17
Siŋgisöndokö kölgorom mönö qetal eŋgime.
Mat 18.6-7, 21-22; Mak 9.42
Jisösnöŋ gwarekurupŋi keu kewö jii mötket, “Bölöŋaŋgö supatitikŋan mönö awamŋanök asuhumakza. Kunöŋ supatitik aŋgön kölmamgö osimakzapmö, kun daŋön tosatŋi kölgorom ak eŋgiiga siŋgisöndok akŋei, yaŋgöra mönö wölziköba ‘Yei!’ jizal. Sihimbölö öŋgöŋgöŋan mönö yaŋgö qakŋe öŋgöma. Yaŋön ambazip moröŋi yeŋgöreŋök kun kölgorom ak waŋgiiga siŋgisöndok akŋawi, azi miaŋön mönö lömböt öŋgöŋgöŋi miwikŋaima. Anutunöŋ lömböt miaŋgö likepŋi denöwö waŋgiiga dopŋe akawak? Kemuŋ jamönjiŋ jölŋe jöhöba köwet röndumnöŋ gilget mulumgöi gebawak, miaŋön mönö awamŋi ahum waŋgii tandök akawak.
* Mat 18.15“Miaŋgöra mönö nanŋini galömŋini mem aŋguba malme. Alagi kunŋan siŋgisöndok akzawi, i mönö jim mindiŋ ak waŋgiman. Jim mindiŋ ak waŋginöŋga möt bölim aŋguba wösöŋi mötma ewö, gi mönö siŋgisöndokŋi mosöt waŋgiman. Wehön kungö uruŋe siŋgisöndok 7 ak bölim gihiba indimŋi 7 göhöreŋ liliŋgöba kewö jima, ‘Alani, ni siŋgisöndok akzalaŋgöra möt bölim aŋguzal.’ Mewö jima ewö, gi mönö siŋgisöndokŋi mosöt waŋgiman.” Mewö.
Mötnaripkö ölŋi mi kukösumŋambuk.
Mat 17.20; 21.21; Mak 11.23
Aposol yeŋön Kembugöra jiget, “Mötnaripnini mönö toroqeba mem köhöiman.” Mewö jigetka Kembunöŋ meleŋnök, “Mötnaripŋinaŋgö ölŋi mi nejoŋ kötŋaŋgö dop ahöbawak ewö, eŋön ölöp nömözup ip* Jisösnöŋ mulberi ip kun kondelök. Ip mi nömözup ewöya, kötŋi köuruk (köwörörök) kötŋi ewö neneŋa. kiaŋgöra kewö jim kutubeak, ‘Gi mönö jöla jalögabuk wahöta luhuba köwetnöŋ geba nangi kömöta kinman.’ Mewö jiba möt narigetka ip miaŋön mönö keuŋini tem kölma.” Mewö.
Welenqeqe ölöpŋi mi denöwö?
“Eŋgöreŋök kungö nup azinöŋ bulmakau memba nupnöŋ anda kinoŋ öröi gölme mesiŋma me lama galömŋina malma. Mala mire kaŋgori miaŋgöreŋ toŋan kewö jii mötma me qahöpto, ‘Gi mönö mire kota tata nenegi neman.’ Mewö qahö! Yaŋön mönö kewö jima: ‘Gi mönö o ariba möhamgöm aŋguba suŋgemgö neneŋamni ohoba ala niŋginöŋ nemam. Miaŋgö andöŋe nangi neneŋamgi ohom neman.’ Mewö jim kutum waŋgiiga nup aziŋan jiyöhaŋgö dop nupŋi mem teköi dop köliga galömŋan miaŋgöra möpöseim waŋgima me qahö? Qahö! 10 Eŋgö könaŋini mi mewöŋanök ahöza. Galömŋinan yuai pakpak jim kutum eŋgiyöhi, iŋini mi ak teköba miaŋgöreŋ kewö jime, ‘Nini nup ambazip töhöna maljin. Galömninan yuaigöra jiyöhi, mönö miyök memba kazinaŋgöra möpömöpösei jarubingö osizin.’ ” Mewö.
