18
Saranöŋ azi morö memawaŋgö keuŋi Anutunöŋ jiyök.
Abrahamnöŋ Mamre mire in ip ketaŋi ketaŋi mieŋgö sutŋine maliga Kembunöŋ asuhum waŋgiyök. Silim miaŋgöreŋ wehön jitŋi sihitŋi köhöikŋi qeiga Abrahamnöŋ opo seri koumŋaŋgö numbuŋe tarök. * Hib 13.2Tata uba wahöta ehiga azi karöbutŋan wösöŋe kinget. Kingetka eŋgeka opo seri koum numbuŋeyök wölaŋ wahöta jömjölöŋini jiba eŋguaŋgitmamgöra kiŋkiŋgöba anök. Anda waikŋini memba simin köla gölmenöŋ bamgöba geyök.
Geba kewö jiyök: “O Kembu-urupni, nöŋön eŋgö welenqeqeŋini aka eŋgö jeŋine kalem möriam miwikŋaiba maljal ewö, iŋini mönö ni kude noŋgita anme. Ni eŋgö welenqeqeŋini aka ölöp o moröŋi kun memba kaba eŋgibiga könaŋini saŋgoŋda ip kiaŋgö aumŋe tata luhut meme. Nöŋön ölöp nene moröŋi kun memba kaba eŋgibiga neme. Miaŋön mem köhöim eŋgiiga ölöp köna kunbuk toroqeba anme. Nöŋön kewöröpni malbiga iŋini ni göda qem niŋgiba kazeaŋgöra ölöp welen qem eŋgimam. “Mewö jiiga meleŋda kewö jiget: “Saiwap, jizanaŋgö dop mewö ölöp akin.”
Mewö jigetka Abrahamnöŋ ösumŋan kiŋkiŋgöba seri koum uruŋe anda öŋgöba Saragöra kewö jiyök: “Mönö ösumok plaua ölöp kötökŋi amae (dis) karöbutkö dop memba meleŋda yeŋgöra bered ohoman.” Mewö jiba ösumŋan bulmakau kambunöŋ anda bulmakau dömŋi busuŋi löwötŋi möwölöhöba welenqeqeŋi kun waŋgiiga könahiba ösumok qeba möhamgöba ohoyök. Mi möhamgöba ohom teköiga mi, kelök kosökŋi aka juju o tosatŋi memba anda azi tatkeraŋgö bapŋine alök. Bapŋine aliga nemba tatketka nanŋi nalö miaŋgöreŋ kösutŋine ip könaŋe galömŋina kinök.
Kiniga kewö qesim waŋgiget: “Anömgi Sara mi denike?” Qesim waŋgigetka jiyök: “I opo seri koum uruŋe endu tatza.”
10 Mewö jiiga azi yeŋgöreŋök kunŋan kewö jiyök: “Yambu mohotkö dop teköiga nöŋön ölŋa liliŋgöba ki kabiga anömgi Saranöŋ mönö morö nahönŋambuk aka malma. “Mewö jiyökmö, Saranöŋ opo seri koumgö numbuŋe apŋaŋgö andöŋe kinda keu mi kezapŋe geiga mörök.* Rom 9.9 11 Abraham aka Sara yetkön lök ambazip namŋi ahotka yambuŋiran gwötpuk ketaŋi aiga malohot. Saranöŋ köiŋgö aŋgeka malöhi, miaŋgö nalöŋan lök oŋgit teköyök. 12 Miaŋgöra Saranöŋ mi möta uruŋan kewö mötmöriba gön kölök: “Nöŋön lök ambi namŋi sohosoholiŋi akiga apni azi kembunan mewöŋanök azi namŋi aiga yambuk ahöahögö sihimnan kunbuk asuhubawak me qahöpto?”* 1 Pitö 3.6
13 Mewö mötmöriiga Kembunöŋ Abraham qesim waŋgiba kewö jiyök: “Saranöŋ wanigöra gön köla kewö mötmöriza: ‘Nöŋön ambi namŋi kötökŋi aka ölŋa morö membileŋak me?’ 14 Kembunöŋ mönö yuai kungöra qahö kötökŋi qakömakza. Miaŋgöra jizali, ‘Yambu mohotkö dop teköiga nöŋön ölŋa liliŋgöba ki kabiga Saranöŋ mönö morö nahönŋambuk aka malma.’ ”* Luk 1.37
15 Saranöŋ keŋgötŋi möta mi köyatiba kewö jiyök: “Ni gön qahö köljal. “Mewö jiyökmö, Kembunöŋ kewö jiyök: “Qahö, gi gön ölŋa köljan. “Mewö.
Abrahamnöŋ Sodom taongöra köuluköyök.
16 Mewö jiiga azi karöbut yeŋön wahöta etkömosöta Sodom taonöŋ göröken eleŋda anbingö aket. Abrahamnöŋ mewöŋanök i eŋgubulmamgöra yembuk mohotŋe anget. 17 Kembunöŋ nanŋaŋgöra kewö jiyök: “Ni yuai akŋamgö mötzali, mi alani Abrahamgöra ölöp qahö asambötmam. 18 Kewögöra mi asambötmamgö osizal: Abrahamnöŋ nöŋgö alani qainŋi kun aka ahumsehip aiga könagesö ketaŋi kukösumŋinambuk aka malme. Nöŋgö kötumötuetnan mönö yaŋgöra aka gölmegö könagesö kambuŋi pakpak yeŋgö qakŋine öŋgöiga oyaeŋkoyaeŋ akŋe. 19 Nöŋön i kewögöra möwölöhöm waŋgial: Yaŋön nahönböraturupŋi aka gwölönarökurupŋi yaŋgö andöŋe asuhuba mal öŋgömei, yeŋgöra Kembugöreŋ köna kondela ahakmeme diŋdiŋi dop kölakzawi, mi wuataŋgömegöra jim kutum eŋgiba malma. Mewö maliga tem köla wuataŋgöba malme ewö, Kembu nöŋön Abrahamgöra yuai asuhumapkö jim jöhöyali, miaŋön mönö ölŋambuk pakpak ahakŋa.”
