17
Jöhöjöhö areŋgö aiwesökŋi mi sile yandiyandi.
1 Abramnöŋ yambuŋi 99 aiga Kembunöŋ asuhum waŋgiba keu kewö jiyök: “Nöŋön Anutu kukösum pakpakö Toŋi akzal. Miaŋgöra gi mönö nöŋgö keuni tem köla pöndaŋ ahakmeme diŋdiŋi wuataŋgöba malman. 2 Nöŋön jöhöjöhö areŋ mi gi aka ni netkö sutnire ahali, mi mem köhöiba ahumsehip gihibi gwölönarökurupki yeŋgö jaŋgöŋinan mönö keta bölökŋi akŋa.”
3 Mewö jiiga Abramnöŋ simin köla bamgöiga Anutunöŋ yaŋgöra keu kewö jiyök: 4 “Mötman, nöŋön jöhöjöhö areŋni göbuk kewö akzal: Göŋön könagesö gwötpuk yeŋgö iwi bömönŋina akŋan. Keu mewö jim jöhöbi ahöma. 5 *Rom 4.17Göhö qetki Abram mi qahö toroqeba qetketka ahömapmö, göŋön könagesö gwötpuk yeŋgö iwi bömönŋina akŋangöra kuŋgum gihizali, miaŋgöra qetki mönö Abraham qetketka ahöma. *Abram mi iwi öŋgöŋgöŋi. Abraham mi könagesö gwötpuk yeŋgö iwi bömönŋini. 6 Nöŋön ahumsehip gihibiga gwölönarökurupki mi önöŋi qahö asuhume. Yeŋön jula deŋda könagesö kambuŋi kambuŋi gwötpuk akŋe. Göhö gwölönarökurupki yeŋgöreŋök tosatŋan kiŋ kembuŋi kembuŋi akŋe.
7 Nöŋön mönö jöhöjöhö areŋni mi nani aka gi, göhö gwölönarökurupki göhö andöge toroqeba asuhum öŋgömei, neŋgö sutnine al köhöibiga teköteköŋi qahö ahöm öŋgöba ahöma. Nöŋön göhö Anutugi aka gwölönarökurupki göhö andöge asuhum öŋgömei, mönö yeŋgö Anutuŋina aka malmam.*Luk 1.55 8 Gi Keinan gölmenöŋ kiana maljani, nöŋön gölme mi jömukŋanök gi aka göhö gwölönarökurupki eŋgö buŋaya qem eŋgibiga buŋaŋini teteköŋi qahö ahöm öŋgöba ahöma. Mewö ahöiga nöŋön mönö yeŋgö Anutuŋina aka malmam.”*Apo 7.5
9 Anutunöŋ Abrahamgöra mewö jiba toroqeba keu kewö jiyök: “Mewö malmam-mö, göŋön mönö nöŋgö jöhöjöhö areŋnaŋgö keuŋi mi tem köla wuataŋgöba malman. Göhö gwölönarökurupki göhö andöge toroqeba asuhum öŋgömei, yeŋön mönö mewöŋanök mi tem köla wuataŋgöba mala mal öŋgöme. 10 Gi aka göhö gwölönarökurupki embuk jöhöjöhö areŋni aka mi wuataŋgömegöra jizali, miaŋgö aiwesökŋi mi kewö: Eŋgö sutŋine azi pakpak yeŋgö sileŋine mönö nöŋgö aiwesökni yandime.*Apo 7.8; Rom 4.11 11 Nöŋgö aiwesökni mönö sileŋine yandime. Miaŋön jöhöjöhö areŋ ni aka eŋgö sutnine albi ahözawi, miaŋgö aiwesökŋa ahöm öŋgöma.
12 Nalö kewöŋeyök könahiba azi pakpak eŋgö sutŋine toroqeba asuhum öŋgömei, yeŋgö sileŋine mönö sömaŋini 8 aiga miaŋgöreŋ nöŋgö aiwesökni yandiba malme. Nanŋine miri uruŋe nanŋini aka welenqeqeurupŋini yeŋgöreŋ morönahönurupŋini asuhumei, mi mönö öröröŋ ak eŋgiba malme. Welenqeqe tosatŋi mi kian yeŋgöreŋök moneŋnöŋ bohonŋini megetka yeŋgö morö nahönŋini asuhume. Yeŋön nanŋini gwölönarökurupŋini qahö akzemö, mi töndup nöŋgö aiwesökni mi mönö yeŋgö sileŋine mewöŋanök yandiba malme. 13 Welenqeqe tosatŋan nanŋine miri uruŋe asuhugetka welenqeqe tosatŋi mi moneŋnöŋ bohonŋini megetka yeŋgö morö nahönŋini asuhume. Nöŋgö aiwesökni mi mönö yeŋgö sileŋine mewöŋanök yandiba malme. Nöŋgö jöhöjöhö areŋnaŋgö aiwesökŋi sileŋine yandimei, mi mönö jöhöjöhö areŋ teteköŋi qahö ahöm öŋgömapköra jim köhöizal. 14 Azi kun daŋön nöŋgö aiwesökni sileŋe qahö yandigetka öne malmawi, yaŋön mönö nöŋgö jöhöjöhö areŋni oŋgita qetalakza. Miaŋgöra azi mewöŋi mi mönö nanŋi ambazip kambu eŋgö sutŋineyök yakörim waŋgigetka yaigep eta malma.”
