3
Jon O-melun azinöŋ Buŋa keu jiyök.
Mat 3.1-12; Mak 1.1-8; Jon 1.19-28
Zekaraiagö nahönŋi Jon yaŋön nupŋi könahiyök. Nalö miaŋgöreŋ sisa kiŋ qetŋi Taiberius yaŋön Rom sitinöŋ mala gölmeŋi gölmeŋi mindiriba yambu (yara) 15 azi kembu aka toroqeba galöm köl eŋgii malget. Galöm köl eŋgimamgöra gölmeŋi gölmeŋi Israel liliköba ahözei, mi mesiŋgetka bahöŋi 4 aiga mieŋgö kiŋini 4 mi kewö kuŋguget:
Pontius Pailöt, Herod, Filip aka Lisanias. Pontius Pailöt mi Judia prowinsgö premiöŋina malök. Kiŋ Herodnöŋ Galili prowins galöm köl eŋgiyök aka datŋi Filipnöŋ Ituria aka Trakonitis prowins yahöt mieŋgö kembuŋina malök aka Lisanias yaŋön Abilene gölme memba malök.
Jike nup galöm bohonŋini yahöt malohot, qetŋiri Anas aka Kaiafas. Nalö miaŋgöreŋ Zekaraiagö nahönŋi Jon yaŋön gölme qararaŋkölkölŋe maliga Anutugöreŋ Buŋa keu asuhuiga mörök. Anutugö Buŋa möta anda Jordan o töwatŋaŋgö kösutŋe miri dop liliköba malök. Liliköba mala Buŋa keunöŋ uruŋini kuŋguba kewö jiba malök, “Iŋini mönö uruŋini meleŋgetka nöŋön o melun mem eŋgimam. Mewö aketka Anutunöŋ siŋgisöndokŋini saŋgoŋda mosötma.”
* Ais 40.3-5Miaŋgö keuŋi mi kezapqetok azi Aisaianöŋ ohoi yaŋgö Buzup Kimbinöŋ kewö ahöza,
“Kolek garata kunŋan gölme qararaŋkölkölŋe qeta maliga anda qetŋi kewö mötme,
‘Kembunöŋ kamawo! Miaŋgöra mönö jöjöröba könaŋi mesatket. Mönö uruŋini mindiŋgöba könaŋi qölöleiget.
Köna örue pakpak mönö qem tigetka diŋdiŋi akŋa.
Kunduŋi wanjaŋi pakpak mi mönö qeköba köl qölöleigetka köröŋi akŋa.
Köna mösökqösökŋambuk mi mönö möhamgögetka diŋgime.
Luhutnöŋ köna misiiga simbiŋsambaŋ tatzawi, mi mönö kutuba mesatketka solanima.
Anutunöŋ oyaeŋkoyaeŋ Toŋi melaii kaiga gölmeŋi gölmeŋi pakpak
yeŋön mi eka ek kutume.”
* Mat 12.34; 23.33Jonöŋ miaŋgö dop uruŋini kuŋguiga ambazip kambuŋi kambuŋi yeŋön o melun mem eŋgimapköra yaŋgöreŋ kagetka eŋgeka yeŋgöra kewö jiyök, “O qatö moröŋi, iŋini uruŋini qahö meleŋgetka Anutugö irimŋan seholiiga likepŋi meleŋ eŋgimamgö akza. Mi ölöŋ kölbingö goro keuŋi mi mönö daŋön jii möta sömbuŋini möta ki kaze?
* Jon 8.33“Miaŋgöra mönö ölŋanök uruŋini meleŋme. Bölöŋamŋineyök liliŋgögetka ölŋi asuhui mi mönö ahakmemeŋinan aukŋe kondela malme. Uruŋine möndömöndö keu kewö kude mötmörime, ‘Neŋön mönö Abrahamgö gwölönarökŋa malinga Anutunöŋ qahö ayuhum neŋgima.’ Mewö töptöpŋine qemakzemö, ölŋi mi qahö ahakze. Nöŋön miaŋgöra kewö jibi mötket: Anutunöŋ köt ki ölöp jim kutum eŋgiiga letota Abrahamgö gwölönarökurupŋi aka Anutu möpöseimakŋemö, iŋini denöwö?