20 Kembunöŋ nanŋök mewö jiba toroqeba Abrahamgöra kewö jiyök: “Sodom aka Gomora yeŋön siŋgisöndok lömbötŋi lömbötŋi aka malgetka kahasililiŋ öŋgöŋgöŋi ketaŋi asuhuiga gwötpukŋan miaŋgöra qeta sahörakze. Miaŋgöra yeŋgö siŋgisöndokŋinaŋgö keuŋan mönö qariba qariba keta bölökŋi akza. 21 Miaŋgöra nöŋön mönö yeŋgöreŋ geba könaŋamŋini ekŋam. Kahasililiŋ akeraŋgöra aka gwötpukŋan nöŋgö jene qeta sahöta malgeri, mi pakpak ölŋa aket me qahö, mi nöŋön kewöta mötmamgö mötzal.”
22 Mewö jiiga azi yahötŋan eleŋda Sodom göröken anohotmö, Abrahamnöŋ toroqeba Kembugö jemesoholŋe kinök. 23 Kinda Kembugö kösutŋe anda kewö qesim waŋgiyök: “Gi ambazip solanŋi aka ambazip aŋgöjörakŋinambuk mi mohotŋe ayuhum eŋgimamgöra jizan me? 24 Taon miaŋgöreŋ ambazip solanŋi 50 malje ewö, göŋön i ölŋa ayuhum eŋgimamgö jizan me? Taon mi yeŋgöra aka eŋgehoribanak me qahö? 25 Göŋön mewö akŋangö osibanak. Mi yapmakek! (qahöpmahöp!) Göŋön ambazip solanŋi mi ambazip aŋgöjörakŋinambuk yembuk mohotŋe mindiriba eŋgunöŋga qahö dop kölbapuk. Mewö öröröŋ kömumbepuk. Göŋön gölme ambazip pakpak yeŋgö keuŋini jim tekömakzani, miaŋgöra mönö nanŋi könagi diŋdiŋi wuataŋgönöŋga dop kölma.”
26 Abrahamnöŋ mewö jiiga Kembunöŋ meleŋda kewö jiyök: “Nöŋön Sodom taonöŋ ambazip solanŋi 50 miwikŋaim eŋgimam ewö, yeŋgöra aka taon pakpak mi ölöp eŋgehorimam.”
27 Mewö jiiga Abrahamnöŋ kunbuk kewö jiyök: “Kembu, ni nesak sömsöm omaŋi ewö akzalmö, töndup keu köhöikŋi Kembunaŋgöra kuŋguba jizal. Mi kude dop köljapmö, mi töndup ölöp ni möt niŋgiman. 28 Taon miaŋgöreŋ ambazip solanŋi 50 qahöpmö, 45 miyök malbeak ewö, göŋön ambazip 5 yeŋgöra aka taon pakpak mi töndup ayuhum eŋgiman me qahö?” Mewö jiiga Kembunöŋ kewö jiyök: “Nöŋön ambazip solanŋi 45 miaŋgöreŋ miwikŋaim eŋgimam ewö, taon mi mönö qahö ayuhumam.”
29 Abrahamnöŋ dumŋe kunbuk keu kewö jiyök: “Ambazip solanŋi 40 miyök miaŋgöreŋ miwikŋaim eŋgiman ewö, mönö denöwö akanak?” Mewö jiiga kewö meleŋnök: “Ambazip 40 yeŋgöra aka taon mi qahö ayuhumam.”
30 Mewö jiiga jiyök: “O Kembu, urugi öngöbapukmö, ni kunbuk keu jimamgö mötzal. Ambazip solanŋi 30 miyök miaŋgöreŋ miwikŋaim eŋgiman ewö, mönö denöwö akanak?” Mewö jiiga kewö meleŋnök: “Ambazip solanŋi 30 miaŋgöreŋ miwikŋaim eŋgimam ewö, nöŋön mönö taon mi qahö ayuhumam.”
31 Abrahamnöŋ toroqeba kewö jiyök: “Kembu, ni keu köhöikŋi Kembunaŋgöra kuŋguba jizal. Mi kude dop köljapmö, mi töndup ölöp möt niŋgiman. Ambazip solanŋi 20 miyök miaŋgöreŋ miwikŋaim eŋgiman ewö, mönö denöwö akanak?” Mewö jiiga kewö meleŋnök, “Ambazip 20 yeŋgöra aka taon mi qahö ayuhumam.”
32 Mewö jiiga Abrahamnöŋ kunbuk kewö qesiyök: “O Kembu urugi öngöbapukmö, ni kunbuk sömaŋi mohot-töp ki keu jimamgö mötzal. Ambazip solanŋi 10 miyök miaŋgöreŋ miwikŋaim eŋgiman ewö, mönö denöwö akanak?” Mewö jiiga kewö meleŋnök, “Ambazip 10 yeŋgöra aka taon mi qahö ayuhumam.” 33 Mewö eraum-mörohot teköiga Kembunöŋ Abraham mosöta aniga yaŋön kunbuk liliŋgöba miriŋe kayök. Mewö.

*18:2: Hib 13.2

*18:10: Rom 9.9

*18:12: 1 Pitö 3.6

*18:14: Luk 1.37