15 Anutunöŋ toroqeba Abrahamgöra kewö jiyök: “Gi anömgahö qetŋi Sarai mi kude toroqeba qeta malmanmö, yaŋgö qetŋi mönö Sara (jembon ambi) qeta malman. †Qetŋi kewögöra uteköyök: Yaŋön ambazip kambuŋi kambuŋi gwötpuk aka kiŋ kembu tosatŋi yeŋgö nam bömönŋina akŋa. 16 Nöŋön Sara kötuetköm waŋgibiga yaŋön göhöra morö nahön kun mema. Nöŋön kötuetköm waŋgibiga yaŋön ambazip kambuŋi kambuŋi gwötpuk yeŋgö nam bömönŋina akŋa. Yaŋgö gwölönarökurupŋi yeŋgöreŋök tosatŋan könagesö kambu yeŋgöreŋ azi kembuŋi kembuŋi akŋe.”
17 Kembunöŋ mewö jiiga Abrahamnöŋ mi möta simin köla bamgöba uruŋan kewö mötmöriba miaŋgöra gön kölök, “Azi yambuni 100 akiga morö nahönan mönö denöwö asuhubawak? Mewöyök Saranöŋ yambuŋi 90 aiga mönö denöwö morö membawak?” 18 Abrahamnöŋ mewö mötmöriba welipköba Anutu kewö qesim waŋgiyök: “Göŋön ölöp Ismael kuŋgum waŋginöŋga qetki bisiiga nöŋgö gwölönarökurupni mi yaŋgöreŋök asuhume.”
19 Mewö qesiiga Anutunöŋ kewö meleŋnök, “Anömgi Saranöŋ mönö göhö morö nahöngi mema. Mi meiga qetŋi Aisak (gön kölja) qetman. Nöŋön Aisakpuk aka yaŋgö gwölönarökurupŋi yembuk jöhöjöhö areŋni mi al köhöibiga teteköŋi qahö ahöm öŋgöma. 20 Ismael kötuetköm waŋgimamgö qesim niŋgizani, mi mewöyök ölöp möt gihiba kötuetköm waŋgimam. Yaŋön azi kembu 12 mieŋgö iwi bömönŋini akŋa. Nöŋön ahumsehip waŋgibiga gwölönarökurupŋi yeŋgö jaŋgöŋinan mönö keta bölökŋi akŋa. Yeŋön sehiba könagesö kambu ketaŋi akŋe.
21 Mewö akŋemö, Saranöŋ nahöngi Aisak mi yambu euneaŋgö nalö kewöŋe memawi, nöŋön mönö nani jöhöjöhö areŋni mi yambuk al köhöimam.” 22 Anutunöŋ Abrahambuk keu jiyohori, mi teköiga i mosöta wahöta öŋgöyök.
23 Wehön miaŋgöreŋök Abrahamnöŋ Anutugöreŋ keu tem köla nanŋi nahönŋi Ismaelgö sileŋe Anutugö aiwesökŋi yandiyök. Mewöyöhök welenqeqeurupŋi nanŋi miri uruŋe asuhugetka tosatŋi moneŋnöŋ bohonŋini meiga malgeri, azi pakpak mi yaŋgö miri uruŋe tatkeri, i mönö körek mewöŋanök ak eŋgiyök. 24 Abrahamnöŋ yambuŋi 99 aiga sileŋe aiwesök mi yandiget. 25 Nahönŋi Ismael mi yambuŋi 13 aiga sileŋe mi yandiget. 26 Abraham aka nahönŋi Ismael yetkö sileŋire aiwesök mi sömaŋ mohot miaŋgöreŋök yandiget. 27 Azi pakpak Abrahamgö miri uruŋe tatkeri, tosatŋan nanŋi miri uruŋe asuhugetka tosatŋi mi kian yeŋgöreŋök bohonŋini meiga malgeri, körek yeŋgö sileŋine aiwesök mi mewöŋanök yandiget. Mewö.