1 *Sum 110.1Kraistnöŋ euyaŋgöreŋ öŋgöba Anutugö böröŋi ölŋaŋgö jakömbuak jakeŋi memba qetbuŋaŋambuk tatza. Anutunöŋ Kraist mem gulim waŋgiyöhi, miaŋgö tandök iŋini mewöyök mem gulim eŋgiiga köhömuŋeyök wahöta malje. Miaŋgöra iŋini Suep mire eu öröyuai ahözawi, uruŋini mönö miaŋgöreŋ jöhöba malme.

2 Gölmegö öröyuaigöreŋ qahöpmö, euyaŋgöreŋ öröyuai ahözawi, uruŋini mönö miaŋgöreŋ jöhöm köhöiba malme. 3 Eŋgö uruŋini walŋan mönö kömuiga Anutugöreŋ tönguba malje. Mewö Anutugö aumŋe anda malmal köhöikŋaŋgö könaŋi miwikŋaiget. Kraistnöŋ Suep malmal tölapŋe maljawi, eŋgö urumalmalŋinan mönö miaŋgö dop asa-asambötŋe ahöza. Miaŋgöra uruŋini mönö Kraistpuk jöhöba malme. 4 Kraist malmal köhöikŋaŋgö Toninan kunbuk kaiga asakmararaŋan asuhumawi, nalö miaŋgöreŋ iŋini mönö mewöyök asuhugetka eŋguaŋgiriga yambuk Anutugö asakmararaŋe aŋgotme.

5 Gölmegö sihim kömbönaŋini bölöŋi könaŋi könaŋi mi uruŋine kinda yayaseŋseŋ mem eŋgimakzei, mieŋgö nöröpŋini mönö körek tözamgöm teköme. Bau kiam tandök serowilin aka qewöloŋ aŋgöjörakŋambuk mi mönö andö qeme. Urusilegö sihim kömbönaŋi bölöŋi mi mosöta urukönöp bölöŋi mi mönö qömbökögetka bököma. Yuai membagun membingö nepaqepalok köpösöŋgömakzei, miaŋön tandö lopioŋ waikŋini memba möpöseim eŋgizeaŋgö tandökŋi akza. 6 Mi akeraŋgöra aka Anutugö irimŋan seholiiga urukazikŋi qakŋine ali öŋgömakza.

7 Sihim kömbönaŋini bölöŋi mewöŋan mönö mutuk nanŋini malmalŋini mewöyök galöm köliga köna bölöŋi mi tiba wuataŋgöba maljema.

8 Mewö malgetmö, nalö kewöŋe iŋini mewöyök yuai kewöŋi pakpak mi mönö gilget anma: Urusiŋgok möta urukönöpnöŋ jula eŋgohoiga uruŋinan auba urubölö mötzemö, mi uzeta gilget anma. Mewöyök uruqeqe keu töhöreŋ aka keu aŋgöjörakŋambuk jiba uruŋini tölöhozei, mi mönö körek andö qeba mosötme. 9 *Ef 4.22Iŋini uru walŋi aka miaŋgö ahakmeme aŋgöjörakŋambuk mi köteköba mem kömumba malje ewö, keu muneŋi mönö kude eraum mötme.

10 *Jen 1.26; Ef 4.24Iŋini uru walŋi köteköba kunbuk letota uru dölökŋi löŋgöta malje. Miwimiwikŋai Toninan nanŋi könaŋi möt teköm waŋgibingöra söpsöp alöhi, yaŋön mönö miaŋgö dop uru dölökŋi mi letot waŋgiiga toroqeba kölöŋaimakza. 11 Miaŋgöra nini Juda me kantri tosatŋaŋgö ambazip maljini, mi mönö dop mohot akza. Anutugö aiwesökŋi silenine yandiget me qahö, mi töndup Anutugö jeŋe dop mohot akzin. Taon ambazip mötmötninambuk me qandam (bus kanaka) mala nanŋini keuŋine irohowaroho jiba gukmaulem maljei, mi töndup Kraistnöŋ urunine kiniga mohot akzin. Nanini nupnini memakzin me toninaŋgö welenŋini töwaŋi qahö qemakzini, miaŋön yuai korembeŋi akzapmö, ölbölŋi mi Kraist. Yaŋön kutulaŋgöba körek neŋgoŋgita öŋgöba Kiŋ Kembunini bohonŋi mohot akza.

