19
Polnöŋ Efesus mala nup meyök.
Apolosnöŋ Korint sitinöŋ maliga Polnöŋ Antiokia siti mosöta prowins tosatŋi* Gölme mi nalö kewöŋe kantri qetŋi Töki (Turkey) miaŋgö uruŋe ahöza. oŋgita mala mala köwet göraŋe Efesus sitinöŋ aŋgorök. Aŋgota miaŋgöreŋ gwarek tosatŋi miwikŋaiba eŋgehök. Eŋgeka kewö qesim eŋgiyök, “Iŋini möt nariba uruŋini meleŋgeri, Uŋa Töröŋan mönö nalö miaŋgöreŋ uruŋine geyök me qahö?” Mewö qesim eŋgiiga kewö meleŋda jiget, “Uŋa Töröŋan maljawi, nini miaŋgö keuŋi qahöpmahöp mörin.”
Meleŋda jigetka kewö jiyök, “Iŋini mönö wani o melun mem eŋgigerawa malje?” Mewö jiiga meleŋget, “Nini Jonöŋ o melungöra jiba malöhi, mönö mi mem neŋgiget mein.”
* Mat 3.11; Mak 1.4, 7-8; Luk 3.4, 16; Jon 1.26-27Mewö meleŋgetka Polnöŋ jiyök, “Jonöŋ Jisösgöra keu jiba ambazip kambu uruŋini kuŋguiga kewö mötket, ‘Nöŋgö andöne azi kun kamawi, iŋini mönö i möt nariba uruŋini meleŋget.’ Mewö jii möta uruŋini meleŋgeri, Jonöŋ i o melun mem eŋgiba malök.”
Mewö jii mötketka Polnöŋ Kembu Jisösgö qetŋe o melun mem eŋgiyök. Mem eŋgiba böröŋi nöröpŋine aliga Uŋa Töröŋan uruŋine geiga kantri tosatŋaŋgö keu murutŋi murutŋi könahiba jiba kezapqetok keu jiget. Azi mi mindiriba 12 miaŋgö dop malget.
Polnöŋ köuluk mire öŋgöba kinda Anutugö bemtohoŋaŋgö könaŋi eraum möta awösamkakak kinda suahö ewö uruŋini kuŋgui keuŋi qeapköbingö osiba malget. Mewö malgetka köiŋ karöbut teköyök. Qeapköbingö osigetmö, tosatŋan yaŋgiseŋ aka qahö möt nariba Kembugöreŋ könaŋi aukŋe jim böliba ambazip jeŋine luasö jiba kinget. Mewö jiba kingetka Polnöŋ kewöta mendeŋ eŋgiba eŋgömosöta gwarekurupŋi eŋguaŋgiriga tikep anget. Tikep anda azi qetŋi Tiranus yaŋgö qenjarök mötmöt jakenöŋ silim dop (aua 5 tokoba) kusum eŋgiiga eraum-mötmöt aka malget. 10 Mewö aka malgetka Kembugö Buŋa keuŋan sehiiga (yara) yambu yahöt teköyök. Mi teköiga Buŋa keu mi Eisia prowins uruŋe miri toŋi aka Juda ambazip pakpak yeŋgö kezapŋine gei möt teköget. Mewö.
Sewa nahönurupŋan öme közölbingö osiget.
11 Anutugö kukösumŋan Polgöreŋ aŋgoriga nup memba böröŋi ambazip nöröpŋine ali Anutunöŋ aŋgöletot murutŋi murutŋi meiga asuhuget. 12 Mewö mali ambazip kawöl eŋgöhöi malgeri, tosatŋan Polgö sileŋeyök nöŋgöp mitimiti aka opo jöhanŋi tosatŋi mewöyök memba anda kaba qakŋine algetka kawölŋini eŋgömosöri ömeŋini kota angetka ölöwaket. 13 Juda sile galöm tosatŋan liliköba öme eŋguataŋgöba anda kaba malgeri, yeŋön mewöŋanök könahiba ömenöŋ kölköljiŋjiŋ mem eŋgigeri, yeŋgö qakŋine Kembu Jisösgö qetŋi qeta ösumŋi köl öröbingö esapköget. Esapköba kewö jiget, “Polnöŋ Jisösgö qetŋi qeta uru kuŋgum neŋgimakzawi, nöŋön mönö Kembu miaŋgö qetŋe öme kota kesalmegöra jim kutum eŋgizal.” 14 Jisösgö qetŋi mewö qetkeri, yeŋgö sutŋine Juda jike nup galöm bohonŋi qetŋi Sewa yaŋgö nahönurupŋi 7 yeŋön mewöyök malget.