* Mat 7.19“Uruŋini qahö meleŋme ewö, Anutunöŋ mönö iŋini ip ewö teŋgöri etpingö akze. Ip pakpak ölŋi ölöpŋi qahö kuŋgumakzei, mi mönö köli etket könöpnöŋ gili geme. Ip mewöŋi kölmamgö kesiŋi lök jitŋi saŋe ala ip könaŋe ali jöjöröba ahöza. Anutunöŋ mönö bölöŋamŋinaŋgö likepŋi meleŋ eŋgima.”
10 Mewö jiiga ambazip kambuŋi kambuŋi yeŋön kewö qesiba jiget, “Mewögöra nini mönö denöwö ahinga dop kölma?”
11 Qesiba jigetka kewö meleŋnök, “Kunŋan maluku yahöt memba maljawi, yaŋön mönö mietköreŋök kun mi malukuŋi qahö i waŋgima aka denike yeŋön neneŋinambuk maljei, yeŋön mönö mewöyök neneŋini qahö yeŋgöra mendeŋ eŋgime.”
12  * Luk 7.29Takis meme azi tosatŋan mewöyök o melun mem eŋgimapkö kaba qesim waŋgiget, “Böhi, neŋön mönö denöwö ahinga dop kölma?” 13 Qesim waŋgigetka jii mötket, “Gawmanöŋ takisgö jim kutum eŋgii ahözawi, dop mi mönö qahö oŋgita meme.”
14 Yarö azi tosatŋan mewöyök qesim waŋgiget, “Niniato? Neŋön denöwö ahinga dop kölma?” Qesim waŋgigetka kewö jii mötket, “Kungöreŋ moneŋgöra kuŋguba upetkupet aka kiom kude kölmemö, nanŋini töwaŋini memakzei, miambuk mönö urumohok aka ösöŋ malme.” 15 Ambazip pakpak yeŋön “Jonöŋ Amötqeqe Toŋi Kraist akapuk,” jiba uruŋinan mewö mötmöriget. Miaŋgö könaŋi mötpingö kezapŋini köröpŋi aket.
16 Mewö aketka Jonöŋ körek yeŋgöra kewö jiyök, “Nöŋön o töhönöŋ melun mem eŋgizalmö, azi kukösumŋi köhöikŋi kun kama. Yaŋgö kukösumŋi öŋgöŋgöŋan mönö nöŋgöreŋ oŋgitma. Yaŋön azi öŋgöŋgöŋi akŋawaŋgöra nöŋön yaŋgö köna esuŋaŋgö kösöŋi bauköba pösatmamgö qötötaŋgömam. Yaŋön mönö Uŋa Töröŋi uruŋine ali könöp bölamŋan köl könjörat eŋgiiga mewö miaŋön melun mem eŋgima. 17 Yaŋön ölŋi aka kamböŋi mendeŋ etkimamgö sapakŋi memba kaŋgota uba qöröreŋgöba kewötma. Kewöta wit kötŋi tokoba köweŋe almapmö, kamböŋi aka gwaugulapŋi mi mönö usuŋniga könöpnöŋ geba teteköŋi qahö jema.”
18 Keu mewöŋi mewöŋi gwötpuk toroqeba jiba uruŋini kuŋguba Ölöwak Buŋa ambazip kambu yeŋgöra jim asariba malök. 19  * Mat 14.3-4; Mak 6.17-18Malökmö, gölme bahöŋaŋgö kiŋ Herod yaŋön datŋaŋgö anömŋi qetŋi Herodias mi ölöŋ meyök aka bölöŋi könaŋi könaŋi aka malöhi, miaŋgö sapŋi Jonöŋ qeba munjurariga jim waŋgiyök. 20 Jim waŋgiba bölöŋamŋi kun toroqeba aka Jongöreŋ nupŋi tözöpköba suahö galömŋi jii Jon memba kösö mire alget. Mewö.