12 *Ef 4.2Anutunöŋ möwölöhöm eŋgiiga uru dölökŋi wuataŋgöba Anutugö wölböt alaurupŋi sarakŋi akze. Miaŋgöra iŋini mönö sutŋine ak kömumba ala ak aŋguba malme. Uruŋini memba et ala tosatŋi guŋbönjönjöŋ qakŋe ak eŋgiba lömböt möta mökösöŋda malme. Silik miaŋön mönö malukuŋini aiga kölget geiga mi töp memba malme.

13 *Ef 4.32Mönö lolongöba bölöŋaŋgö kitipŋi kude mememö, mönö qaqaeŋgim aŋguba malme. Köyan köl aŋgugetka sutŋine keu köpösihit ahuiga kunŋan alaŋi jim waŋgimamgö mötzawi, mi mönö mosöt aŋgume. Kembunöŋ siŋgisöndokŋini saŋgoŋda mosöröhi, iŋini mönö sutŋine mewöŋanök ak aŋgumakŋe. 14 Mewö aka urukalemgö malukuŋini mi kölget geiga miaŋgö qakŋe mönö urukalem aka jöpaköm aŋgugetka qetpuk akŋa. Urukalem miaŋön mönö aködamun tosatŋi pakpaköra jizali, mi köyamgöba mindiriba bohonŋina kinja.

15 Kraistnöŋ iŋini luainöŋ silemohot malmegöra eŋgoholök. Miaŋgöra yaŋgö luaiŋan mönö uruŋine ahöba ölöpŋaŋgö injup lökuatŋi ak eŋgiiga urubönjöŋnöŋ jim möpöseip aka malme.

16 *Ef 5.19-20Kraistköreŋ Buŋa keu miaŋön mönö uruŋine kinda sutŋine gwötpuk asuhum sehima. Mönö mötkutukutu keu pakpak jiba kusum aŋguba qambaŋ qem aŋgumakŋe. Uŋa Töröŋan sölölöhöm eŋgimakzawaŋgö dop mönö Buŋa Liŋet Sumbara (Sam), möpömöpösei liŋet (omsa) aka urugö liŋet tosatŋi mi urukönömŋinan Anutu möpöseiba kölakŋe. 17 Ahakmeme mi me mi jitnöŋ me siliknöŋ aka memei, mi pakpak mönö Kembu Jisösgö qetŋe ahakŋe. Mewö aketka Kraistnöŋ nam köl eŋgiiga Iwi Anutu pipsimbawoŋ jim waŋgiba malme. Mewö.

18 *Ef 5.22; 1 Pitö 3.1Ambi iŋini mönö apurupŋini yeŋgö keu bapŋe anda malme. Kembugö buŋaya akzeaŋgöra mönö mewö aketka dop kölma.

19 *Ef 5.25; 1 Pitö 3.7Azi iŋini mönö anömurupŋini urukalemnöŋ jöpaköm eŋgiba urupik wösökömbuk qakŋe kude ak eŋgiba malme.

20 *Ef 6.1Nahönbörat iŋini Kembubuk qekötahöba kinda iwinamyahötŋini yetkö jitŋiri wuataŋgögetka Kembunöŋ eŋgehiga dop kölma. Miaŋgöra iŋini mönö keuŋini jimeaŋgö dop pakpak tem köl eŋgiba malme.

21 *Ef 6.4Iwiurup eŋgö nahönböraturupŋinan awösamkakakŋini mosötpepuköra mönö kude eŋgum ureim ak eŋgiba malme.

22 *Ef 6.5-8Welenqeqe iŋini mönö gölme qakŋe galömurupŋini yeŋgö keuŋini pakpak tem köla ahakŋe. Köŋdöwoŋ aketka ambazipnöŋ eŋgek sorimegöra qahöpmö, geŋmoŋ mosöta Kembugö jitŋi oŋgitpinbukö sömbuŋini möta uruŋini nupnöŋ ala memba malme. 23 Yuai aka memakŋei, uruŋini mönö miaŋgöreŋ jöhöba kewö mötmörime: Gölme ambaziwök qahöpmö, Kembu nanŋi mönö welen qeba malje.

24 Kembu Kraist welenŋi qeba malgetka yaŋön töwaŋini Suep mire ali ahözawi, mi mönö eŋgiiga buŋaŋini akŋa. Mönö mewö mötmöriba malme. 25 *Dut 10.17; Ef 6.9Kunŋan nupŋi mem sohomawi, Anutunöŋ mewöŋanök mem sohosohoŋaŋgö likepŋi meleŋ waŋgima. Anutunöŋ tosatŋi qahö eŋgek soriba tosatŋi qahö qepureim eŋgimakzapmö, körek nini dop mohotnöŋ kewöt neŋgiba keunini jim teköma.