1 *Ef 5.22; Kol 3.18Anutu welen qebingö keuŋi lök jizalmö, ambi iŋini mönö mewöŋanök apurupŋini yeŋgö keu bapŋe anda malme. Mewö malgetka apurup tosatŋan Buŋa keu qahö tem köla maljei, yeŋön mönö mewöŋanök anömurupŋini yeŋgö ahakmemeŋini eka uruŋini meleŋbeak. Uruŋini meleŋda malmalŋini Kraistkö böröŋe almegöra Buŋa keu jitŋinanök qahö jimemö, Kraistkö könaŋi mönö silikŋinan kondel eŋgigetka ek asaribeak. 2 Ahakmeme sarakŋi diŋdiŋi aka memba Anutugö jitŋi oŋgitpepuköra keŋgötŋini mötketka azinöŋ mewö eŋgek yakögetka Kraistpuk qekötahöba malbingö sihimŋini ahubawak. 3 *1 Tim 2.9Silegö aködamunŋinanök mönö kude mem öŋgömakŋe. Nöröp sawaŋini qeba gawasu könaŋi könaŋi kude ala minjiŋda öŋböŋ kude memba malme. Kösasorom goul yuainöŋ sileŋini kude meŋölöm aŋgume. Sileötaŋ qetpuk sorok aködamunŋambuk mi kude mem aŋgume.

4 Mewö qahöpmö, aködamunŋini ölŋi mi mönö töp megetka uruŋine ahöma. Uŋaŋinan luainöŋ bönjöŋ malgetka aködamunŋini ölŋi miaŋön tölapŋe ahöba mönö nalö kunöŋ qahö ayapköma. Urubönjöŋ malgetka Anutunöŋ eŋgeka möri öŋgömakŋa. 5 Mönöwök ambi sarakŋi yeŋön Anutubuk kinda jörömqöröm ak waŋgiba yuai pakpaköra mamböta malgeri, yeŋön mewöyök uruŋinaŋgö aködamunŋinan meŋölöm aŋguba apurupŋini yeŋgö keu bapŋe anda malget. Mönö ambi mieŋgö dop aka malme. 6 *Jen 18.12Saranöŋ apŋi Abraham tem köl waŋgiba “Azi kembuni!” jiba ohola malök. Iŋini mewöyök zeŋ kinda nup ölöpŋi ölöpŋi memba awösamkakak kinda yuai kungöra jönömŋini qahö undui apurupŋinambuk malme ewö, mönö Saragö dop ambi aköda-munŋinambuk aka malme.

7 *Ef 5.25; Kol 3.19Ambi yeŋön ösumŋini eretŋi akzemö, töndup malmalgö kalem möriamŋi mi azibuk öröröŋ buŋa qem aŋguba malje. Ösumŋini eretŋi akzeaŋgöra azi mohot mohot iŋini mönö anömurupŋini törörök köyan köla lolongöm eŋgiba malme. Anutunöŋ azi eŋgö köulukŋini qepureibapuköra mönö göda qem eŋgiba malme. Mewö.

8 Keuni tekömawaŋgö qambaŋi kewö jizal: Iŋini mönö körek urumohot aka urumeleŋ alaurupŋini urubönjöŋnöŋ jöpaköm aŋguba malme. Guŋbönjönjöŋ mala nanŋini memba et al aŋguba uruŋinan jöhöm aŋguba mohotŋe kinme. 9 Jinöŋ jibi nuŋgunöŋ guhubi aknöŋ aki mi kude ahakŋe. Uruqeqe keu töhöreŋ jim eŋgigetka kitipŋi kude meköme. Mewö qahöpmö, keu bölöŋaŋgö likepŋi meleŋda mönö kötuetköba uruölöwak eŋgiba malme. Mewö aka malgetka Anutunöŋ likepŋi meleŋniga kötumötuetŋi buŋa qem aŋgumegöra eŋgoholök. Mewö aka mala Kembu asuhumawi, nalö miaŋgöreŋ mönö oyaeŋkoyaeŋ akŋe. 10 *Sum 34.12-16Mewö akŋegö keuŋi mi Buŋa Kimbinöŋ kewö ohoget ahöza: “Kunöŋ malmal nahömŋambuk malmamgö ak waŋgiiga wehön ölöpŋi ölöpŋi eka malmamgö mötzawi, yaŋön mönö nesilamŋi keu bölöŋi jibapuköra jöhöba malma. Numbu suŋeyök geŋmoŋ keu asuhubapuköra mönö galöm mem aŋguba malma.

