2
2:1-12 Iesu Siroruturia-da Ivata Dumeni Gigigea, Beforo Gari Embobo Fefera Vitari Kena Reta Umó Ghanena Egegaita Rea, Fufuguturie.
1 Avore, fefera anava embó, ragaro Herot, umó kini ea irieta, Iesu mo Betlehem naa, Judia Frovensi anava fufirie. Fufirieta, beforo gari enembo dumeni eini-eini donu siroraita urari mo, damanava gia tanana egegeta uria enembomi, beina fefera vitari kena reta furia, Jerusalem bububuguturie. 2 Bubua, númanda uriga eghá egeguturie, “Jiusi enemboda kini reka fumbia mo niavo viti? Námane unda damana beina fefera vitari kena gigigutara-gea, undú tumogha baĩ aita reisi-fore.”
3 Aghá regeguturieta ningia, Kini Herot de kotú Jerusalem enembode dano aná bingá niningigea, mana-mana urota, gaa bee sidara egeguturie. 4 Aghá ea, fristi* maneda kokotofude, Moses da Gaga Irugari Kakatode* dano aghi jufirieta furia, undava danode desuturieta, aná soká niavo sirorasua-du uriga urie.
5 Aghá uriga urieta, númane mino undú eghá regeguturie, “Umó naa Betlehem, Judia Frovensi rova sirorasue. Anada bee mo, feroveta unda siroraridu gaga eghá gefirie:
6 Mic 5:2‘Nímane Betlehem naa, Judia Frovensiva vitera enemboda bingá jojabe ea,
Judia undida kokotofu dumenida bingá serigaita rouvie.
Anada bee mo, nímanda rorova embó eini beforo righari ea,
anda natofo Israel enembo kaifa aita rouvie.’ ”
7 Aghá rea sidara urieta, Herot na kivumi aghi jufirieta, aná beforo gari enembo undava fufuguturieta, númandava aná damana fefera domi siroruturia-nu tanana urie. 8 Tanana ea, númane ninenguturota eghá ririe, “Nímane igige, Betlehem naava bubua, aná soká tava ea tatambugea, tutumi kaverea fufuge! Regegadi ningia, amó beago ya, undú tumogha baĩ are!”
9 Aná kini da gaga donu riria ningia, númane seriguturie. Igiguturota, aná damana beina fefera vitari kena gigiguturia-mi númanda dibe kena aria, aná soká vitiria kambesida itiva tukú urie. 10 Númane aná damana rekago gigiguturia aghade, neno gangorogha dano igiguturie. 11 Aria, aná soká nue Meri gha vitiria kambova bubua, gangorogha dano aná sokádu númanda tumogha dano baĩ urota, númanda vesa goldi, kotú ika muu eini munode ragaro frankinsensi, kotú ika muu munode eini, ragaro meer reta rousua ananu bua, vesa ututuguturie.*Eini-eini eini tamo saghaideda gaami frankinsensi reta rosora mo, ika ijokoda muu kaĩ arimi ari re. Kotú eini-eini eini ragaro meer beago, ika ijoko einida muumi ari re. Ika ungagha anada tamova faka-faka egegeaveta, muu bubua kaĩ eaveta, olivi da muugha bagega ea, anami tamo o eini-eini dumeniva daveta egeguturie. Ika ungagha rera-da muu aná muno taubana bee re. Aghá-gea, anada mino iti beeva re. Iesu siroruturia feferava, enembo kokotofudu vesa utaita rirota mo, eini-eini aghago manemi ututugeta urie. Avore, beforo gari enembomi Iesu kakara urota, undú ututuguturie.
12 Aghá egegea, God donu dira einiva númandu riria-nu nundubuturota, jo ya Herot dava bubambi, emboro einiva kaverea aria, númanda roo endava bububuguturie.
2:13-18 Kini Herot Dava Nungaita Rea, Josep Mane Isip Igiguturie.
13 Aná beforo gari embobo seriguturia-da ambova, Jojabeeda anerami dirava, Josep du eghá ririe, “Imó erea, inda soká nuegha bua serigea, Isip igige! Bubua, anava iradi-gea, anona rata ningia kaverea furadi! Anada bee mo, Herot na, unda enembo dumeni aná soká tava ea data amburari-du raita rouvie.” 14 Aghá riria-du, Josep tumbade erea, nungarimi unda soká nuegha bua, numonde Roo Enda Isip igiguturie. 15 Hos 11:1Aria, anava irieta, Kini Herot ambubuturie. Jojabee na ferovetadu donu riria aghade, gaa bee urie, “Anona ririeta, anda mendi Isip roo enda vareta furie.”
16 Aná beforo gari enembo umó kukuviria-nu tanana ea, Kini Herot neno akuago urie-gea, Betlehem naa kotú naa ijoijokoko anada kasava soká vividenu dedegota ambubugari-du ririe. Aná beforo gari enembomi damana nanjigo siroruturieta regeguturia-nu nundubuturota, aná soká mane vivide ghaeko ungaghada vorari kena dano dedegota, ambubugari-du ririe.
17 Kini donu riria-da bee siroruturia aghade, feroveta Jeremaia gaga donu gefiria, aná gaa bee urie.
18 Jer 31:15“Aghade, Rama naava Resel jii be fugea rieta niningiguturie.
Resel na unda sasingudu jii be fugia rirota, enembomi undú neno jama ututugasue-tago,
unda sasingu dano ambubuguturia-du, umó númanda sonemba bari injigha urie.”
2:19-23 Nasaret Kaverea Igiguturia Re.
19-20 Herot ambubuturia-da ambova, Josep Isip irieta, Jojabeeda anerami dirava isagha ea, undú eghá ririe, “Aná embó inda mendi data amburari-du riria, ambubuta-du, imó erea, inda mendi nuegha bua kaverea, Israel roo endava igige!”
21 Aghá ririeta ningia, Josep erea, unda mendi nuegha bua, numonde kaverea, Israel roo endava igiguturie.
22 Anava yaita urota, gaga eini nininguria mo, embó ragaro Arkelaus numamo Herot da kambesi bua, kini ea, Judia Frovensi kaifa eta urie. Ananu niningurie-gea, unda mendi nuegha bua yari oru urie. Tago, dirava isuri gaga dumeni ningia, umó aria, Judia Frovensi serigea, Galili Frovensiva igiguturie. 23 Mak 1:24; Luk 2:39; Jon 1:45Númane aria, naa ragaro Nasaret bubua, anava naa dighia vitiria-du, Jojabee na ferovetadava donu riria, aná furia gaa bee urie, “ ‘Umó aná Nasaret embó re,’ regegaita rousue.”
2:6 Mic 5:2
*2:11 Eini-eini eini tamo saghaideda gaami frankinsensi reta rosora mo, ika ijokoda muu kaĩ arimi ari re. Kotú eini-eini eini ragaro meer beago, ika ijoko einida muumi ari re. Ika ungagha anada tamova faka-faka egegeaveta, muu bubua kaĩ eaveta, olivi da muugha bagega ea, anami tamo o eini-eini dumeniva daveta egeguturie. Ika ungagha rera-da muu aná muno taubana bee re. Aghá-gea, anada mino iti beeva re. Iesu siroruturia feferava, enembo kokotofudu vesa utaita rirota mo, eini-eini aghago manemi ututugeta urie. Avore, beforo gari enembomi Iesu kakara urota, undú ututuguturie.
2:15 Hos 11:1
2:18 Jer 31:15
2:23 Mak 1:24; Luk 2:39; Jon 1:45