5
5:1-14 Sifi Da Mendi Mi Futa, Ingiso Beragha Eghamburari Unona Ifeguta.
1 Ezek 2:9-10; Is 29:11Anada ambova, amó gerara mo, kotofuda avo asumbariva avona asumbea vitia-mi ingiso beragha beenu eghamburari eini unona ingo beemi righia irieta gerare. Ená ingiso eghamburari rera, aná yoveni-yoveni gembua, gajari reta finje ingo yoveni yoveniva ungaghami beva itia fatia takembuta. 2 Aghade, anera eini anode avo gerare. Unona be jojabe eghá rieta, amó niningare. “Aná ingiso eghamburari beva finjemi takembutata vitia-nu, avona bua righia ifegari inono adu?” ririe. 3 Tago, enembo eini uutuva o endava aĩ, enda rova, unona aná buka ifegea gia, irugari inono irambi re. 4 Enembo eini aná buka ifegea gari inono irambi-gea, amó jii kenjirogha ritare. 5 Gen 49:9; Is 11:1, 10Amó jii rieta gia, aná beforo righari 24 retora-da einimi andú rita, “Jii doa, kaverea oná laion nu gi! Umó Juda undida eini re. Kotú, Devit da imendi jojabe eini umó re. Umó mene-mene urota, gitofo dea, ekami ukova fatia jiriturie. Aghá-gea, aná ingiso eghamburari bua, beva finje ingo yoveni yoveniva ungaghami takembutata vitia-nu unona righia ifegari inono re.” aghá rita.
6 Is 53:7; Zech 4:10Aghá rieta, oka sifi da Mendi eini jiria irieta gerare. Aná serubim* ungagha-ungagha retora-de, kotú aná beforo ririkigari 24 retora-deda rorova jiria irieta gerare. Umó gerara mo, umó derata ambubuta aghago irieta gerare. Aná Sifi da Mendi unda kano dano ingo yoveni yoveniva ungagha, kotú unda dibe beago, ingo yoveni yoveniva ungagha re. Dibe ingo yoveni yoveniva ungagha, aná God da Asisi ingo yoveni yoveniva ungagha reta, unona ninengutata, endava, roo enda nanjogova, aria, fafate urie. 7 Aná Sifi da Mendi angia, kini da avo asumbariva avona asumbea vita-dava bubua, aná ingiso eghamburari ingo beemi righia vita-nu, unona bua righia jiruta.
8 Ps 141:2Aghá ueta, aná serubim ungagha ungaghade, kotú aná beforo ririkigari 24 de dano Sifi da Mendida eka tuva tumogha baĩ urota gonia vorea, endava takembuta. Númane daba-dabadava gauma rekade kotú aagha auri goldi mi arinu righia irieta gerare. Aná aaghada rova oorunu fendia dungitata evirota, dimbori vivitueta gerare. Dungitata evirota, dimbori vivitueta gerara, aná God da natofoda benunu re. 9-10 Ps 33:3; 98:1; Is 42:10; Ex 19:6; Amb 1:6Númane dano jujugea vavaseguturota, Sifi da Mendidu daa reka didivugutueta niningare. Daa aná evere:
“Aná ingiso eghamburari be finjemi takembuta, inona righia ifegari inono re.
Anada bee mokó, imó derurieta ambubuturera-da anomi,
inona Afa God du enemboda mino ututureravore.
Aná enembo rera mo, númanda abua-abua, gaa eini be eini, gavana nanjogode dano anada rova sirorea vitia-nu,
inona mino ututureravore.
Aná enembo*Ii, Gaga Isuri Ari Kambesi anava, gaga dumeni gaga Natofo da tuva vitia-nu irugea gia, tanana adi! inona unumbea bua, danode takembea,
namonde anda God tumogha baĩ ari-du ririeta, fristi* ea vitie.
Kotú númane rekago ambova inona rata, kokotofu ea,
enda númanena kaifa egegaita rousue.”
aghá rita. 11 Dan 7:10Amó rekago dibe fangea gerara mo, anera mane jo irugari inono irambi-mi daa didivugutueta niningare. Númane aná avo asumbari rorova jiria vita-de, serubim ungagha-ungagha kasava rorogea jijireguta-de, kotú serubim da goitu kena, aná beforo ririkigari 24 mi jijiregea roroguta-denu rorogea, biruru ea jijireguta. 12 Aghá egegea, daa be jojabe eghá regegutueta niningara, aná evere.
“Anode, gugua-ghayafade, neno nundubaride, durogha garide, unanade dano,
aná Sifi da Mendi derurieta, ambubuturia-dava vitia-du.
raga undú regegadora, aná inono bee re.
Aghá egegore!”
Aghá didivugutueta niningare. 13 Aghá ueta, eini-eini nanjogo uutuva, endava, enda rova, kotú karajeva dano tutuno ea, daa didivueta niningare.
“Kini da avo asumbariva asumbea vitia-dava,
kotú Sifi da Mendi dava durogha garide anode vitia-du,
númane kakara urota, tumanadu raga regegore!”
aghá regeguturota, divua sidara egeguta. 14 Aghá ua mo, aná serubim ungagha ungaghami gajiturota “Aĩ gaa bee re!” regegutata, beforo ririkigari 24 mi gonea vorea endava takembuturota tumogha baĩ egeguta.