1 Efesus miaŋgöreŋ göjupmajup miaŋön sörauba teköiga Polnöŋ gwarekurupŋi eŋgoholi kagetka urugö naŋgönaŋgö keu qambaŋ eŋgiba yaizökzök jiba eŋgömosöta Masedonia prowinsnöŋ anök. 2 Masedonia anda gölmeŋi gölmeŋi kutuba liliköba miaŋgöreŋ qambaŋ keu gwötpuk jiba mala Grik kantrinöŋ kayök. 3 Grik kaba köiŋ karöbut malök. Mi mal teköiga waŋge memba köwet kutuba Siria anmamgö mörök. Mewö mörökmö, Juda jitŋememe yeŋön könanöŋ qebingö aŋgönaŋi algetka kezapŋe gei mörök. Mi möta miaŋgöra Masedonia prowins kutuba gölme köna miriŋe liliŋgömamgö keuŋi uruŋan jöhöyök.

4 Keuŋi jöhöi suŋgurumurupŋi kewöŋan yambuk anget: Berea azi qetŋi Sopater Pirusgö nahönŋi, Tesalonaika azi qetŋiri Aristarkus aka Sekundus, Derbe azi qetŋi Gaius, Timoti aka Eisia prowinsgö azi qetŋiri Tikikus aka Trofimus. 5 Yeŋön qeljiŋe Troas anda miaŋgöreŋ neŋgöra mamböta malget. 6 Troas anda malgetmö, Luk ni aka tosatŋi neŋön beret yistŋi qahöpkö kendon mi Filipai sitinöŋ tarin. Mi tarin teköiga waŋgenöŋ öŋgöinga opo seri öröba möröreŋgögetka luhutnöŋ naŋgöi anda wehön 5 aiga Troas yeŋgöreŋ aŋgorin. Troas aŋgota miaŋgöreŋ wehön 7 toroqeba malin. Mewö.

7 Wehön 7 malin teköiga Polnöŋ wehön 8 miaŋgöreŋ eŋgömosöta anmamgö mörök. Mi möta suŋgem kondikŋi Sondagie miaŋgöreŋ tokoba Jisös mötmöriba beret mindipköbingöra tarin. Mewö taringa Polnöŋ yembuk eraum möta keuŋi jim köriba mali mali suŋgem bibiŋi ahök. 8 Nini miri uruŋi kungö qakŋe eu öŋgöba tokoba taringa lambe gwötpukŋan jeba asariget. 9 Tokoba taringa azi gwabö kun qetŋi Yutikus yaŋön jeŋgenaŋnöŋ tarök. Tari Polnöŋ keu jiba mali möri nalö köriiga gaunŋaŋgö möta ahöba gwörörök öröba könakembayök tala imbiŋi qahö möta miri uruŋi karöbut oŋgita gölmenöŋ geba qeyök. Geba qeiga luhuba geba memba wahöringa kömuyöhi, ehin.

10 Mewö ehinmö, Polnöŋ geba kepölaköba jiyök, “Kunbuk söŋgörö ösum ala guliza. Miaŋgöra kude awöwöliget.” 11 Mewö jiba kunbuk eröhaŋgöreŋ öŋgöba beret mindipköba neyök. Nemba yembuk nalö köröpŋi keu jiba mala mala miri giaŋiigun eŋgömosöta könanöŋ anök. 12 Aniga azi gwabö mi waŋgitketka guliba malöhi, mi eka urukölalep ketaŋi möta anget. Mewö.

13 Yeŋön angetmö, Polnöŋ nanŋak gölme köna anmamgö möta kewö jim kutum neŋgiyök, “Iŋini mönö qeljiŋe köwet köna miri qetŋi Asos miaŋgöreŋ angetka aitoŋgöba noaŋgitketka waŋgenöŋ öŋgöbin.” Miaŋgöra neŋön mosöta waŋgenöŋ öŋgöinga opo seri öröba möröreŋgögetka luhutnöŋ naŋgöi anda Asos miaŋgöreŋ aŋgorin. 14 Asos aŋgota nembuk aitoŋgöba Pol waŋgiringa waŋgenöŋ öŋgöba miri qetŋi Mitilini miaŋgöreŋ anin. 15 Mitilini anda miaŋgöreŋ opo seri kunbuk öröba möröreŋgögetka luhutnöŋ naŋgöi anda mala ahöba wahöta gölme jöhanŋi qetŋi Kios miaŋgö kösutŋe aŋgorin. Aŋgota toroqeba kutuba anda ahöba wahötagun miri qetŋi Samos miaŋgöreŋ geba kunbuk anda ahöba wahöta miri qetŋi Miletus miaŋgöreŋ kewögöra aŋgorin: 16 Polnöŋ “Yambu dölökŋi (Pentekost) mi esapköba Jerusalem sitinöŋ tatmam,” jiba nalö ayuhubinbuköra ösumok anbingö mörök. Miaŋgöra Eisia prowinsnöŋ nalö köröpŋi ayuhubinbuköra möta waŋgenöŋ öŋgöba Efesus siti oŋgitpingö keuŋi jöhöi malin. Mewö.

