1 Pol Barnabas yetkön Aikoniam sitinöŋ aŋgota mewöŋanök Juda yeŋgö köuluk mire öŋgöba Buŋa keu jiyohot. Jiyohotka Juda aka kian kantri ambazip yeŋgöreŋök kambu sehisehiŋi yeŋön uruŋini meleŋda Jisös möt nariget. 2 Möt narigetmö, Juda ambazip qahö möt narigeri, yeŋön gölme toŋi Juda qahö malgeri, mieŋgö uruŋini esiba aposol urunöŋ gege ak etkimegöra uruŋini kuŋguget. 3 Kuŋgugetka töndup nalö köröpŋi miaŋgöreŋ mala Kembu möt nariba awösamkakak kinda Buŋaŋi jiba malohot. Kembu kalem möriamŋaŋgö keuŋi jim asariyohotka keuŋiri naŋgöba ösumŋi böröŋire ali aiwesök aŋgöletot meyohotka asuhuget. 4 Mewö asuhugetka taongö ambazipŋan jula deŋget. Tosatŋan Juda jitŋememe yembuk öröröŋ jöhögetka tosatŋan aposol yetpuk toroqeba kinget.

5 Mewö aröŋda kingetka gölme toŋi aka Juda ambazip kianŋi yeŋön wahöta jitŋememeurupŋini yembuk urumohot aka melaimelai azi aposol mi “Kötnöŋ gila etkubin!” jiba mötmöriget. 6 Mewö mötmörigetka möta ölöŋ köla tököba Likaonia prowinsnöŋ anohot. Miaŋgöreŋ anda taon qetŋiri Listra aka Derbe aka miri liliköm etkiba tat angeri, miaŋgöreŋ aŋgorohot. 7 Miaŋgöreŋ aŋgota Ölöwak Buŋa jim asariba uru kuŋgum eŋgiba malohot. Mewö.

8 Listra taonöŋ azi kun köna yahötŋi kömukömuŋi malök. Mi nam körö uruŋeyök lokon asuhuba nalö kungen köna qahö tiba öne tatmalök. 9 Polnöŋ Buŋa keu jii möta tari uba könaŋamŋi kewö eka mötmöriyök, “Yaŋgö uruŋe mötnaripŋi ahöm waŋgiyöhaŋgöra aka ölöp ölöwakŋa,” mewö jiyök. 10 Mewö mötmöriba qet ketaŋi qeta jii mörök, “Mönö wahöta kinöŋ.” Mewö jii pöraŋ ala wahöta anda kaba kinök.

11 Polnöŋ mewö aiga ambazip kambu yeŋön mi eka Likaonia keuŋine kewö silata jiget, “Bem yetkön letota azi silebuk aka sutnine asuhuba neŋgöreŋ eta maljahot.” 12 Mewö jiba Barnabas qetŋi bem bohonŋini qetŋi Zus qetket aka Polnöŋ jitŋe memba keu jiyöhaŋgöra aka bem qetŋi Hermes qetket. 13 Mewö qetketka bem Zus yaŋgö jöwöwöl jikeŋi taon wösöŋe ahöyöhi, miaŋgö jike nup galömŋan bulmakau aziŋi eŋguaŋgita kayök. Mewö kaba ila kösasorom memba kaba taon kiripo naŋguŋe kinda ambazip kambu yembuk jakenöŋ ala jöwöwöl ohom etkibingö aket.

14 Mewö aketka aposolyahöt yetkön mi möta “Qahö dop kölja,” jiba qetala silepökeŋiri munjurata ösumŋiran ambazip kambu uruŋe anda qerohot. 15 *Eks 20.11; Sum 146.6Qeta kewö jiyohot, “Aziurup, iŋini mönö denöwögöra aka yuai mewöŋi akze? Niri mewöyök iŋini ewö gölme azi töhöna akzit. Niri Anutugö Ölöwak Buŋa jim asarim eŋgizit. Miaŋgöra iŋini mönö bem omaŋi andö eŋgume aka uruŋini meleŋda Anutu malmal Toŋaŋgöreŋ qekötahöme. Anutu malmal Toŋan Suep, gölme, köwet aka mieŋgö uruŋine yuai pakpak ahözawi, mi miwikŋaim eŋgii malje. 16 Gölmeŋi gölmeŋi pakpak yeŋön mönöwök mala kotkeri, Anutunöŋ i qahö aŋgön köl eŋgii nanŋini imbiŋinaŋgö dop malmalŋini iliŋgösöŋ malget.