Jonöŋ Jisös o melun mem waŋgiyök.
Mat 3.13-17; Mak 1.9-11
21 Jonöŋ ambazip pakpak o melun mem eŋgiba Jisös mewöyök o melun mem waŋgiyök. Mem waŋgii köuluköiga miaŋgöreŋök Suepnöŋ aŋaŋiyök. 22  * Jen 22.2; Sum 2.7; Ais 42.1; Mat 3.17; Mak 1.11; Luk 9.35Aŋaŋiiga Uŋa Töröŋan meleŋda kembö nei ewö aka Jisösgö qakŋe erök. Mewö eriga Suepnöhök qet kun kewö asuhuyök, “Göŋön mönö nani wölböt nahöna aknöŋga köröni ölöwahiga geknahöm ak gihizal.” Mewö.
Jisösgö isikurupŋi yeŋgö qet areŋini
Mat 1.1-17
23 Jonöŋ Jisös o melun mem waŋgiiga yambu (yara)ŋi 30 miaŋgö dop aiga amötqeqe nupŋi könahiba memba malök. Memba maliga Josefgö nahönŋa akzawi, ambazipnöŋ mewö mötmöriget. Jisös iwiŋi Josef, asaŋi qetŋi Heli. 24 Jisös amböŋi qetŋi Matat, sukumŋi qetŋi Liwai. Liwai iwiŋi Melki, asaŋi Janai, amböŋi Josef, 25 sukumŋi Matatias. Matatias iwiŋi Amos, asaŋi Nahum, amböŋi Esli, sukumŋi Nagai. 26 Nagai iwiŋi Mat, asaŋi Matatias, amböŋi Semen, sukumŋi Josek. Josek iwiŋi Joda, 27 asaŋi Joanan, amböŋi Resa, sukumŋi Zerubabel. Zerubabel iwiŋi Sealtiel, asaŋi Neri,
28 amböŋi Melki, sukumŋi Adi. Adi iwiŋi Kosam, asaŋi Elmadam, amböŋi Er, 29 sukumŋi Josua. Josua iwiŋi Eliezer, asaŋi Jorim, amböŋi Matat, sukumŋi Liwai. 30 Liwai iwiŋi Simeon, asaŋi Juda, amböŋi Josef, sukumŋi Jonam. Jonam iwiŋi Eliakim, 31 asaŋi Melea, amböŋi Menna, sukumŋi Matata. Matata iwiŋi Neitan, asaŋi Deiwid, 32 amböŋi Jesi, sukumŋi Obed. Obed iwiŋi Boaz, asaŋi Salmon, amböŋi Nason,
33 sukumŋi Aminadab. Aminadab iwiŋi Admin, asaŋi Arni, amböŋi Hezron, sukumŋi Perez. Perez iwiŋi Juda, 34 asaŋi Jeikob, amböŋi Aisak, sukumŋi Abraham. Abraham iwiŋi Tera, asaŋi Nahor, 35 amböŋi Serug, sukumŋi Reu. Reu iwiŋi Peleg, asaŋi Eber, amböŋi Sela, 36 sukumŋi Kainan. Kainan iwiŋi Arpaksad, asaŋi Siem, amböŋi Noa, sukumŋi Lamek. 37 Lamek iwiŋi Metusela, asaŋi Enok, amböŋi Set, sukumŋi Adam. Adam mi Anutunöŋ mei ahuyök. Mewö. 38 (-)

*3:4: Ais 40.3-5

*3:7: Mat 12.34; 23.33

*3:8: Jon 8.33

*3:9: Mat 7.19

*3:12: Luk 7.29

*3:19: Mat 14.3-4; Mak 6.17-18

*3:22: Jen 22.2; Sum 2.7; Ais 42.1; Mat 3.17; Mak 1.11; Luk 9.35