17 Miletus aŋgoringa Polnöŋ Efesus yeŋgöra kolek ala urumeleŋ könagesögö jitŋememeurup yeŋön eta kamegöra köl öröm eŋgiyök. 18 Köl öröm eŋgii miri qetŋi Miletus miaŋgöreŋ kaŋgotketka eŋgeka kewö jii mötket, “Nöŋön nalö mutukŋi Eisia prowinsnöŋ kayali, miaŋgöreŋök könahiba nalö pakpak embuk mala kota nup meali, iŋini miaŋgö tandökŋi ölöp möt yaköze. 19 Nöŋön Kembugö jeŋe uruni mem et al aŋgum teköba nupŋi denöwö memba kota malali, iŋini mi ölöp mötze. Nupŋi memba ambazip eŋgöra sahöta imbilni eriga malal. Juda yeŋön uruŋini qahö meleŋgeri, yeŋön nalö tosatŋi miaŋgöreŋ silenöŋ alal aket aka nuŋgubingöra areŋ asa-asambötŋi ala malget. Mi ala malgeraŋgöra aka esapesap murutŋi murutŋi miwikŋaiba sihimbölö möta malal.

20 “Nöŋön Buŋa keu mem ölöwak eŋgimakzawi, mi jim asarim eŋgiba malal. Mi qenjaröknöŋ tokoba aka miriŋi miriŋi miaŋgöreŋ öŋgöba kusum eŋgiba malal. Nöŋön miaŋgöra poraiba nup qahö mosöral. 21 Nup qahö mosöralmö, Juda kian aka gölme toŋi eŋgöra mewöyök keu kötŋi kewö naŋgöba jiba malal, ‘Iŋini mönö uruŋini meleŋda Anutugöreŋ qekötahöba Kembunini Jisös Kraist möt narim waŋgime.’ Iŋini mi pakpak ölöp möt teköze.

22 “Mötket, merak Uŋa Töröŋan ni Jerusalem sitinöŋ anmamgö kuŋgum niŋgiza. Miaŋgöreŋ anbi wani yuai asuhum niŋgimawi, mi qahö mötzal. 23 Mohok-kun kewö mötzal: Nöŋön taon denike denike anda malali, Uŋa Töröŋan miaŋgöreŋ saŋep ala kewö naŋgöba jii möta malal, ‘Gi mönö kahasililiŋ möta malnöŋga kösö mire al gihigetka tatman.’ 24  * 2 Tim 4.7Mewö jii möta malalmö, muat. Nöŋön toroqeba malbileŋak me kömumbileŋak, mi keu kun qahö ak niŋgiza. Mi qahöpmahöpmö, Kembu Jisösnöŋ nup al niŋgiyöhi, nöŋön mönö mia mem yakömamgö möt köhöizal. Yaŋön nöŋgöra kewö jiyök, ‘Anutunöŋ kalem möriamŋi ambazip eŋgimamgö mötzawi, gi mönö miaŋgö Ölöwak Buŋaŋi jim asariba malman.’ Miaŋgöra gölmenöŋ malmami me kömumami, mi mönö yuai omaŋi kötökŋi ak niŋgiza. Ambazip mönahotkö aoŋgit akzei, kunŋan miaŋgöreŋ kembaŋe kutuba luhut qahö alma. Nöŋön mönö miaŋgö dop nupŋi memba kembaŋe kutuba mosötpileŋbuköra ösumni pakpakŋan kapaŋ köla anda malmam.

