1 Jisösnöŋ gwarekurupŋi 12 mi eŋgoholi tokogetka ömewöröme pakpak közöl eŋgimegöra aka uzi kawöl mem ölöwakŋegöra kukösumŋi ösum-mumuŋambuk al eŋgiyök. 2 Kukösum eŋgiba kewö jiba melaim eŋgiyök, “Iŋini mönö anda Anutugö bemtohoŋaŋgö könaŋi ambazip jim asarim eŋgiba kawöl ambazip mem ölöwak eŋgiba malme.” 3 *Luk 10.4-11; Apo 13.51Melaim eŋgiba jii mötket, “Iŋini köna anmeaŋgöra yuaiŋi kun qahö memba anme, öröp qahö, gösö qahö, köna nalem qahö, soujeŋi qahö. Maluku semönŋi qahöpmö, mohok meme.

4 “Anda mire denike denike aŋgotmei, mönö miaŋgöreŋök mala nup memba taon mi mosöta köna anme 5 Anda mala miri kunöŋ aŋgotketka qahö köl öröm eŋgiba keuŋini qahö mötketka nesampurekŋini mönö kewö jiba kondel eŋgime, ‘Nini eŋgö gölmenöŋ kainga sölbuham köna tambönine mekötahözawi, mi mönö tim tönjöraringa nanŋine liliŋgöba gema.’ Mewö jigetka könaŋamŋini solanŋi möt kutugetka ölöp taon mi mosöta toroqeba anme.”

6 Mewö jiiga mosöta anda miriŋi miriŋi liliköba miri dop Ölöwak Buŋa jim asariba kawöl ambazip mem ölöwak eŋgiba malget. Mewö.

7 *Mat 16.14; Mak 8.28; Luk 9.19Yuai pakpak asuhuyöhi, miaŋgö qetbuŋaŋan sehiba gölme bahöŋaŋgö (Galili prowinsgö) kiŋ Herodkö kezapŋe geiga mörök. Ambazip tosatŋan kewö jiget, “Jon O-melun azinöŋ mönö kömupnöhök wahöta malja.” Miaŋgöra kiŋnöŋ keugö jaruba lalalulu siksauk ahök. 8 Ahökmö, tosatŋan jiget, “Elaijanöŋ kunbuk asuhuba malja.” Tosatŋan toroqeba jiget, “Kezapqetok azi walŋi yeŋgöreŋök kunöŋ mönö guliba wahöta malja.” 9 Mewö jigetmö, kiŋ Herodnöŋ kewö jiyök, “Jon O-melun azi mi nöŋön jibi jölŋi kutugetmö, kungö keuŋi mewö jiget mötzali, mi mönö daŋön?” Mewö jiba Jisös ekŋamgö kapaŋ köla jörömqöröm ahök. Mewö.

10 Melaimelai azi aposol yeŋön Jisösgöreŋ liliŋgöba yuai aka megeri, miaŋgö kösohotŋi pakpak jiget mörök. Jiget möta eŋguaŋgita ambazip qenjarökŋini mosöta taon qetŋi Betsaida miaŋgö kösutŋe nanŋinök kötikŋe malbingö anget. 11 Angetmö, ambazip kambu yeŋön mi möta Jisös andöŋe wuataŋgöba anget. Anda Jisösgöreŋ kagetka köl öröm eŋgiba Anutu bemtohoŋaŋgö könaŋi jim asariba kawöl ambazip mem ölöwak eŋgiyök.

12 Mewö aka mali wehön jeŋan teköba gemamgö ahök. Mewö aiga gwarek 12 yeŋön kaba Jisös kewö jiget mörök, “Nini gölme kötikŋi kiaŋgöreŋ maljinaŋgöra gi ölöp ambazip kambu ki melaim eŋginöŋga miri koum dowe dowe tat anjei, miaŋgöreŋ anda ahöahö miri aka nene miwikŋaime.”

13 Mewö jigetmö, kewö jii mötket, “Eŋön mönö nanŋinak i nene gumohom eŋgime.” Mewö jiiga meleŋget, “Nini beret sahötŋi 5 aka söra yahöt miyök memba maljin. Miaŋgöra denöwö akinto? Nini ölöp anda ambazip kambu ki pakpak yeŋgöra nene söŋgöröŋi membinak me? 14 (Yeŋön azi 5000:gö dop malje.)” Mewö meleŋgetka gwarekurupŋan kewö jii mötket, “Eŋön mönö ambazip eŋgöra jiba mendeŋ eŋgigetka kambu dop 50:gö dop nene nembingö tokoba eta tatme.”