15 Yeŋön ömewöröme kun mewö jim kutum waŋgigetmö, yaŋön meleŋda kewö jim eŋgiyök, “Ni Jisös möt waŋgizal aka Pol möt waŋgizalmö, iŋini mönö niŋia?”
16 Mewö jim eŋgiba azi uruŋe kinöhaŋön mönö luhuba qakŋine öŋgöba qeraköba eŋgömeyök. Mewö körek pakpak luhut ala yaijapaleleŋ mem eŋgiba sileŋini kutumutuba opo malukuŋini munjukunjurariyök. Munjukunjurariga nanŋik nanŋik sileŋine sepgwörörök eta kini tököba kesala miri uruŋi mi mosöta sileŋini gwamönŋi aukŋe eta angaiget. 17 Mewö asuhuiga Juda kian aka gölme toŋi Efesus malgeri, körek yeŋön miaŋgö buzupŋi möta gwötpuk auruba awöwöliget. Awöwöligetka tosatŋan Kembu Jisösgö qetŋi kapaŋ köla möpöseigetka aködamunŋambuk ahök. 18 Möt nariba uruŋini meleŋgeri, yeŋgöreŋök gwötpukŋan anda siŋgisöndokŋini indela jim köleŋget. 19 Tosatŋan qarösoŋgo amötqeqe memba malgeri, yeŋgöreŋök gwötpukŋan buk papiaŋini memba kaba tokoba ambazip pakpak yeŋgö jeŋine kinda aukŋe könöpnöŋ gilget jeyök. Buk papia mieŋgö söŋgöröŋini oyoŋda mindirigetka mindimindiri jaŋgöŋini mi silwö moneŋ (Kina) 50.000 miaŋgö dop ahök. 20 Tandök mewö aketka Kembugö Buŋa keuŋan mönö ösum-mumuŋambuk sehiba köhöiba anök. Mewö.
Polnöŋ nupŋaŋgö areŋi alök.
21 Yuai pakpak mi asuhum teköiga Uŋa Töröŋan Pol sölölöhöm waŋgii keuŋi jöhöba kewö jiyök, “Ni köwet kutuba Grik kantrigö likepŋi yahöt Masedonia aka Akaia miaŋgöreŋ liliköbi teköiga mosöta Jerusalem sitinöŋ anmam.” Mewö jiba toroqeyök, “Miaŋgöreŋ anda tata Jerusalem mosöta Rom siti mewöŋanök anda ekŋam.” 22 Mewö jiba neŋakŋi yahöt Timoti aka Erastus melaim etkiiga Masedonia anohotka nanŋak toroqeba nalö tosatŋi Eisia prowins uruŋe malök. Mewö.
Efesus yeŋön bim karim aket.
23 Efesus sitinöŋ Kembugöreŋ köna wuataŋgögetka miaŋgöra nalö miaŋgöreŋ eŋololoŋ göjupmajup keta bölökŋi asuhuyök. 24 Silwö nup meme azi kun qetŋi Demitrius yaŋön silwö ohoiga kolkolgöiga qekötahöba bem ambi qetŋi Artemis yaŋgö jöwöwöl jikegö dop imut morömorö memba malök. Mi meiga bohonŋi memba malgetka moneŋ öŋgöŋgöŋi öröi kölköl-örörö alaurupŋan mendeŋda meget. 25 Megetka Demitrius aka kambu tosatŋan nup mewöŋi memba malgeri, mi mohotŋe eŋgoholi kaba tokogetka kewö jii mötket, “Azi alaurup, nini nup ki meinga bohonŋi ölöpŋi asuhuba kamakza, mi mötzin. 26 Mi mötzinmö, Pol azi miaŋön Efesus kiaŋgöreŋ kaŋgota ambazip uruŋini esiba ki aka Eisia prowins pakpak dop köla ambazip kambuŋi kambuŋi kuŋgum eŋgii jaŋjuŋ akzei, mi nalö kewöŋe ölöp eka mötze. Yaŋön kewö jimakza, ‘Bem börönöŋ memeŋi mi bem ölŋi qahö.’
27 “Mewö jiba maliga nini kölköl-örörö nupnini memakzini, miaŋgö qetŋi mem bölii jijiwilit akepukö urulömböt akza. Aka miyöhök qahöpmö, urulömböt kun kewö ahöza: Ambazip pakpak Eisia prowins uruŋe aka gölmeŋi gölmeŋi pakpak miaŋgöreŋ bem ambi öŋgöŋgöŋi Artemis waikŋi memba möpöseimakzei, yaŋgö bem qetbuŋaŋi ketaŋan ayuhuba ösumŋan etpapuk aka jöwöwöl jikeŋaŋgö qetŋan böliba ambazip jeŋine eta omaŋi akapuk. Urulömböt mewö ahöza. Miaŋgöra waimanjat möta keu ki jizal.”