Jisösnöŋ azi 10 sileŋini mem solaniyök.
11 Jisösnöŋ Jerusalem sitinöŋ anmamgöra Galili aka Samaria prowins yahöt mietkö sutŋire köna ahöyöhi, miaŋgöreŋ anök. 12 Könanöŋ anda miri kunöŋ aŋgoriga azi 10 sileŋini uzikukuŋambuk yeŋön miwikŋaiba eka tikep endu kinget. 13 Kinda köhöikŋanök qeta jiget, “Ketaŋamnini Jisös, mönö neŋgöra ak kömum gihima!”
14  * Lew 14.1-32Qeta jigetka eŋgeka kewö jii mötket, “Iŋini mönö jike nup galöm yeŋgöreŋ anda sileŋini kondel eŋgime.” Mewö jiiga tem köla könanöŋ angetka sileŋinan miaŋgöreŋ solaniba ölöwahök. 15 Ölöwahökmö, 10 yeŋgöreŋök kunŋan sileŋi solanii eka liliŋgöba kaba Anutu köhöikŋanök qeta möpöseiyök. 16 Möpöseiba Jisösgö könaŋe geba sipköba simin köla ‘Saiwap!’ jiyök. Azi mi Samaria azia. Juda yeŋön Samaria prowinsgö ambazip yeŋgöra mötketka eretŋi ahakzapma.
17 Saiwap! jiiga Jisösnöŋ meleŋda jiyök, “Mi ölöp akzanmö, azi pakpak 10 eŋgö sileŋinan lök solanim teköyök me? Azi 9 mieŋön mönö denike malje? 18 Kian azi göŋön nangik liliŋgöba kaba Anutu möpöseizanmö, azi 9 yeŋön mönö anda nönöŋgan akze.” 19 Mewö jiba kewö jii mörök, “Mötnaripkan mönö mem ölöwak gihiza. Miaŋgöra ölöp wahöta anman.” Mewö.
Anutugö bemtohoŋi mi denöwö asuhuma?
Mat 24.23-28, 37-41
20 Farisi (Köna keugö kapaŋkölköl) yeŋön Jisös kewö qesim waŋgiba jiget, “Anutugö bemtohoŋ mi mönö wanat nalönöŋ asuhuma?” Jiget möta meleŋda kewö jiyök, “Anutugö bemtohoŋan mönö jeninan ekinaŋgö dop qahö asuhuma. 21 Mötket! Anutugö bemtohoŋi mi sutŋine uruŋine asuhuba ahöza. Miaŋgöra mi kiaŋgöreŋ me enduyaŋgöreŋ ahözawi, mewö jibingö osimakzin.”
22 Jisösnöŋ gwarekurupŋi kewö jii mötket, “Könaŋgep nalö kun kam kuŋgumawi, miaŋgöreŋ Suep gölmegö azi ölŋaŋgö nup meme wehönŋi mieŋgöreŋök kun ekingö ak eŋgimapmö, mi kunbuk ekingö osime. 23 Nalö miaŋgöreŋ kewö jiget mötme, ‘Mötket! Amötqeqe Toŋan mönö endu malja. Mötket! Mönö ki asuhuza.’ Mewö mewö jigetka i ekingöra miaŋgöreŋ ösumok kude luluhuba anme. 24 Mi kewögöra: Suep gölmegö azi ölŋan kunbuk kamawi, nalö mi wölbilikö dop kewö akŋa: Mi suep likepŋeyök zilaŋ biliksik ala asariba likepŋe dop köla anjawi, yaŋön mönö miaŋgö dop asuhuma. 25 Könaŋgep mewö asuhumapmö, mutuk ambazip nalö kewöŋe gölmenöŋ maljei, yeŋön azi mi yaköriba andö qem waŋgigetka sihimbölö ketaŋi mötma.