25 “Mewö malmam-mö, mötket, nöŋön eŋgö sutŋine anda kaba Anutu bemtohoŋaŋgö könaŋi jim asaribi mötkeri, iŋini nöŋgö jesöŋgöröni mi kunbuk qahö ekŋe. Eŋgöreŋök kunŋan kun qahö nekŋawi, merak mewö mötzal. 26-27 Miaŋgöra nöŋön iŋini Anutugö jitŋi pakpak wuataŋgömegöra jiba uru kuŋgum eŋgiba malal. Mi mönö qahö poraiba mosöral. Miaŋgöra eŋgöreŋök kunŋan kun siŋgisöndokŋaŋgöra sohoba kömumba könöp sianöŋ gema ewö, iŋini mönö ni jim niŋgibingö osime. Nöŋön mi merak eŋgöra aukŋe naŋgöba jim köhöizal.

28 “Kembunöŋ nanŋi sepŋi mokoba miaŋön könagesöurupŋi bohonŋini meiga buŋaŋi ak teközei, iŋini mönö i lama ewö galöm köla köyan köl eŋgiba malme. Uŋa Töröŋi yaŋön nanŋak nup mi al eŋgiyök. Miaŋgöra iŋini mönö nanŋini aka Kembugöreŋ lama kambu yeŋgöra galömŋini mem aŋguba malme. 29 Nöŋön anbiga miaŋgö andöŋe ambazip kanjamŋinambuk mi kiam kalŋi ewö eŋgö sutŋine asuhume. Yeŋön asuhuba lama kambu eŋgöra qahö möta piakŋi aka laŋ kaba eŋgöhöme, mi mötzal. 30 Nanŋini sutŋineyök azi tosatŋan wahöta kinda Jisös gwarekurupŋan göraŋe anmegöra öröm eŋgiba muneŋ keu jiba malme. 31 Miaŋgöra iŋini mönö uruguliguli mala keu ki uru könömŋine ala mötmörime: Nöŋön (yara) yambu karöbutkö dop suŋgem asak qambaŋ keuŋi keuŋi mi iŋini mohot mohot qösösök (qörörök) kusum eŋgiba malbiga imbilni erök.

32 “Nöŋön merak iŋini Anutugö böröŋe al eŋgiba kewö jizal: Yaŋgö Buŋa keuŋan mönö kalem möriamŋi indela köyan köl eŋgimakŋa. Anutunöŋ köhöiba uruŋini naŋgöba möhamgöiga ölöp köhököhöi miwikŋaiba mutulaŋgömakŋe. Iŋini Anutubuk lapingögetka alaurupŋi pakpak tök kutum eŋgiiga sarakŋi akzei, mönö yeŋgö sutŋine aŋgota dum tatatŋini memba oyaeŋkoyaeŋ aka malme. 33 Ni eŋgöreŋök kungö guli jalö me moneŋ opo mi qahö buŋa qem aŋgumamgö möta malal. 34 Ni aka suŋgurumurupnan yuaigöra osiba malini, mi mönö nani böröni kiaŋön nup memba miwikŋaiba malal.

35 “Mi pakpak aka memba silik ölöpŋi kondel eŋgial. Iŋini mönö mewöŋanök nup memba malme. Mewö mala ambazip löwöriba nup memegö osizei, mi ölöp köyan köl eŋgiba malme. Nup megetka ölŋi ahuiga Kembu Jisösgöreŋ keu ki mötmörime: Yaŋön nanŋak keu kun kewö jiyök, ‘Inap yuai buŋa qem aŋgugetka teköba pömsöm qeiga öne malmemö, tosatŋi yeŋgöra yuai kalemŋina eŋgigetka Anutunöŋ likepŋi meleŋniga oyaeŋkoyaeŋ akŋe.’ Mewö.”

36 Polnöŋ keu mewö jiba eta simin köla körek yembuk Anutu köuluköyök. 37 Köuluköiga körek yeŋön amburereŋ aka urusahöt qeba aŋgum waŋgiba numbuŋi yöhötim neget. 38 Polnöŋ mutuk keu kun kewö jii mötket, “Iŋini nöŋgö jesöŋgöröni kunbuk qahö ekŋe.” Keu mewö möta miaŋgöra wösöbirik öŋgöŋgöŋi möta kinda waŋgita waŋgenöŋ öŋgöba yaizökzök jiba umbulget. Mewö.