15 Jiiga mewö aka mendeŋ eŋgigetka ambazip körekŋan eta kambuŋi kambuŋi tat anget. 16 Tat angetka beret 5 aka söra yahöt mi memba suepnöŋ ui öŋgöiga kötuetköyök. Kötuetköba beret mindipköba gwarekurupŋi eŋgiiga ambazip kirip dop mendeŋda sutŋine alget. 17 Sutŋine algetka körekmakörek nemba nem timbireŋ aket. Nene kitipŋi kitipŋi mosötkeri, mi gwarek yeŋön qezakögetka sakap 12 miaŋgöreŋ geba kokolak qeyök. Mewö.

18 Nalö kunöŋ Jisösnöŋ nanŋök gölme kungen köuluköiga gwarekurupŋan yambuk malgetka qesim eŋgiba kewö jiyök, “Ambazipnöŋ nöŋgöra denöwö jimakze? Ni niŋia akzal?”

19 *Mat 14.1-2; Mak 6.14-15; Luk 9.7-8Jiiga meleŋda kewö jiget, “Tosatŋan ‘Gi Jon O-melun azia akzan,’ jimakzemö, tosatŋan ‘Gi Elaija akzan,’ jimakze aka tosatŋan toroqeba kewö jimakze, ‘Gi kezapqetok azi walŋi yeŋgöreŋök kunŋan kömupnöhök wahöta maljan.’ ”

20 *Jon 6.68-69Mewö jigetka kewö qesim eŋgiyök, “Aka nanŋinak nöŋgöra denöwö jize? Ni niŋia akzal?” Qesim eŋgiiga Pitönöŋ meleŋda jii mörök, “Gi Anutugöreŋ Amötqeqe Toŋi Kraist akzan.” Mewö.

21 Mewö jiiga könaŋi aukŋe jiget kunŋan mötpepuköra soŋgo köhöikŋi al eŋgiyök. Mewö. 22 Jisösnöŋ jiyök, “Suep gölmegö azi ölŋan mönö sihimbölö gwötpuk mötma. Kantrigö jitŋememe, jike nup galöm aka Köna keugö böhi yeŋön mönö andö qeba qegetka kömuma. Kömumba wehön karöbut aiga kömupnöhök wahötma.” Mewö.

23 *Mat 10.38; Luk 14.27Jisösnöŋ ambazip pakpak yeŋgöra keu kewö jii mötket, “Kunŋan nöŋgö andöne nuataŋgöba kamamgö mötzawi, yaŋön mönö nanŋi urusileŋaŋgö sihim kömbönaŋi bölöŋi andö qeiga sisitŋi megetka sihimbölö mi bisimakŋa. Mi maripomnöŋ kömumawaŋgö dop mökösöŋda ni nuataŋgöba kama.

24 *Mat 10.39; Luk 17.33; Jon 12.25“Kunŋan malmalŋi nanŋaŋgöra aŋgön köla nanŋi imbi-imbi maljawi, yaŋön mönö malmalŋi ölŋi jöhöi sohoma. Sohomapmö, kunŋan gölmegö malmalŋi nöŋgöra aka köleŋda tököm niŋgimawi, yaŋön mönö malmal ölŋaŋgö könaŋi miwikŋaiba köhöiba malma.

25 “Kunŋan gölmeŋi gölmeŋi mieŋgö öröyuaiŋi pakpak köl öröiga buŋaŋi an teköiga uruŋaŋgö malmalŋi mem sohoba silebile mala kömuiga Anutunöŋ keuŋi jim teköiga könöp sianöŋ geba uŋaŋan ayuhuiga qahö dop kölma. Sukinapŋi miaŋön mönö urusösöŋgai qahö ak waŋgima. Qahöpmahöp!

26 “Kunŋan nöŋgö qetni aka Buŋa keuni memba eta aljawi, i Suep gölmegö azi ölŋan mewöyök ehöröŋ kölma. Yaŋön könaŋgep Suep garata töröŋi yembuk ki etketka yeŋgö, nanŋaŋgö aka Iwiŋaŋgö asakmararaŋini eka aurume. Nalö miaŋgöreŋ azi me ambi mewöŋi mönö ehöröŋ köl waŋgima. 27 Nöŋön keu ölŋi kun kewö jibi mötme: Kiaŋgöreŋ kinjei, eŋgö sutŋineyök tosatŋan Anutugö bemtohoŋan asuhumawi, mi ek kutume. Jebuk mala kömupkö sihimbölöŋi qahö mötketka asuhum tiŋgiriga mi ekŋe.” Mewö.