13 Iŋini nup ölöpŋi membingö urukönöp aka malme ewö, ambazip sehisehiŋan mönö nupŋini geŋmororoŋ memba mem bölim eŋgibingö qahö mötme. 14 *Mat 5.10; Ais 8.12-13Mi qahö mötmemö, töndup ahakmeme solanŋi akeraŋgöra aka sihimbölö mötpeak ewö, iŋini mönö töndup Anutunöŋ kötuetköm eŋgiiga oyaeŋkoyaeŋ akŋe. Kahasililiŋ mem eŋgibepuköra mönö öne töwöratiba keŋgötŋini möta uruŋini eri möt bölöbölöŋinan eŋgubapuk. 15 Uruŋinan kude etmapmö, uruŋini mönö Kembu Kraistköreŋ jöhöba könaŋi sarakŋi pöndaŋ mötmörigetka öŋgöi malme. Nalö dop jöjöröba Kraistkö könaŋi ambazip jim asarim eŋgiba malme. Oyaeŋkoyaeŋ akingö jörömqöröm akzei, ambazipnöŋ miaŋgö könaŋaŋgöra qesim eŋgigetka mönö körek yeŋgöra keu meleŋ eŋgiba malme. Mönö guŋbönjönjöŋ qakŋe ambazip göda qem eŋgiba uru kuŋgum eŋgiba malme.

16 Keuŋini mewö galöm kölgetka Anutunöŋ eŋgeka “Dop kölja,” jiiga urukezapŋinan mewö mötmegöra kinme. Kraistpuk qekötahöba kinda ahakmeme ölöpŋi aketka uruqeqe keu töhöreŋ laŋ jim eŋgimakzei, yeŋön mönö nanŋini keu bölöŋaŋgöra aka gamu miwikŋaime. 17 Nup ölöpŋi ölöpŋi memba malgetka ambazip tosatŋan töndup kahasililiŋ ak eŋgigetka Anutugöra sihimbölö mötketka dop kölja. Yuai bölöŋi aka memba miaŋön sihimbölö miwikŋaigetka gamuŋambuk akza. 18 Kraistnöŋ mewöyök nalö kunöŋ siŋgisöndoköra aka kömuyök. Nini goŋgoŋi ahinga Diŋdiŋi yaŋön neŋguaŋgiriga Anutugöreŋ aŋgotpingöra aka sihimbölö mörök. Gölme azia aiga sileŋi mem kömugetmö, Uŋa Töröŋan mem gulim waŋgiiga wahöta malja. 19 Uŋa Töröŋan waŋgiriga neŋgömosöta kömupkö senjom mire geba uŋa kösö gwarönöŋ malgeri, mönö yeŋgöra Buŋa keuŋi jim asarim eŋgiyök.

20 *Jen 6.1–7.24Mönöwök Noagö nalönöŋ waŋge ketaŋi megetka Anutunöŋ uruŋini meleŋmegöra kapaŋ köla mökösöŋda mambörökmö, ambazipnöŋ keu qahö tem köla ayuhuba kömupkö kösö gwarönöŋ geget. Ambazip saiwa morörökŋi 8 mewöŋan Anutugö jitŋi tem kölgetka o aliga gölme turuba waŋge siriiga göulunöhök gouŋini köla bohonŋini jöhöyök. 21 Yuai mewö asuhuyöhi, mi o melungö söpsöpŋi akza. Jisös Kraistnöŋ kömupnöhök wahöta maljawaŋgöra aka nalö kewöŋe o neŋgömirigetka Kraistkö ösumŋan neŋgualöŋda bohonini jöhömakza. O mi silegö töwötŋi saŋgoŋmapköra aka qahö al neŋgizemö, o melungö ölŋi mi kewö: Nini Anutubuk malbingö jöhöjöhö aka jöjöpaŋ keunöŋ jöhöba kewö köulukö-makzin, “Anutu, gi mönö qewöloŋi saŋgoŋnöŋga uruŋan sarakŋi aiga göhö jege dop kölma.”

22 Jisös Kraistnöŋ Suep mire eu öŋgöba Anutugö böröŋi ölŋe buŋabuŋaŋambuk tatza. Anutunöŋ kukösum waŋgiiga tata Suep garata aka Suepkö bem suahö könaŋi könaŋi ösum-mumuŋinan neŋgek galöm aka kuŋgum neŋgimakzei, mi tok galöm köl eŋgiiga keuŋi bapŋe malje. Mewö.