasue. Embó ragaro Kwirinius umó Siria frovensida gavana ea vitiria feferada dibeva, ragaro jo gembambi re. Fefera anava tutuno ea ragaro gegembuguturie. Amindu rea, enembo dano ragaro gegembugaita rea, ereregea, númanda naa ari naa ari igiguturie.
Amindu Josep beago, Nasaret doa aria, Galili Frovensi serigea aria, Judia Frovensiva terua, nuabua Devit da siroruturia naa ragaro Betlehem buburiturie. Anada bee mo, umó aná Kini Devit da mambube eini re. Unda datu ariri, ragaro Meri, tambouvude ea vitirieta bua, ungá igiguturie. 6-7 Aria, Betlehem bubua irieta, Meri da fumbari fefera furia buburiturieta, Meri unda soká bego, mendi reta fumbua, eembomi otoo ea, nino oka yamena ari rorova ititurieta vavosurie. Anada bee mo, aná esega enemboda kambo rova númane irari kambesi tefo re.
2:8-20 Anera Oka Sifi Kaifa Kakatodava Buburituria Re.
Aghade, Betlehem naa kasava kambesi einiva oka sifi kaifa kakato dumenimi tumbade númanda sifi mane kaifa rousurie. Aghá ueta, Jojabeeda anera, aná sifi kaifa kakatodava isagha ea, Jojabeeda durogha janimbutueta, númane gigigea, duduku-dadaka ea, oru egeguturie. 10 Tago, anerami eghá ririe, “Mania oru egegata! Amó nímandu Gaga Taubana raita rore. Rata niningigea, nímane abua-abua enembo nanjogo dano gangoro jojabe egegaita rosoravore. 11 Embó eini God na utota, nímane sonembari-du riria, aná oreki Kini Devit da naa Betlehem avo siroretue. Umó aná Jojabee re. 12 Atá aná soká tambaita rora ivata, aná eghá ari vitie. Umó eembomi otoo ea, nino oka yamena ari rorova itota vasia irota tatambugaita rosoravore!”
13 Aghá rieta, gaimbo ambi anera mane oruaruabe uutuvareta vorefuria, anera sei isagha uria-de dano takembea, God du raga rirota eghá regeguturie,
14 “God iti beevada duroghadu raga rosore. God na endava
unda uno rouvia enembodu, siriri ari utota voraita rouvie.”
15 Aghá rea doa, aná anera mane kaverea, uutuva vivitiguturieta, sifi kaifa kakato mino-mino eghá regeguturie, “Egege! Namonde Betlehem ya, donu siroretueta, Jojabeeda namonde andú retua-nu gigigore!”
16 Aghá rea, númane erea tatavami aria, Josep nuyae Meri gha, kotú aná mendi nino oka yamena ari rorova ititurieta vasia irieta tatambuguturie. 17 Tambua, aná mendida tamova anera manemi gaga donu regegutururia-nu, númanena regeguturieta fafate urie. 18 Kotú avona, sifi kaifa kakatoda gaga regeguturia-nu niningiguturia, númane duduku-dadaka egeguturie. 19 Tago aghade, Meri dava donu siroruturia-nu nundubuturota irita urie. 20 Atá, aná sifi kaifa kakato kaverea igiguturota, God du raga rirota divua furia uta igiguturie. Anada bee mo, númanda donu gigiguturia, kotú niningiguturia anada bee dano siroruturie.
2:21-40 Iesu Fumbua, Agho Dari Fefera Donu Riria-nu Kaifa Ea, Anada Vesa Utaita Rea, Meri Josep Gha Tafaroro Ari Kambova Igiguturia Re.
21  Lev 12:3; Luk 1:31Fura dabako seriguturieta, fura einida onembo tutunova aná mendida vii mendó andoro tafugari fefera buburiturie. Aghade, nue jo tambouvude ambi irieta, anerada furia undú ututuria ragaro, Iesu ririkurie.
22-24  Ex 13:2, 12; Lev 12:6-8Gaga Moses da gefiria-va mo, evevetu mendi sasingu fumbua fefera tufoko irirota, anada ambova, God du vesa utua, númane rekago tutuno ea, God du Tafaroro Ari Kambova* iru-furu egegaita rousue. Aná fefera sidara urieta, Josep nuye Meri gha númanda mendi bua, Meri da ragarova vesa utaita, kotú aná mendi God dava irugea, isuri aita rea, Jerusalem igiguturie. Vesa donu utasua retora mo, unei ungagha o obani memendi ungaghanu vesa utasue. Aná mendi Jojabeeda dibeva isuri egegasua-da bee beago, Jojabeeda Gagava isuri rouvie. Aná evere,
“Sasingu vivide bebego dano God da dibeva aná kakara re.”
25 Aghade, embó taubana eini dinunu tefo ragaro Simeon Jerusalem avo vitirie. Asisi Kakarami undava asuguturieta irirota, God na Israel enembodu sonemba bua furari fefera kaifa eta urie. 26 Kotú, Asisi Kakarami seibe undava eghá ririe, “Imó jo amburambi irirota, God na natofo jededa ari-bari akokogo nundubea gia doaita rea, Embó eini ninengota endava voraita rouvia-nu inda dibe mokómi gaita roravore.” 27 Avore, fefera eini Asisi Kakarami Simeon unumbea bua aria, God du Tafaroro Ari Kambova terua, kaifa ueta, Iesu nue numamode dano aria terua, God da Gagava donu vitia ananu aita simbugutueta gia, 28 Simeon aná mendi oghimbea bua, God du aiye rirota eghá ririe,