28 *2 Pitö 1.17-18Keu mi jiiga wehön 8:kö dop teköiga Jisösnöŋ Pitö, Jon aka Jeims eŋguaŋgita kunduŋe öŋgöba Anutu köuluköyök. 29 Köuluköiga miaŋgöreŋ jemesoholŋaŋgö kaisoŋgolomŋan letota tandökŋi murutŋi ahök. Malukuŋan tuat lalamŋi aka kölköl-bilikbilikŋambuk asariyök. 30 Miaŋgöreŋök eketka azi yahötŋan asuhuba Jisösbuk keu keu jiget. Mi Moses aka Elaija. 31 Asakmararaŋ uruŋe asuhuba Jisösbuk keu kewö eraum mötket, “Anutunöŋ Jisös sihimbölö möta kömumapkö melaiiga eta zilaŋ Jerusalem sitinöŋ aniga areŋ miaŋön ölŋambuk ak teköma.”

32 Mewö eraum mötketmö, Pitönöŋ alayahötŋi yetpuk jeŋinan lömböriiga gaun ahöget. Ahögetmö, gaunöhök imbiŋini möta jeŋini uba Jisösgö asakmararaŋi aka azi yahöt yambuk kinohori, mi eŋgeket. 33 Eŋgeketka kinda Jisös mosötpitkö ahotka Pitönöŋ Jisösgöra jiyök, “Ketaŋamnini, neŋön kiaŋgöreŋ uru ölöwak mötzin. Miaŋgöra neŋön ölöp koum karöbut qebin: Göhö kun, Mosesgö kun aka Elaijagö kun.” Pitönöŋ mewö jiyökmö, nanŋi keuŋaŋgö könaŋi mi qahö möt kutuyök.

34 Mewö jiba kiniga unuŋunuŋ kunöŋ eta aumŋan esuhum eŋgiiga kousu uruŋe mala awöwöliba jönömŋini unduyök. 35 *Ais 42.1; Mat 3.17; 12.18; Mak 1.11; Luk 3.22Jönömŋini undui kingetka kousu uruŋeyök qet kun kewö eriga mötket, “Azi ki mi nani nahöna. I ambazip amöt qem eŋgimamgöra möwölöhöm waŋgial. Mönö yaŋgö keuŋi möta malme.”

36 Qet miaŋön eri möta gwarek yeŋön miaŋgöreŋök uba Jisösnöŋ nanŋök kini eket. Kunduŋe yuai ekeri, miaŋgö buzupŋi mi nalö miaŋgöreŋ kude jiba keu bök malgetka kunŋan kun qahö mörök. Mewö.

37 Ahöba wahötketka Jisösnöŋ gwarekurupŋi karöbut yembuk kunduŋeyök eta sörökŋe ambazip kambulelembe eŋgeget. 38 Eŋgegetka ambazip kambunöhök azi kunŋan qeta kewö jiyök, “Böhi, nöŋgö nahöni mukmoröya akzawaŋgöra mönö kaba i ekŋan. Miaŋgöra köuluköm gihizal. 39 Mötnöŋ, öme kunöŋ i memba mendawöli miaŋgöreŋök qet gigilahöi utuköm waŋgii wölöhariiga numbuŋeyök qölqölsöutsöut erakza. Öme miaŋön öröm ureim waŋgiba nalö gwötpuk qahö mosörakza. 40 Mewö aiga göhö gwarekurupki öme mi wuataŋgömegö ulet eŋgizalmö, yeŋön mi osize.”

41 Mewö jiiga Jisösnöŋ meleŋ waŋgiba jiyök, “Yei, gölmegö yaŋgiseŋ aka misimkaulup ambazip, nöŋön mönö nalö dawik embuk mala qatön eŋgubiga Anutu qahö möt narigetka sihimbölö mötmam? Nahöngi mönö waŋgita ki kanöŋ.”

42 Morö mi waŋgita kaiga nalö miaŋgöreŋ mewöyök ömenöŋ morö utuköba urepköm waŋgiiga wölöhariyök. Mewö ahökmö, Jisösnöŋ öme mi jim waŋgii mosöri morö mem ölöwaka iwiŋi waŋgiyök. 43 Anutugö kukösumŋi ketaŋan mewö asuhuiga körekŋan mi eka nemböŋini teköi welipköget. Mewö.

Jisösnöŋ yuai pakpak mi meyöhi, miaŋgöra ambazip körekŋan welipkögetka Jisösnöŋ nalö miaŋgöreŋ gwarekurupŋi keu kötŋi kewö jii mötket, 44 “Keu ki mönö kezap ala mötme: Anutunöŋ Suep gölmegö azi ölŋi mi gölme ambazip yeŋgö böröŋine al waŋgii gema.” 45 Keu kötŋi mi jii mötketmö, mi qahö möt kutuget. Anutunöŋ mi köl turui tölapŋe ahöiga mi qahö möt asariget aka könaŋi denöwö, mi qesibingö kölköldömdöm aket. Mewö.