26  * Jen 6.5-8“Mönöwök Noagö nalöŋe ambazipnöŋ malmalŋini qemasolokep qakŋe mala ayuhugeri, miaŋgö dop mönö Suep gölmegö azi ölŋan kunbuk kamawaŋgö nalöŋe mewöyök asuhuma. 27  * Jen 7.6-24Noagö nalöŋe nene lömbuaŋ ala o köhöikŋi nemba ambi kenam bohonŋaŋgö alget anda kaiga aŋgömeget. Ahakmeme mewö aka memba qemasolokep malgetka Noanöŋ waŋge uruŋe öŋgöyöhi, silim miaŋgöreŋ teköyök. Teköiga o göulu ketaŋan kaba ambazip jinonŋi qahö löm köl eŋgii o nemulahöba kömuget.
28  * Jen 18.20–19.25“Lotkö nalöŋe mewöyök qemasolokep malgetka mewöŋanök asuhuyök. Ambazipnöŋ nene lömbuaŋ ala o jawat nemba nup köl kömöta jike miriŋini memba qeköm nembi ala yuai bohonŋi memegöra algetka yuai tosatŋi bohonŋi memba malget. 29 Mewö aka memba malgetmö, Lotnöŋ Sodom miri mosöta aniga wehön miaŋgöreŋök könöp aka köt sömsöm könöpŋambuk mi mönö kie ewö suepnöhök eta ambazip jinonŋi qahö eŋgohoi kömuget. 30 Könaŋgep Suep gölmegö azi ölŋan kunbuk asuhumawi, nalö miaŋgöreŋ ambazipnöŋ mewöŋanök qemasolokep aka mala ayuhume.
31 “Silim miaŋgöreŋ sombemnöŋ malmawaŋön mönö inap yuaiŋi memamgöra miri uruŋe kude öŋgöma me nupnöŋ anda malmawaŋön mönö mewöŋanök miriŋe kude liliŋgöba kama. 32 Lot anömŋan meleŋda andöŋe uba kömumba köt ahöhi, mönö mi mötmörime. 33  * Mat 10.39; 16.25; Mak 8.25; Luk 9.24; Jon 12.25Kunŋan malmalŋi siyoŋsayoŋi qahö nanŋaŋgöra aŋgön köla nanŋi imbi-imbi malmamgö mötzawi, yaŋgö malmalŋan mönö sohomapmö, kunŋan malmalŋi nöŋgöra aka köleŋniga sohomawi, yaŋön mönö malmal ölŋaŋgö könaŋi miwikŋaiba oyaeŋkoyaeŋ malma.
34 “Nöŋön kewö jibi mötket: Suŋgem miaŋgöreŋ azi yahöt dumnöŋ mohotŋe ahöyohotka yetköreŋök kun waŋgita kun mosötme. 35 Mewöyök ambi yahöt mi mohotŋe taweŋ urasiba (bunahöba) tatmahori, yetköreŋök kun waŋgita kun mosötme.” 36 (Azi yahöt nupnöŋ malohotka yetköreŋök kun waŋgita kun mosötme.)
37 Jisösnöŋ mewö jiiga gwarekurupŋan meleŋda jiget, “O Kembu, mi denikeaŋgöreŋ asuhuma?” Mewö jigetka kewö jii mötket, “Sömbup gisakŋan kungen göröken ahömawi, manu köraraknöŋ mönö miaŋgöreŋ öröba tokomakzei, mönö miaŋgö dop asuhuma.” Mewö.

*17:3: Mat 18.15

*17:6: Jisösnöŋ mulberi ip kun kondelök. Ip mi nömözup ewöya, kötŋi köuruk (köwörörök) kötŋi ewö neneŋa.

*17:14: Lew 14.1-32

*17:26: Jen 6.5-8

*17:27: Jen 7.6-24

*17:28: Jen 18.2019.25

*17:33: Mat 10.39; 16.25; Mak 8.25; Luk 9.24; Jon 12.25