29 “Jojabee, inona be gajiturera, aná etia, inda sabuadava*
isagha etueta gereta, oreki rege-gea, amó siririgha serigore!
30-32  Is 42:6; 49:6; 52:10Anada bee mo, inda sonemba kato abua-abua endava nanjogo
vitia-mi gari-du simbuguturera, aná anda dibemi rei-gerore.
Ená mendimi, námane Israel enemboda unana bua reifie.
Unona janimbuturota, námane Israel enemboda gitofo
inda emboro gigigaita rousue.”
33 Aghá ririeta, aná mendida nue numamogha, Simeon da donu riria-nu niningigea, mana-mana egeguturie. 34-35 Aghá egeguturieta, Simeon na númane ea simbuguturota, Iesu da nue, Meri du eghá ririe, “Ená mendi God na gategea, Israel enemboda nundubari gaita ninengetueta etie. Ená mendi aná God da ivata re. Enembo dumeni, ená mendi gerurota, gangorogha jebuga bubugaita rousue. Tago, dumeni umó gia injigha egeguturota, undú gaga sembago regegaita rousue. Atá-gea, God na rata, númane jebuga jo tambambi egegaita rousue. Aghade, númane aghá egeguturota, númanda nundubari taubanade sembagode aná God umó gia tanana aita rouvie. Kotú, natofo jede inda mendi injigha egeguturota-gea, inda neno rova mema aná eto-bato giimi gayari-go aita rouvie.” Simeon aghá ririe.
36-37 Doru eini, ragaro Ana umó God da feroveta ea vitirie. Unda abua ragaro Aser re, kotú numamoda ragaro, aná Fanuel re. Umó vai ea, ghaeko 7 seriguturieta, unda embó ambubuturie. Urieta, umó doru ea irirota, umó ghaeko 84 urie. Umó aghade, tumba onembo God du Tafaroro Ari Kambova irirota, undari bari tama ea benunu urota, God tumogha baĩ eta urie. 38 Avore, Simeon Iesu da nuedu gaga ria aghade, Ana furia, númandava bubua, tutuno ea, God du aiye rea, avona avona God da sonemba Jerusalem anava siroraita rouvia-nu kaifa egegeta uria-du Iesu da bingá isagha urie.
39  Mat 2:23Josep nuyae Meri gha, Jojabeeda Agho Dari-va sasingu fumbarida rifova donu ari-du riria, aghagonu ea sidara ea, númanda mendi bua kaverea aria, Galili frovensiva terua, númanda naa Nasaret bububuguturie. 40 Bubua irieta, aná mendi anode neno nundubaride baria, jojabe ueta, God da ea simbugari, undava vitirie.
2:41-52 Iesu God Du Tafaroro Ari Kambova Aria Re.
41  Ex 12:1-27; Deut 16:1-8Ghaeko inono Iesu da nue numamogha Serigea Yari Banaudu* rea, Jerusalem igigeta urie. 42 Aghá egeguturota irieta, Iesu da ghaeko 12 urieta, aná banau dabako aghagonu aita rea, nue numamogha erea, Iesu bua, rekago Jerusalem igiguturie. 43 Aria, banau ea sidara egeguturia-da ambova, nue numamogha Jerusalem doa kaverea igigutueta, Iesu avo jiriturie. Tago, nue numamogha jo gigigambi re. 44 Nue numamoghada nundubariva Iesu númanda natofode sei kaverea igigari gaa regeguturie. Aghá ria, emboro rorova tumba ririturieta, númanda totofoda, kotú kokomanada gorotova tava egeguturie. 45 Tava ea jajaregea, númanda mendi tava egegaita kaverea, Jerusalem igiguturie. 46 Tava ueta, fefera bakode sidara urieta, ambova umó God du Tafaroro Ari Kambo* rova Moses da Gaga Irugari kakatoda* rorova asumbea, númanda gaga niningurota, kotú númanda gagada minonu rirota irieta tatambuguturie. 47 Iesu na gaga ningari taubana kotú gaga mino taubana riria-du, enembo avona niningiguturia-mi duduku-dadaka ea mana-mana egeguturie. 48 Aghá ueta, Iesu da nue numamogha furia, umó gia, mana-mana ea, nuena eghá ririe, “Anda mendi, imó dodu ari eghá utata, nimamo angá mo, neno takembea, indú tava uta deĩ ria?”
49 Aghá ririeta, umó mino eghá ririe, “Nímane dodu amó tava rosa? Amó anda Afada Kambova irasira aghago, nímane sei gigigasiravore.” 50 Tago, unda donu riria-da bee, nue numamogha jo tanana egegambi re.
51 Anada ambova, nue numamoghade kaverea aria, Nasaret naava bubua irirota, nue numamoghada gaga ningia númanda aghi eta urie. Avotago, donu siroruturia dano, nueda neno rova iriaveta nundube-nundube eta urie. 52  1 Sam 2:26; Prov 3:4Aghade, Iesu unda tamode neno nundubaride dano baborurie. Aghá ueta, God umó neno buta urie. Kotú, enembode dano Iesu neno bubugeta urie.

2:21 Lev 12:3; Luk 1:31

2:22-24 Ex 13:2, 12; Lev 12:6-8

2:30-32 Is 42:6; 49:6; 52:10

2:39 Mat 2:23

2:41 Ex 12:1-27; Deut 16:1-8

2:52 1 Sam 2:26; Prov 3:4