17 “Qahö aŋgön köl eŋgiyökmö, töndup tönpin jipjap qahö malget. Qahöpmö, Anutunöŋ yuai ölöpŋi ölöpŋi ak eŋgiba malök. Yaŋön jiiga kie yöhöi wehön qei töhötmöriamŋan nalöŋi nalöŋi asuhui nem söŋgaip aka mewö miaŋön uruŋini kuŋgum eŋgii malget. Mewö malgetka nanŋi könaŋi mötmegöra kalemŋi mi kondel eŋgiba mewö miaŋön dangunuŋi ali malget.” 18 Yetkön mewö jiba ambazip kambu jöwöwöl ohom etkibepuköra jaraŋbaraŋ tiba jim susuhum eŋgiyohotka löwöriba mosötket. Mewö.

19 Listra yeŋön Pol Barnabas etkömosötketmö, Juda ambazip tosatŋan Antiokia taon aka Aikoniam siti mietköreŋök kaŋgota ambazip kambu urunöŋ gege ak eŋgiget. Ak eŋgiba yembuk öröröŋ luhuba Pol kötnöŋ qeba “Mönö kömuza!” jiget. Mewö jiba örörahöba taon andöŋe eta mosötket ahöyök. 20 Ahöyökmö, gwarek yeŋön kaŋgota liliköm waŋgigetka wahöta anda taonöŋ öŋgöyök. Miaŋgöreŋ öŋgöiga ahöyohot miri giaŋiiga Barnabasbuk Derbe sitinöŋ anohot.

21 Derbe sitinöŋ Ölöwak Buŋa jim asariba uruŋini kuŋgum eŋgiyohotka gwötpukŋan uruŋini meleŋda Jisösgö gwarekurupŋi aket. Mewö aketka Derbe taon mosöta Listra Aikoniam aka Antiokia taon mieŋgöreŋ liliŋgöba anda eŋgehot. 22 Eŋgeka tata miri dop liliköba Jisösgö gwarekurup yeŋgö uruŋini naŋgöba mem köhöiyohot. Kembu möt narigeri, yambuk qekötahöba kinmegö qambaŋ keuŋi eŋgiba kewö jiyohot, “Nini mönö iririkwarörök qakŋe (lömböt könaŋi könaŋi miwikŋaiba) mala paŋpaŋgöba Anutugö bemtohoŋnöŋ eu aŋgotpin.” 23 Urumeleŋ könagesö dop jitŋememeurupŋini möwölöhöba galöm malmegö könaŋi kusum eŋgiba kuŋgum eŋgiyohot. Kuŋgum eŋgiba Anutugöra nene siŋgi mala gwarek kambu yeŋgöra köuluköba Kembu möt narigeri, yaŋgö böröŋe al eŋgiyohot.

24 Al eŋgiba eŋgömosöta Pisidia prowins kutuba anda Pamfilia prowinsnöŋ aŋgorohot. 25 Miaŋgöreŋ aŋgota Perga sitinöŋ tata Buŋa keu jiba uruŋini kuŋgum eŋgiba Atalia taonöŋ geyohot. 26 Miaŋgöreŋ geba waŋgenöŋ öŋgöyohotka opo seri öröba möröreŋgögetka luhutnöŋ naŋgöi anda mala Antiokia sitinöŋ aŋgorohot. Antiokia urumeleŋ könagesö yeŋön i Anutugö kalem möriam uruŋe misin nup memahotköra mutuk Anutugö böröŋe al etkigetka eŋgömosöta anohot. Anda liliköba nupŋiri mi mem teköba kunbuk nanŋire sitinöŋ liliŋgöba kayohot.

27 Miaŋgöreŋ kaba urumeleŋ könagesö köl öröm eŋgiyohot. Köl öröm eŋgiyohot tokogetka keu kösohotŋiri kewö jiyohot, “Anutunöŋ netpuk mala aŋgöletot ketaŋi ketaŋi aka memba malök. Yaŋön nam köl netkii nup meziga kian kantriŋi kantriŋi yeŋön Jisös möt narimegöra naŋgu öröm eŋgii uruŋini meleŋget.” 28 Kösohotŋiri mewö jiba gwarek kambu yembuk nalö köröpŋi qem köriba tata malohot. Mewö.