46 *Luk 22.24Gwarek neŋgöreŋök ‘Daŋön öŋgöŋgöŋi akza?’ jiba keu mi mötmöriget. 47 Mi mötmörigetmö, Jisösnöŋ urumötmötŋini möt kutuba namande moröŋi kun memba qöhöröŋe ali kinök. 48 *Mat 10.40; Luk 10.16; Jon 13.20Kiniga kewö jii mötket, “Körek eŋgöreŋök kunŋan eretŋi kondökŋi akzawi, yaŋön mönö öŋgöŋgöŋi akza. Miaŋgöra kunŋan namande ki nöŋgö qetne miriŋe köl öröba köyan kölmawi, yaŋön mönö ni köl öröm niŋgima. Kunŋan ni köl öröm niŋgimawi, yaŋön melaim niŋgiyöhi, mönö i mewöyök köl öröm waŋgima.” Mewö.

49 Nalö miaŋgöreŋ Jonöŋ könahiba keu kewö jiyök, “Ketaŋamni, azi kunŋan göhö qetnöŋ öme közöl eŋgiiga ehin. Yaŋön nembuk qahö liliköba maljawaŋgöra nini i qetal waŋgiin.”

50 Mewö jiyökmö, Jisösnöŋ kewö jii mörök, “I kude qetal waŋgime. Kunŋan qahö qetal eŋgimakzawi, yaŋön mönö eŋgö areŋnöŋ malja. (Miaŋgöra iŋini mönö nöŋgö alaurupni tosatŋi mi qetala aŋgösirip mem eŋgibepuk.)” Mewö.

51 Jisösnöŋ Suepnöŋ öŋgömamgö ahök. Miaŋgö nalöŋi törizawaŋgöra Jisösnöŋ kinda “Jerusalem sitinöŋ anmam,” jiba jim köhöiba könahiba könanöŋ anök. 52 Anda kolek qeljiŋe aliga mutuk anget. Könanöŋ anda mala Samaria prowinsgö miri kunöŋ aŋgota “Jisösgöra mözöqözözöm akingöra kazin,” jiget. 53 Jiba angetka anökmö, “Ni Judia prowinsnöŋ Jerusalem jike göröken anmam” jiiga miaŋgöra miri aŋgön köla yaizökzök qahö jiget. 54 *2 Kiŋ 1.9-16Mewö aketka gwarekyahötŋi Jeims aka Jon yekŋön mi eka jiyohot, “O Kembu, Suepnöhök könöp eta eŋgohoi qahöwakeak, mewö köuluköbingö mötzan me qahö?”

55 Mewö jiyohotmö, Jisösnöŋ liliŋgöba tembula jim etkiyök. 56 Miaŋgöreŋök toroqeba miri kunöŋ anget. Mewö.

57 Könanöŋ angetka azi kunŋan kaba Jisösgöra jiyök, “Gi denike denike anmani, nöŋön mönö miaŋgöreŋ gi guataŋgöba kamam.”

58 Mi möta Jisösnöŋ kewö jii mörök, “Arökŋaŋgö kiam yeŋön köteŋine ahögetka könakemba nei yeŋön aipŋini memba malakzemö, Suep gölmegö azi ölŋan mönö denike anda nöröpŋi wani qömböŋnöŋ nariba luhut membawak.”

59 Jisösnöŋ azi kungöra jiyök, “Gi kaba ni nuataŋgöman.” Jiyökmö, kewö meleŋnök, “Kembu, mi ölöpmö, iwinan kömumamgö aiga mutuk jinöŋga anda galöm kölbi kömui löm kölbigun.”

60 Mewö jiyökmö, Jisösnöŋ meleŋda jiyök, “Mosötnöŋ! Köhömuŋi yeŋön qamötŋini köhömuŋi mi ölöp löm kölmemö, göŋön mönö anda Anutu bemtohoŋaŋgö könaŋi jim asarim eŋgiba malman.”

61 *1 Kiŋ 19.20Kunbuk azi kunŋan kaŋgota jiyök, “Kembu, nöŋön gi guataŋgömamgö sihimni mötzalmö, mötnöŋ, gi ölöp jinöŋga mutuk mire anda tinitosolomurupni yaizökzökŋini jibigun.”

62 Jiyökmö, Jisösnöŋ meleŋnök, “Kunöŋ gölme mesiŋmesiŋgö kinoŋ mi hos andöŋe jöhöba böröŋan kinoŋ supŋe memba kini aniga dumŋe liliŋgöba andöŋe uzawi, yaŋön mönö Anutugö bemtohoŋnöŋ aŋgota nupŋi memawaŋgö dop qahö akza.” Mewö.