28 Demitriusnöŋ mewö jiiga suŋgurum alaurupŋan mi möta irimŋini seholiiga kewö jiba qet gigilahöget, “Efesus neŋgöreŋ Artemis mi öŋgöŋgöŋi!” 29 Qet gigilahögetka eŋololoŋ göjupmajup miaŋön sehiba sehiba siti körek dop kölök. Mewö aiga Masedonia azi yahöt qetŋiri Gaius aka Aristarkus Polgö suŋgurumyahötŋi mi qeraköba etkömemba örörahöm etkiba qezakqezak mirinöŋ anda totoko alget. 30 Totoko algetka Polnöŋ mewöyök ambazip kambulelembe yeŋgö sutŋine anmamgö mörökmö, urumeleŋ ambazipnöŋ i aŋgön köl waŋgiget.
31 Eisia prowinsgö galömkölköl azi tosatŋan Polgö alaurupŋi akeri, yeŋön mewöyök kolek ala kewö ulet waŋgiget, “Qezakqezak mirinöŋ totoko aljei, gi mönö nangi miaŋgöreŋ kude kondel eŋgiman.” 32 Totoko algeri, miaŋgöreŋ ambazip gwötpukŋan kinda tokogeraŋgö könaŋi kun qahö mötkeraŋgöra nanŋik nanŋik laŋlaŋ qet gigilahöba siksauk eŋololoŋ ketaŋi megetka sehiba anök. 33 Mewö ani Juda yeŋön azi qetŋi Aleksander kuŋguba naŋgögetka kambu yeŋön öröba köna algetka qaikŋe eu öŋgöba kinök. Öŋgöba kinda ambazip jemesoholŋine keu likepŋi meköba jimamgö möta börö pözöŋ misiba aiwesök mem eŋgiyök.
34 Aiwesök mem eŋgiyökmö, Juda azia akzawi, mewö möt kutuba miaŋgöreŋök numbuŋini mindiriba körekŋan könahiba keu kewö qetket, “Efesus neŋgöreŋ Artemis mi öŋgöŋgöŋi!” Mewö qeta mala aua yahötkö dop silata qeta kinget.
35 Qeta kingetka siti pomŋan ambazip kambu uruŋine memba eta ali göröŋ algetka kinda kewö jiyök, “Efesus ambazip, nini nanine siti kiaŋgöreŋ Artemis öŋgöŋgöŋi mi möpöseiba maljin. Nini yaŋgöreŋ jöwöwöl jike aka köt imutŋi kömbukŋi Suepnöhök eröhi, mi galöm köla maljin. Keu mi iŋini körek ölöp mötze. 36 Mi kunŋan qaŋ kölmawaŋgö dop qahö. Miaŋgöra iŋini mönö uruŋini ösöŋ memba eta ala bönjöŋ malme. Kezapjupjup yuai kun kude akŋe. 37 Azi ki jöwöwöl jikenöŋ öŋgöba yuai kun qahö kiom qeba mem böliyohot. Bem ambinini qahö ilit waŋgiyohot. Iŋini töndup i etkuaŋgitketka ki kinjahot.
38 “Demitrius aka yaŋgö kölköl-örörö alaurupŋan tosatŋi yembuk aŋgururuk aka keu jim aŋgubeak ewö, kiap mönö ahöze aka keu jakegö totokoŋi totokoŋi mi keu mindiŋgöbingöra alakze. Miaŋgöra mönö ölöp miaŋgöreŋ anda keu jakeŋe al aŋguba aröŋda kingetka dop kölma. 39 Iŋini yuai kun toroqeba jibingö mötpeak ewö, siti kiaŋgö toŋan mönö ölöp könagesö öröm eŋgiiga qenjarök sombemnöŋ tokoba keu kewöta jim teköme. 40 Merak eŋololoŋ göjupmajup ketaŋi ki könaŋi qahöpmö, töndup imbisölöm asuhuzawi, mi Rom gawman yeŋön möta kewö jibepuk, ‘Efesus yeŋön Rom mindimindiri gawman qetala bim karim akze.’ Mewö jiba keu jakeŋe al neŋgibepuk. Miaŋgö urulömbötŋi akza, mi mötzal. Keu jakeŋe al neŋgiba karim kiaŋgö könaŋaŋgöra qesim neŋgibeak ewö, nini mönö likepŋi gagabe köla jibinaŋgö dop qahö mötzin.” 41 Efesus siti pomŋan keu mewö jiba ambazip kambu köndeŋ eŋgiiga sörörauba deŋda anget. Mewö.

*19:1: Gölme mi nalö kewöŋe kantri qetŋi Töki (Turkey) miaŋgö uruŋe ahöza.

*19:4: Mat 3.11; Mak 1.4, 7-8; Luk 3.4, 16; Jon 1.26-27